ສປປ ລາວ ແລະ ສສ ຫວຽດນາມໄດ້ບັນລຸສັນຍາການຄ້າສະບັບໃໝ່ ເຊິ່ງຈະເປັນການເພີ່ມທະວີ ແລະ ຊຸກຍູ້ເຮັດໃຫ້ການດຳເນີນທຸລະກິດ, ການລົງທຶນ ແລະ ບໍລິມາດການຄ້າຂາຍລະຫວ່າງສອງປະເທດນັບມື້ນັບເພີ່ມຂຶ້ນເລື້ອຍໆ. ສັນຍາສະບັບດັ່ງກ່າວຈະໄດ້ປ່ຽນແທນສັນຍາການຄ້າລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ທີ່ລົງນາມຮ່ວມກັນໃນວັນທີ 9 ມີນາ 1998 ຢູ່ນະຄອນຫຼວງວຽງຈັນ ແລະ ຂໍ້ຕົກລົງວ່າດ້ວຍການໃຫ້ບຸລິມະສິດດ້ານອັດຕາພາສີຂາເຂົ້າ ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ທີ່ລົງນາມຮ່ວມກັນໃນວັນທີ 10 ທັນວາ 2011 ຢູ່ນະຄອນຫຼວງວຽງຈັນ.
ໃນຕອນເຊົ້າ ວັນທີ 3 ມີນາ 2015 ທີ່ ກະຊວງອຸດສາຫະກຳ ແລະ ການຄ້າ ໄດ້ມີພິທີເຊັນສັນຍາທາງດ້ານການຄ້າປະຈຳປີ 2015 ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ. ຮ່ວມລົງນາມໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າແຫ່ງ ສປປ ລາວ ກັບ ທ່ານ ດຣ. ຫວູ ຮຸຍ ຮວ່າງ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ. ໂດຍການເຂົ້າຮ່ວມເປັນສັກຂີພິຍານຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ການຜະລິດ ແລະ ຈໍລະຈອນ, ປະທານຄະນະກຳມາທິການຮ່ວມມື ລາວ-ຫວຽດນາມ; ທ່ານ ຫງວຽນ ແມັງ ຮຸ່ງ ເອກອັກຄະລັດຖະທູດຫວຽດນາມ ປະຈຳລາວ ພ້ອມຄະນະຜູ້ແທນທັງສອງຝ່າຍ.
ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ໂດຍປະຕິບັດຕາມທິດຊີ້ນຳຂອງສອງກົມການເມືອງ ແລະ ລັດຖະບານຂອງສອງປະເທດເຮົາໃນການເສີມຂະຫຍາຍ ແລະ ເປີດກວ້າງການຮ່ວມມືດ້ານເສດຖະກິດ-ການຄ້າ ລະຫວ່າງສອງປະເທດໃຫ້ນັບມື້ນັບຂະຫຍາຍຕົວ ແລະ ເລິກເຊິ່ງຂຶ້ນກວ່າເກົ່າ, ທັງສອງກະຊວງອຸດສາຫະກຳ ແລະ ການຄ້າ ພວກເຮົາກໍ່ໄດ້ສຸມໃສ່ໃນການດຳເນີນການເຈລະຈາໃນການສ້າງສັນຍາການຄ້າສອງຝ່າຍສະບັບນີ້ ເພື່ອເພີ່ມທະວີ ແລະ ຍົກສູງມິດຕະພາບແບບພິເສດ ແລະ ການຮ່ວມມືແບບຮອບດ້ານ, ສົ່ງເສີມການເຂົ້າເຖິງຕະຫຼາດດ້ານສິນຄ້າ, ດ້ານບໍລິການ ແລະ ພັດທະນາການເຊື່ອມຈອດລະຫວ່າງສອງປະເທດໃຫ້ມີຄວາມໝັ້ນຄົງ, ຍືນຍົງ ແລະ ຍາວນານ.
ທ່ານ ນາງ ເຂັມມະນີ ພົນເສນາ ຍັງໄດ້ກ່າວຕື່ມວ່າ: ໃນສັນຍາສະບັບນີ້ ລວມມີ 6 ໝວດ ແລະ 16 ມາດຕາ ໂດຍກວມເອົາວຽກທີ່ຕິດພັນກັບຂະແໜງການຄ້າດ້ານສິນຄ້າ ແລະ ການຄ້າດ້ານບໍລິການ, ການອຳນວຍຄວາມສະດວກດ້ານການຄ້າ, ການເຂົ້າສູ່ຕະຫຼາດ ແລະ ອື່ນໆ. ສັນຍາດັ່ງກ່າວນີ້, ສ້າງຂຶ້ນບົນພື້ນຖານການຮ່ວມມືການຄ້າແບບຍຸດທະສາດລະຫວ່າງປະເທດ ແລະ ແທດເໝາະກັບສະພາບການເຊື່ອມໂຍງເສດຖະກິດພາກພື້ນ ແລະ ສາກົນໃນໄລຍະໃໝ່. ສັນຍາດັ່ງກ່າວນີ້, ຈະເປັນການເພີ່ມທະວີ ແລະ ຊຸກຍູ້ເຮັດໃຫ້ການດຳເນີນທຸລະກິດ, ການລົງທຶນ ແລະ ບໍລິມາດການຄ້າຂາຍລະຫວ່າງສອງປະເທດນັບມື້ນັບເພີ່ມຂຶ້ນເລື້ອຍໆ.
ທ່ານ ຫວູ ຮຸຍ ຮວ່າງ ກ່າວວ່າ: ພາຍໃຕ້ການຊີ້ນຳກົມການເມືອງຂອງສອງປະເທດ ພວກເຮົາໄດ້ຂະຫຍາຍການພົວພັນມິດຕະພາບລະຫວ່າງ ລາວ-ຫວຽດນາມ ບໍ່ວ່າຈະເປັນດ້ານເສດຖະກິດການຄ້າ, ການລົງທຶນໃຫ້ນັບມື້ນັບຂະຫຍາຍຕົວ. ພ້ອມຮ່ວມກັນເສີມຂະຫຍາຍສາຍພົວພັນມິດຕະພາບແບບຮອບດ້ານ. ຜ່ານໄລຍະເວລາການເຈລະຈາສັນຍາການຄ້າລະຫວ່າງລາວ-ຫວຽດນາມ ມາເປັນເວລາດົນນານພໍສົມຄວນ ເຊິ່ງຍັງມີຫຼາຍໆບັນຫາທີ່ບໍ່ສາມາດຕົກລົງກັນໄດ້. ຍ້ອນມີການຊີ້ນຳໂດຍກົງຂອງນາຍົກທັງສອງປະເທດ ເຮັດໃຫ້ບັນຫາຕ່າງໆສາມາດລຸລ່ວງມາໄດ້. ຈົນມາຮອດມື້ນີ້ ສອງກະຊວງອຸດສາຫະກຳ ແລະ ການຄ້າ ລາວ-ຫວຽດນາມກໍ່ໄດ້ຮັບການມອບສິດຈາກທ່ານນາຍົກລັດຖະມົນຕີທັງສອງປະເທດເຂົ້າມາລົງນາມເຊັນສັນຍາການຄ້າ ລະຫວ່າງ ລາວ-ຫວຽດນາມ.
ສັນຍາສະບັບນີ້ເປັນສັນຍາທີ່ພິເສດເນື່ອງຈາກວ່າພາຍໃນສັນຍາການຄ້າສະບັບນີ້ ພວກເຮົາຈະໄດ້ເຊັນບົດບັນທຶກຄວາມເຂົ້າໃຈລະຫວ່າງສອງກະຊວງກ່ຽວກັບບຸລິມະສິດດ້ານອັດຕາພາສີກ່ຽວກັບສິນຄ້າປະເພດນ້ຳຕານ ເຊິ່ງສິນຄ້າປະເພດນ້ຳຕານນີ້ ເປັນສິນຄ້າທີ່ມີຄວາມອ່ອນໄຫວຕໍ່ກັບຕະຫຼາດຂອງຫວຽດນາມ ແລະ ອີກຢ່າງໜຶ່ງພວກເຮົາຕ້ອງການເຈລະຈາການຄ້າຊາຍແດນ ເພື່ອສົ່ງເສີມມູນຄ່າການຄ້າ ລະຫວ່າງ ລາວ-ຫວຽດນາມ ໃຫ້ນັບມື້ນັບສູງຂຶ້ນ.
ທ່ານຍັງໄດ້ກ່າວຕື່ມວ່າ: ການຄ້າຊາຍແດນລະຫວ່າງ ສປປ ລາວ ແລະ ສສ ຫວຽດນາມ ກວມເອົາ 90% ຂອງມູນຄ່າການຄ້າທັງໝົດຂອງສອງປະເທດ. ສະນັ້ນ ການເຈລະຈາການຄ້າລະຫວ່າງຊາຍແດນ ເປັນສິ່ງຈຳເປັນຕໍ່ການເສີມຂະຫຍາຍສາຍພົວພັນການຄ້າລະຫວ່າງສອງປະເທດ ແລະ ການຮ່ວມມືເສດຖະກິດຂອງສອງປະເທດ ໂດຍສະເພາະໃນຂະແໜງອຸດສາຫະກຳການຄ້າ.
[ຂ່າວ: ໜັງສືພິມເສດຖະກິດ-ການຄ້າ]
