ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ (ອຄ) ໃຫ້ຮູ້ວ່າ: ໃນການເປັນປະທານອາຊຽນປີ 2016 ທີ່ຈະມາເຖິງນີ້ ຈາກຜົນກອງປະຊຸມຂອງກະຊວງ ອຄ, ພາກສ່ວນກ່ຽວຂ້ອງ ແລະ ຈາກພາກທຸຸລະກິດ ພວກເຮົາໄດ້ກຳນົດເອົາ 4 ຂົງເຂດບຸລິມະສິດ ໃນການລົງເລິກເພື່ອຍາດແຍ່ງຜົນປະໂຫຍດສູງສຸດ ເພື່ອພັດທະນາປະເທດເຮົາ ແລະ ຕໍ່ການພັດທະນາອາຊຽນ.
ພິທີຖະແຫຼງຂ່າວຜົນກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 47 ໃນລະຫວ່າງວັນທີ 22 – 25 ສິງຫາ ຜ່ານມາ ທີ່ປະເທດມາເລເຊຍ ໄດ້ມີຂຶ້ນໃນຕອນບ່າຍວານນີ້ທີ່ກະຊວງ ອຄ ເຊິ່ງທ່ານລັດຖະມົນຕີວ່າການກະຊວງ ອຄ ໄດ້ແຈ້ງຜົນສຳເລັດຂອງກອງປະຊຸມດັ່ງກ່າວ.
ທ່ານ ນາງ ເຂັມມະນີ ພົນເສນາ ໃຫ້ຮູ້ວ່າ: ໃນການກະກຽມການເປັນປະທານອາຊຽນປີ 2016 ຂອງ ສປປ ລາວ ທີ່ຈະມາເຖິງນີ້, ກະຊວງ ອຄ ໄດ້ສົມທົບກັບຂະແໜງການກ່ຽວຂ້ອງຈັດກອງປະຊຸມເຖິງ 3 ຄັ້ງເພື່ອຮັບຟັງ ແລະ ແລກປ່ຽນຄວາມຄິດເຫັນຈາກພາກລັດ ແລະ ພາກທຸລະກິດທີ່ກ່ຽວຂ້ອງ ເພື່ອກຳນົດຫົວຂໍ້ບຸລິມະສິດຂອງ ສປປ ລາວ ແລະ ອາຊຽນທີ່ສຳຄັນຈາກຕ່າງປະເທດ ເຊິ່ງຜົນກອງປະຊຸມສາມາດກຳນົດເອົາ 4 ຂົງເຂດບຸລິມະສິດ ໃນການທີ່ຈະລົງເລິກຄື: ວຽກງານເຊື່ອມຈອດພາຍໃນອາຊຽນ, ການອຳນວຍຄວາມສະດວກທາງການຄ້າ, ການພັດທະນາວິສາຫະກິດຂະໜາດນ້ອຍ ແລະ ກາງ ແລະ ການພັດທະນາການທ່ອງທ່ຽວເພື່ອຍາດແຍ່ງຜົນປະໂຫຍດສູງສຸດໃຫ້ແກ່ ສປປ ລາວ ລວມທັງພາກພື້ນອາຊຽນໂດຍລວມ.
ສຳລັບຜົນກອງປະຊຸມ ລັດຖະມົນຕີເສດຖະກິດອາຊຽນຄັ້ງທີ 47 ໃນລະຫວ່າງວັນທີ 22 – 25 ສິງຫາຜ່ານມາ ທີ່ປະເທດມາເລເຊຍແມ່ນໄດ້ປຶກສາຫາລືບັນຫາຕ່າງໆ ໂດຍສະເພາະການທົບທວນ ແລະ ປະເມີນຜົນຂອງການຈັດຕັ້ງປະຕິບັດແຜນສ້າງປະຊາຄົມເສດຖະກິດອາຊຽນ AEC Blueprint 2015 ເຊິ່ງຈະໄດ້ປະກາດຢ່າງເປັນທາງການ ໃນວັນທີ 31 ທັນວາ 2015, ການປະເມີນຜົນການຈັດຕັ້ງ AEC Blueprint 2015 ແມ່ນໄດ້ຮັບຄວາມຄືບໜ້າຢ່າງສູງ. ມາຮອດເດືອນກໍລະກົດ 2015 ສາມາດປະຕິບັດບັນດາມາດຕະການໃນອາຊຽນໄດ້ເຖິງ 91.5% ເທົ່າກັບ 463 ມາດຕະການ ຈາກ 506 ມາດຕະການບຸລິມະສິດຂອງອາຊຽນ ແລະ ສປປ ລາວ ເອງແມ່ນສາມາດຈັດຕັ້ງປະຕິບັດໄດ້ 93,1%.
ສ່ວນຕົວເລກການຄ້າຂອງອາຊຽນສາມາດສົ່ງອອກຈາກປີ 2007 ຫາປີ 2014 ເພີ່ມຂຶ້ນເຖິງ 50 ເທົ່າກັບ 1 ພັນ 300 ຕື້ໂດຍລາສະຫະລັດ, ການຂະຫຍາຍຕົວທາງດ້ານການລົງທຶນໃນປີ 2014 ມີເຖິງ 136,2 ຕື້ໂດລາ ເພີ່ມຂຶ້ນເຖິງ 160% ຈາກປີ 2007.
ນອກນັ້ນ, ຍັງໄດ້ຮັບຟັງການລາຍງານຄວາມຄືບໜ້າກ່ຽວກັບການເປີດເສລີການຄ້າດ້ານສິນຄ້າ, ການບໍລິການປະຕູດຽວອາຊຽນ, ລະບົບພາສີຜ່ານດ່ານອາຊຽນ, ດ້ານມາດຕະຖານ ແລະ ຄວາມສອດຄ່ອງ, ດ້ານການລົງທຶນ, ດ້ານການຄ້າບໍລິການ, ຂອບການຢັ້ງຢືນວຸດທິບັດອາຊຽນ, ຊັບສິນທາງປັນຍາ, ນະໂຍບາຍການແຂ່ງຂັນທາງການຄ້າ, ການປົກປ້ອງຜູ້ຊົມໃຊ້, ວິສາຫະກິດຂະໜາດນ້ອຍ ແລະ ກາງ ຂໍ້ລິເລີ້ມການເຊື່ອມໂຍງອາຊຽນ, ລະບົບສະຖິຕິປະຊາຄົມອາຊຽນ, ການມີສ່ວນຮ່ວມຂອງພາກລັດ ແລະ ເອກະຊົນ, ການຮ່ວມມືເສດຖະກິດພາຍນອກ, ທີ່ປະຊຸມໄດ້ຜ່ານວິໄສທັດປະຊາຄົມເສດຖະກິດອາຊຽນປີ 2015.
ສຳລັບການເຈລະຈາສ້າງເຂດການຄ້າເສລີອາຊຽນ ບວກ 1 (ຈີນ, ສ.ເກົາຫຼີ, ຍີ່ປຸ່ນ, ອິນເດຍ ແລະ ອົດສະຕຣາລີ-ນີວຊີແລນ) ເຫັນວ່າມີຄວາມຄືບໜ້າຫຼາຍສົມຄວນ.
ໃນກອງປະຊຸມຄັ້ງນີ້ ລັດຖະມົນຕີອາຊຽນຂອງລາວຍັງໄດ້ຮ່ວມລົງນາມ ອະນຸສັນຍາວ່າດ້ວຍການດັດແກ້ສັນຍາວ່າດ້ວຍການຄ້າດ້ານສິນຄ້າ ສະບັບທີ 3 ພາຍໃຕ້ການຮ່ວມມືເສດຖະກິດຮອບດ້ານອາຊຽນ – ເກົາຫຼີ ເພື່ອເພີ່ມທະວີການຮ່ວມມືອາຊຽນເກົາຫຼີ.
[ພາບ, ຂ່າວ: ໜັງສືພິມເສດຖະກິດ-ການຄ້າ]
