ໃນລະຫວ່າງ ວັນທີ 17-19 ກຸມພາ 2015 ທີ່ຜ່ານມາ, ກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ຈັດກອງປະຊຸມຫາລືຜ່ານຮ່າງກົດໝາຍວ່າດ້ວຍເຄມີຄັ້ງທີ່ IV ຂຶ້ນທີ່ ຫ້ອງປະຊຸມຣີສອດນາປ່າກວາງ ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງ ທ່ານ ສົມຟອງ ສຸລິວັນ ຮອງຫົວໜ້າກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ພ້ອມດ້ວຍວິຊາການຈາກກະຊວງກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ ກໍ່ເພື່ອໃຫ້ທຸກພາກສ່ວນທີ່ກ່ຽວຂ້ອງ ແລະ ຜູ້ມີຄວາມສົນໃຈໄດ້ມີສ່ວນຮ່ວມໃນການປະກອບຄຳຄິດເຫັນໃສ່ຮ່າງກົດໝາຍໃຫ້ມີຄວາມລະອຽດ ແລະ ຈະແຈ້ງໂດຍສະເພາະໃນຂອດການຂຶ້ນທະບຽນ, ການຄຸ້ມຄອງ, ການກວດກາ, ການນຳເຂົ້າ-ສົ່ງອອກ ແລະ ຮັບປະກັນໃຫ້ມີຄວາມປອດໄພໃນຂະບວນການຜະລິດ, ການຄ້າ, ການຂົນສົ່ງ, ການເກັບຮັກສາ, ການນຳໃຊ້, ການກຳຈັດ ແລະ ບຳບັດ, ສິ່ງທີ່ສຳຄັນແມ່ນແນໃສ່ເຮັດໃຫ້ການແບ່ງພາລະບົດບາດ ແລະ ສິດໜ້າທີ່ໃຫ້ມີຄວາມລະອຽດຈະແຈ້ງລະຫວ່າງຂະແໜງການທີ່ຮັບຜິດຊອບໃນວຽກງານດັ່ງກ່າວ ແລະ ເພື່ອໃຫ້ມີເນື້ອໃນສອດຄ່ອງ ແລະ ຄົບຖ້ວນຖືກຕ້ອງຕາມກົດໝາຍວ່າດ້ວຍການສ້າງນິຕິກຳ, ໃຫ້ແທດເໝາະກັບເງື່ອນໄຂຂອງ ສປປ ລາວ ແລະ ຂອງສາກົນ ແລະ ສາມາດປະກາດໃຊ້ໃນປີ 2015.
ກອງປະຊຸມດັ່ງກ່າວແມ່ນສືບຕໍ່ຈາກກອງປະຊຸມຄັ້ງວັນທີ 19-20 ພະຈິກ 2014 ທີ່ໂຮງແຮມລ້ານຊ້າງ ແລະ ກອງປະຊຸມຄັ້ງທີ III ຂອງຄະນະວິຊາການຄົ້ນຄວ້າຮ່າງກົດໝາຍວ່າດ້ວຍເຄມີຄັ້ງວັນທີ 27-28/01/2015 ທີ່ວັງວຽງ ແຂວງ ວຽງຈັນ.
[ຂ່າວ: ສູນສະຖິຕິ ແລະ ຂ່າວສານ]
