ຕອນເຊົ້າວານນີ້, ກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມດຳເນີນີວິດການເມືອງ ຕິດພັນກັບການທາບທາມບຸກຄະລາກອນ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງອຸດສາຫະກຳ ແລະ ການຄ້າ ຂຶ້ນ ພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ ເລຂາຄະນະບໍລິຫານງານພັກກະຊວງ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ເຂົ້າຮ່ວມກອງປະຊຸມມີ ທ່ານ ສຽວສະຫວາດ ສະແຫວງສຶກສາ ຮອງເລຂາຄະນະບໍລິຫານງານພັກກະຊວງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ, ບັນດາສະມາຊິກຄະນະບໍລິຫານງານພັກ, ສະມາຊິກຄະນະພັກຮາກຖານ, ເລຂາໜ່ວຍພັກອ້ອມຂ້າງກະຊວງ, ຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ສະຖາບັນ, ຫົວໜ້າ-ຮອງຫົວໜ້າອຳນວຍການບໍລິສັດ/ລັດວິສາຫະກິດທີ່ຂຶ້ນກັບກະຊວງ, ພ້ອມດ້ວຍພະນັກງານສະມາຊິກພັກຫຼັກແຫຼ່ງຂອງກະຊວງອຸດສາຫະກຳ ແລະ ການຄ້າ ແລະ ແຂກຖືກເຊີນຈາກຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ ເຂົ້າຮ່ວມຕິດຕາມກອງປະຊຸມໃນຄັ້ງນີ້.
ຈຸດປະສົງຂອງການດຳເນີນຊີວິດການເມືອງຄັ້ງນີ້ ແມ່ນເພື່ອແນ່ໃສ່ປັບປຸງ ປົວແປງພາຍໃນພັກທາງດ້ານການເມືອງ-ແນວຄິດ, ການຈັດຕັ້ງ, ຄຸນສົມບັດ ສິນທຳປະຕິວັດ, ແບບແຜນການນຳພາ ແລະ ແບບແຜນວິທີເຮັດວຽກ ເພື່ອແນໃສ່ຍົກສູງບົດບາດ ແລະ ຄວາມສາມາດນຳພາຂອງຄະນະພັກຂັ້ນຕ່າງໆໃນການປະຕິບັດໜ້າທີ່ການເມືອງຂອງຕົນ ໃນເງື່ອນໄຂໃໝ່, ເຊື່ງເນື້ອໃນເອກະສານທີ່ນຳມາເຜີຍແຜ່ ເຊື່ອມຊຶມໃນກອງປະຊຸມຄັ້ງນີ້ປະກອບມີ 4 ບົດຕົ້ນຕໍຄື: ບົດທີ 1: ເອກະສານຝຶກຝົນຄຸນທາດການເມືອງ ແລະ ຄຸນສົມບັດສິນທຳ ປະຕິວັດ, ບົດທີ 2: ປັບປຸງແບບແຜນວິທີເຮັດວຽກ ແລະ ຍົກສູງຄວາມສາມາດນຳພາຂອງຄະນະພັກຂັ້ນຕ່າງໆ, ບົດທີ 3: ມາດຖານຂອງຄະນະພັກ, ສະມາຊິກພັກ, ຂໍ້ຫ້າມຂອງສະມາຊິກພັກ ແລະ ບົດທີ 4: ຄວາມຮັບຜິດຊອບຂອງພະນັກງານນຳພາ-ຄຸ້ມຄອງຕໍ່ການປະຕິບັດໜ້າທີ່ການເມືອງ, ຊຶ່ງທັງ 4 ເອກະສານໃຫ້ກຽດນຳພາເຜີຍແຜ່ ເຊື່ອມຊຶມ ໂດຍສະຫາຍ ເລຂາ ແລະ ຮອງເລຂາຄະນະບໍລິຫານງານພັກກະຊວງ. ນອກນີ້, ຍັງຈະໄດ້ຮັບຟັງການແນະນຳບາງເນື້ອໃນສຳຄັນຂອງເອກະສານ ຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງຄະນະບໍລິຫານງານພັກກະຊວງສະໄໝທີ III, ຊຶ່ງເປັນເອກະສານຕົ້ນຕໍທີ່ຈະສະເໜີຜ່ານ ໃນກອງປະຊຸມໃຫຍ່ຄັ້ງທີ IV ຂອງ ອົງຄະນະພັກກະຊວງ.
ກອງປະຊຸມໄດ້ດຳເນີນເປັນເວລາ 02 ວັນເຕັມ, ຊຶ່ງໃນມື້ທຳອິດ ຜູ້ເຂົ້າຮ່ວມນອກຈາກໄດ້ເຊື່ອມຊຶມ ກຳແໜ້ນຕໍ່ບັນດາເນື້ອໃນຂອງເອກະສານທີ່ກ່າວມາຂ້າງເທິງແລ້ວ, ຍັງໄດ້ຈັດແບ່ງໜ່ວຍ ເພື່ອລົງເລິກຄົ້ນຄ້ວາປະກອບຄຳເຫັນ ໂດຍສະເພາະຕໍ່ເນື້ອໃນເອກະສານ ຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງຄະນະບໍລິຫານພັກກະຊວງ. ນອກນັ້ນ, ໄດ້ມີການປະກອບຄຳເຫັນຕໍ່ບົດສຳຫຼວດການນຳພາຂອງບຸກຄົນໃນຄະນະພັກ, ຄະນະນຳກະຊວງ ແລະ ພະນັກງານລະດັບປະລິນຍາເອກທີ່ສູນກາງຄຸ້ມຄອງ. ວາລະສຸດທ້າຍ, ກອງປະຊຸມ ໄດ້ດຳເນີນການທາບທາມບຸກຄະລາກອນທີ່ຈະລົງສະໝັກເປັນຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ ສະໄໝທີ IV ຮອບທີ II ໂດຍມີຕົວແທນທັງໝົດຂອງສະມາຊິກພັກ ທີ່ເປັນເປົ້າໝາຍຜູ້ແທນເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງ ອົງຄະນະພັກກະຊວງ ເຂົ້າຮ່ວມໃນການປ່ອນບັດທາບທາມ.
[ສູນສະຖິຕິ ແລະ ຂ່າວສານ]
