ໃນຕອນເຊົ້າ ຂອງວັນທີ 23 ເມສາ 2015 ຜ່ານມາ, ກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຖອດຖອນບົດຮຽນກ່ຽວກັບການຄຸ້ມຄອງລາຄາສິນຄ້າ ໃນໄລຍະບຸນປີໃໝ່ລາວ ພສ 2558 ທີ່ຜ່ານມາ, ໂດຍການເປັນປະທານຂອງ ທ່ານ ບຸນທຽນ ແກ້ວສີພາ ຮັກສາການ ຫົວໜ້າກົມການຄ້າພາຍໃນ ແລະ ມີຄະນະພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ພ້ອມດ້ວຍວິຊາການ, ຜູ້ອໍານວຍການລັດວິສາຫະກິດສະບຽງອາຫານນະຄອນຫຼວງວຽງຈັນ ແລະ ຄະນະພະແນກ ພ້ອມດ້ວຍວິຊາການກ່ຽວຂ້ອງອ້ອມຂ້າງກົມການຄ້າພາຍໃນ.
ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ ໄດ້ມີຄໍາຄິດຄໍາເຫັນ ແລະ ໃຫ້ທິດຊີ້ນໍາຕໍ່ກັບການຈັດຕັ້ງປະຕິບັດວຽກງານການຄຸ້ມຄອງລາຄາສິນຄ້າ ໃນຊ່ວງເທດສະການບຸນປີໃໝ່ ພສ 2558 ທີ່ຜ່ານມາເຫັນໄດ້ວ່າໃນໄລຍະກ່ອນປີໃໝ່ 10 ວັນ ຈົນເຖິງປະຈຸບັນ ລາຄາ ແລະ ການສະໜອງຄວາມຕ້ອງການບໍລິໂພກສິນຄ້າ ໂດຍລວມແມ່ນປົກກະຕິ ແລະ ບໍ່ມີຫາງສຽງຈາກສັງຄົມຈົ່ມວ່າຕໍ່ກັບລາຄາສິນຄ້າແພງ ແລະ ຊອກຫາຊື້ ຫຼື ຈັບຈ່່າຍໄດ້ຍາກ ໂດຍສະເພາະໝວດສິນຄ້າປະເພດສະບຽງອາຫານ ເຖິງແມ່ນວ່າຊ່ວງປີໃໝ່ລາວ ຊຶ່ງເປັນໄລຍະທີ່ຄວາມຕ້ອງການບໍລິໂພກ ຫຼື ຊົມໃຊ້ສິນຄ້າຫຼາຍຂື້ນ ແລະ ຫຼາຍກວ່າມື້ປົກກະຕິ ເປັນຕົ້ນແມ່ນໝວດສິນຄ້າສະບຽງອາຫານ (ຊີ້ນໝູ) ສະເລ່ຍ ເພີ່ມຂຶ້ນ 32.2% ກໍ່ຕາມກໍບໍ່ມີຜົນກະທົບ ແລະ ຜົນສະທ້ອນຕໍ່ກັບສະຖຽນລະພາບທາງດ້ານລາຄາ ແລະ ຮັບປະກັນການສະໜອງຄວາມຕ້ອງການຊົມໃຊ້ສິນຄ້າໄດ້ຢ່າງພຽງພໍ ຖ້າທຽບກັບໄລຍະດຽວກັນ ໃນຊ່ວງບຸນປີໃໝ່ລາວປີທີ່ຜ່ານມາ ເຫັນວ່າມີບັນຫາຫຼາຍ, ບໍ່ສາມາດຄຸ້ມຄອງລາຄາສິນຄ້າໄດ້ຢ່າງມີປະສິດທິພາບ, ສ່ວນປີນີ້ສາມາດຈັດຕັ້ງປະຕິບັດວຽກງານການຄຸ້ມຄອງລາຄາສິນຄ້າໄດ້ຢ່າງມີປະສິດທິພາບ ແລະ ປະສິດທິຜົນດີ ຍ້ອນການເປັນເຈົ້າການ, ຄວາມເອົາໃຈໃສ່ ແລະ ສະຕິຕື່ນຕົວ ຂອງແຕ່ລະພາກສ່ວນທີ່ກ່ຽວຂ້ອງ ທັງພາກລັດ ແລະ ເອກະຊົນ ຈາກສູນກາງຈົນເຖິງທ້ອງຖິ່ນ ໂດຍສະເພາະ ພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ, ຫ້ອງການອຸດສາຫະກຳເມືອງ ອ້ອມຂ້າງນະຄອນຫຼວງ ແລະ ລັດວິສາຫະກິດສະບຽງອາຫານ ທີ່ປະກອບສ່ວນເຂົ້າໃນການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າໃນຊ່ວງປີໃໝ່ໄດ້ຜົນສໍາເລັດໄດ້ເປັນຢ່າງດີ.
ທ່ານ ຮັກສາການຫົວໜ້າກົມການຄ້າພາຍໃນ ຍັງໄດ້ກ່າວຍ້ອງຍໍ, ຊົມເຊີຍ ຜົນງານຄວາມດີຂອງບັນດາພາກສ່ວນທີ່ກ່ຽວຂ້ອງກັບການຈັດຕັ້ງປະຕິບັດຄຸ້ມຄອງລາຄາສິນຄ້າທີ່ໄດ້ຮັບຜົນສໍາເລັດ, ນອກຈາກນັ້ນທ່ານ ກໍໄດ້ຍົກຕື່ມອີກ 3 ບັນຫາຄື: ການຕິດລາຄາສິນຄ້າ, ການພັດທະນາຕະຫຼາດ ແລະ ການນໍາເຂົ້າສັດ ແລະ ຊີ້ນຈາກຕ່າງປະເທດ (ໂດຍສະເພາະແມ່ນເຄື່ອງໃນສັດ) ມາຖອດຖອນບົດຮຽນແລກປ່ຽນອີກດ້ວຍ.
ຈາກນັ້ນ ທ່ານ ສົມປະສົງ ສະຫຽວນວົງ ຮອງຫົວໜ້າພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ລາຍງານການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ໃນຊ່ວງເທດສະການປີໃໝ່ ພສ 2558 ທີ່ຜ່ານມາວ່າ ໂດຍລວມເຫັນວ່າການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ໃນຊ່ວງດັ່ງກ່າວ ແມ່ນໄດ້ຮັບຜົນສໍາເລັດເປັນຢ່າງດີ, ແຕ່ກໍ່ຍັງມີບາງອັນທີ່ເປັນອຸປະສັກ ຫຼື ຂໍ້ຫຍຸ້ງຍາກຕໍ່ກັບການຈັດຕັ້ງປະຕິບັດວຽກງານດັ່ງກ່າວ ເຊັ່ນວ່າ: ຍັງມີບາງຕະຫຼາດ ຢູ່ນະຄອນຫຼວງວຽງຈັນ ແມ່ນຍັງມັກງ່າຍຕໍ່ການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ໂດຍສະເພາະແມ່ນການໂຄສະນາ, ເຜີຍແຜ່ ແລະ ແຈ້ງຂ່າວ ກ່ຽວກັບລະບຽບການຕ່າງໆໃນການຄຸ້ມຄອງລາຄາສິນຄ້າ ໃຫ້ແກ່ພໍ່ຄ້າຊາຍຂາຍໃນຕະຫຼາດເຫັນໄດ້ເຖິງຄວາມສໍາຄັນຕໍ່ກັບວຽກງານດັ່ງກ່າວ.
ໃນຕອນທ້າຍຂອງກອງປະຊຸມ ທ່ານ ບຸນທຽນ ແກ້ວສີພາ ຮັກສາຫົວໜ້າກົມການຄ້າພາຍໃນ ກໍ່ໄດ້ມີທິດຊີ້ນໍາຕື່ມອີກຄື: ມອບໃຫ້ພະແນກ ອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ສືບຕໍ່ຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ທີ່ເຮັດໄດ້ດີແລ້ວນັ້ນ ໃຫ້ດີຂຶ້ນອີກໂດຍສະເພາະໃນໄລຍະບຸນປີໃໝ່ ແລະ ບຸນປະເພນີຕ່າງໆ ໃນປີຕໍ່ໄປ.
[ສູນສະຖິຕິ ແລະ ຂ່າວສານ]
