ໃນຕອນເຊົ້າຂອງວັນທີ 04 ທັນວາ 2014 ເວລາ 9:00 ທີ່ກະຊວງອຸດສາຫະກຳ ແລະ ການຄ້າ, ໄດ້ຈັດກອງປະຊຸມໜ່ວຍງານການຄ້າ ລາວ-ອີຢູ ຄັ້ງທີ 5, ໂດຍການເປັນປະທານຮ່ວມຂອງ ທ່ານ ບຸນສົມ ພົມມະວິຫານ, ຫົວໜ້າກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ແລະ ທ່ານ ນາງ Diana Acconcia ຮອງຫົວໜ້າໜ່ວຍງານເຂດອາຊີ ແລະ ອີຊີຕາເວັນອອກສຽງໃຕ້, ອົດສະຕາລີ, ນີວຊີແລນ, ຫົວໜ້າກົມຮັບຜິດຊອບຂະແໜງການຄ້າ, ກອງປະຊຸມໜ່ວຍງານການຄ້າ ລາວ-ອີຢູ ຄັ້ງນີ້ ແມ່ນສືບເນື່ອງມາຈາກກອງປະຊຸມຄະນະກຳມາທິການຮ່ວມມື ລາວ-ອີຢູ ຄັ້ງທີ 07 ໃນວັນທີ 20 ຕຸລາ 2014 ທີ່ປະເທດແບນຊິກ.
ຈຸດປະສົງຂອງກອງປະຊຸມໜ່ວຍງານການຄ້າ ລາວ-ອີຢູ ຄັ້ງນີ້ ແມ່ນເພື່ອປຶກສາຫາລື ທິດທາງແຜນການຮ່ວມມືລະຫວ່າງພາກລັດ ແລະ ພາກທຸລະກິດ ເພື່ອເພີ່ມມູນຄ່າການຄ້າລະຫວ່າງສອງຝ່າຍ ໂດຍສະເພາະແມ່ນການໄດ້ຮັບຜົນປະໂຫຍດຈາກ GSP (General System of Preferences), ກອງປະຊຸມໄດ້ທົບທວນຄືນການພົວພັນການຄ້າສອງຝ່າຍ ລາວ-ອີຢູ ຊຶ່ງໃນປີ 2013 ມູນຄ່າການຄ້າສອງສົ້ນສາມາດບັນລຸໄດ້ 337 ລ້ານໂດລາ ສະຫະລັດອາເມລິກາ, ເພີ່ມຂຶ້ນ 6% ທຽບໃສ່ປີທີ່ຜ່ານມາ, ໃນນັ້ນ ສປປ ລາວ ສົ່ງອອກ 162 ລ້ານໂດລາ ສະຫະລັດອາເມລິກາ, ສິນຄ້າຫຼັກທີ່ ສປປ ລາວ ສົ່ງອອກໄດ້ແກ່: ເຄື່ອງຕັດຫຍິບ, ຊາ, ກາເຟ, ນຳ້ຕານ, ເຄື່ອງໜັງ ແລະ ອື່ນໆ, ໃນຂະນະດຽວກັນສິນຄ້າທີ່ ສປປ ລາວ ນຳເຂົ້າຈາກອີຢູ ໄດ້ແກ່: ເຄື່ອງກົນຈັກ, ພາຫະນະລົດ, ເຫຼັກ, ຜະລິດຕະພັນເຫຼັກ ແລະ ອື່ນໆ. ນອກຈາກນັ້ນ, ສອງຝ່າຍ ຍັງໄດ້ທົບທວນການຈັດຕັ້ງປະຕິບັດພັນທະຂອງ ສປປ ລາວ ຕໍ່ກັບ ອົງການການຄ້າໂລກ, ຄວາມພ້ອມຂອງ ສປປ ລາວ ໃນການເຂົ້າເປັນປະຊາຄົມເສດຖະກິດອາຊຽນ ແລະ ການກະກຽມເປັນເຈົ້າພາບກອງປະຊຸມສຸດຍອດອາຊຽນໃນປີ 2046 ແລະ ປະເດັນອື່ນໆ.
ໃນວັນດຽວກັນ, ເວລາ 13:15 ທ່ານ ນາງ Diana Acconcia ພ້ອມດ້ວຍຄະນະ ກໍ່ໄດ້ເຂົ້າຢ້ຽມຂໍ່ຳນັບ ທ່ານ ນາງ ເຂັມມະນີ ພົນເສນາ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ.
[ພາບ] [ຂ່າວຈາກ] : [ສູນສະຖິຕິ ແລະ ຂ່າວສານ]
