ໃນຕອນເຊົ້າຂອງວັນທີ່ 29 ພຶດສະພາ ທີ່ຜ່ານມາ, ຢູ່ທີ່ຫອ້ງຮັບແຂກຂອງກະຊວງອຸດສາຫະກຳ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ກາວຢ້ຽນ ລັດຖະມົນຕີຊ່ວຍວ່າການ ກະຊວງການຄ້າ ແຫ່ງ ສປ ຈີນ ພ້ອມດ້ວຍຄະນະ. ເນື່ອງໃນໂອກາດເດີນທາງມາເຮັດວຽກ ແລະ ເຂົ້າຮວ່ມ ກອງປະຊຸມຄະນະກຳມະທິການຮ່ວມມືລະຫວ່າງ ລາວ-ຈີນ ແລະ ຈີນ-ລາວ ຄັ້ງທີ່ 7, ຊຶ່ງຝ່າຍລາວໄດ້ສະແດງຍິນດີ ແລະ ຊົມເຊີຍຕໍ່ການເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມຄັ້ງທີ່ 7 ຂອງຄະນະກຳມະທິການຮ່ວມມືລາວ-ຈີນ ແລະ ຈີນ-ລາວ ໃນຄັ້ງນີ້ ຢ່າງສຸດອົກສຸດໃຈ.
ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດ; ໄດ້ຊົມເຊີຍ ແລະ ຕີລາຄາສູງການພົວພັນລະຫວ່າງລາວ ແລະ ສປ ຈີນ ໂດຍສະເພາະແມ່ນການຮ່ວມມືໃນຂົງເຂດການຄ້າ ແລະ ການລົງທຶນ ນັບມື້ນັບໄດ້ຮັບການຂະຫຍາຍຕົວຢ່າງຕໍ່ເນື່ອງ ເປັນຕົ້ນແມ່ນພາກເໜືອ ຂອງລາວ ແລະ ແຂວງຢຸນນານ. ຊຶ່ງສາມາດເຫັນໄດ້ວ່າ ມູນຄ່າການຄ້າ ລາວ-ຈີນ ໄດ້ມີຈັງຫວະການຂະຫຍາຍຕົວເພີ່ມຂື້ນ ແລະ ຕໍ່ເນື່ອງ, ປີ 2014 ບັນລຸໄດ້ປະມານ 3,61 ຕື້ໂດລາ, ເພີ່ມຂຶ້ນ 31,87% ເມື່ອທຽບໃສ່ປີຜ່ານມາ. ໃນນັ້ນ, ລາວສົ່ງອອກໄປ ສປ ຈີນ 1,77 ຕື້ໂດລາ ເພີ່ມຂຶ້ນ 73,56% ແລະ ລາວນຳເຂົ້າ 1,84 ຕື້ໂດລາ ເພີ່ມຂຶ້ນ 7,13% ເມື່ອທຽບໃສ່ປີຜ່ານມາ. ຊຶ່ງການສົ່ງອອກຂອງລາວ ສູ້ ສປ ຈີນ ເປັນອັບທີ່ 01 ເຊິ່ງກວມເອົາ 46,1% ໃນການສົ່ງອອກທັງໝົດໄປຕ່າງປະເທດຂອງລາວ.
ພ້ອມກັນນັ້ນ, ຝ່າຍລາວກໍ່ໄດ້ສະແດງຄວາມຂອບໃຈຕໍ່ກັບ ສປ ຈີນ ທີ່ໄດ້ໃຫ້ການຊ່ວຍເຫຼືອໃນໄລຍະຜ່ານມາ ເປັນຕົ້ນແມ່ນການຊ່ວຍເຫຼືອໃນການເຂົ້າຮ່ວມງານວາງສະແດງສິນຄ້າຂອງລາວ ແລະ ການຊ່ວຍເຫຼືອຝຶກອົບຮົມທາງດ້ານວິຊາການຕ່າງໆ. ນອກຈາກນີ້, ທັງສອງຝ່າຍຍັງໄດ້ແລກປ່ຽນຄຳເຫັນກັນຢ່າງກວ້າງຂວາງ ແລະ ປຶກສາຫາລືກັນ ຢ່າງເປີດອົກເປີດໃຈ ແລະ ກົງໄປກົງມາ ຕໍ່ບັນຫາທີ່ກ່ຽວຂ້ອງກັບການພົວພັນຮ່ວມມືຮອບດ້ານ ລະຫວ່າງ ລາວ-ຈີນ ໃນຕໍ່ໜ້າ, ໂດຍສະເພາະດ້ານເສດຖະກິດ-ການຄ້າ ແລະ ເຕັກນິກ ແລະ ກຳນົດທິດທາງແຜນການຮ່ວມມືໃນຕໍ່ໜ້າ.
[ສູນສະຖິຕິ ແລະ ຂ່າວສານ]
