ກະຊວງ ອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມໃຫຍ່ ຄັ້ງທີ III ຂອງຄະນະຊາວໜຸ່ມ ກະຊວງ ພ້ອມທັງໄດ້ປ່ອນບັດເລືອກຕັ້ງຄະນະຊາວໜຸ່ມກະຊວງຊຸດໃໝ່ ຂຶ້ນໃນວັນທີ 28 ພຶດສະພາ ທີ່ຜ່ານມາ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ເລຂາຄະນະພັກກະຊວງ ລັດຖະມົນຕີວ່າການກະຊວງ ອຄ, ທ່ານ ດຣ. ວິໄລວົງ ບຸດດາຄຳ ເລຂາຄະນະບໍລິຫານສູນກາງຊາວໜຸ່ມ ປະຊາຊົນປະຕິບັດລາວ, ພ້ອມດ້ວຍບັນດາສະຫາຍຄະນະຊາວໜຸ່ມກະຊວງ.
ທ່ານ ນາງ ເຂັມມະນີ ພົນເສນາ ກ່າວວ່າ: ກະຊວງ ອຄ ມີຊາວໜຸ່ມ ທັງໝົດ 700 ກວ່າຄົນ. ໃນນັ້ນ, ໄດ້ເຄື່ອນໄຫວວຽກງານເສດຖະກິດ, ວຽກງານການເມືອງ ແລະ ວຽກງານຕີລາຄາຄືນເຫັນໄດ້ບາງຂໍ້ຄົງຄ້າງນັ້ນໃຫ້ສືບຕໍ່ປັບປຸງຄວາມສາມາດບົ່ມຊ້ອນຂອງຊາວໜຸ່ມໃຫ້ຍາດໄດ້ຜົນງານຫຼາຍກວ່າເກົ່າ, ປະກອບສ່ວນເຂົ້າໃນວຽກງານສ່ວນລວມ ສອດຄ່ອງກັບວຽກງານວິຊາສະເພາະ ແລະ ການສຶກສາແນວຄິດການເມືອງໃຫ້ແຕ່ລະໜ່ວຍຊາວໜຸ່ມ.
ທ່ານເລຂາຄະນະບໍລິຫານສູນກາງຊາວໜຸ່ມ ປະຊາຊົນປະຕິວັດລາວ ໄດ້ໂອ້ລົມຕໍ່ກອງປະຊຸມວ່າ: ກອງປະຊຸມໃຫຍ່ຄັ້ງທີ III ຂອງອົງຄະນະຊາວໜຸ່ມຂອງ ກະຊວງອຸດສາຫະກຳ ແລະ ການຄ້າ ສຸດທີ່ມີຄວາມໝາຍຄວາມສຳຄັນທາງດ້ານການເມືອງຍ້ອນຄະນະພັກກະຊວງ ແລະ ສະມາຊິກຊາວໜຸ່ມອ້ອມຂ້າງກະຊວງໄດ້ເອົາໃຈໃສ່ໃນການເຂົ້າຮ່ວມກອງປະຊຸມ ແລະ ເຮັດລ້ອນໜ້າທີ່ໆໄດ້ຮັບມອບໝາຍບົນຫົວຄິດປະດິດສ້າງ 4 ບຸກທະລຸ ເຊິ່ງມັນໄດ້ສ່ອງແສງໃຫ້ເຫັນບາດກ້າວເດີນ, ສ່ອງແສງໃຫ້ເຫັນໄຊຊະນະ ອັນພົ້ນເດັ່ນ ຄື: ຄະນະພັກຄະນະນຳກະຊວງໄດ້ປັບປຸງການຈັດຕັ້ງໃໝ່, ພະນັກງານກວ່າ 73% ເປັນພະນັກງານໜຸ່ມ, ຄະນະພັກຄະນະນຳກະຊວງເອົາໃຈໃສ່ຊີ້ນຳໃຫ້ໄດ້ຮັບໃບຍ້ອງຍໍ 4 ບຸກ ແລະ ການໄວ້ເນື້ອເຊື່ອໃຈເຊິ່ງກັນ ແລະ ກັນ ໂດຍສະເພາະສະແດງອອກໃນການເລືອກຕັ້ງຄະນະຊາວໜຸ່ມກະຊວງຊຸດໃໝ່ 36,36% ແມ່ນຜູ້ຍິງ ແລະ ການປ່ອນບັດເລືອກຕັ້ງຄັ້ງນີ້ເປັນສິ່ງທີ່ພົ້ນເດັ່ນອັນຈະເຮັດໃຫ້ສະມາຊິກຊາວໜຸ່ມບັນລຸໜ້າທີ່.
ສ່ວນການປ່ອນບັດເລືອກຄະນະຊາວໜຸ່ມກະຊວງ ອຸດສາຫະກຳ ແລະ ການຄ້າ ສະໄໝທີ III ໄດ້ເປັນເອກະພາບເລືອກສະຫາຍ ໄຊສົມເພັດ ນໍລະສິງ ເປັນເລຂາຄະນະຊາວໜຸ່ມກະຊວງ; ສະຫາຍ ດຣ. ບຸນເພັງ ສີບຸນເຮືອງ ຮອງຄະນະ; ສະຫາຍ ດາວເພັດ ເມືອງໂພນທອງ ຮອງຄະນະ ແລະ ສະຫາຍ ນາງ ບຸນທະວີ ບັນດາສັກ ຮອງຄະນະ.
[ບົດຂ່າວ: ໜັງສືພິມເສດຖະກິດ-ການຄ້າ]
