ໃນຕອນເຊົ້າທີ່ຂອງມື້ນີ້, ກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ (ອຄ) ໄດ້ເປີດກອງປະຊຸມເຜີຍແຜ່ສັນຍາການຄ້າສອງຝ່າຍ ແລະ ສັນຍາການຄ້າຊາຍແດນ ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມຂຶ້ນ ພາຍໃຕ້ການເປັນປະທານຂອງທ່ານ ດຣ ລາວຮົວ ເຈີຈິງ ຮັກສາການຫົວໜ້າກົມນະໂຍບາຍການຄ້າຕ່າງປະເທດ ກະຊວງ ອຄ.
ທີ່ກອງປະຊຸມ ທ່ານ ດຣ ລາວເຮີ ເຈີຈິງ ຮັກສາການຫົວໜ້າກົມຍະໂຍບາຍການຄ້າຕ່າງປະເທດໄດ້ກ່າວສະເໜີຈຸດປະສົງຂອງກອງປະຊຸມໃນຄັ້ງນີ້ວ່າ: ສັນຍາການຄ້າສອງຝ່າຍ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານ ສສ ຫວຽດນາມ ທີ່ໄດ້ລົງນາມໃນວັນທີ 03 ມີນາ 2015 ທີ່ນະຄອນຫຼວງວຽງຈັນ ສປປ ລາວ ເປັນສັນຍາທີ່ສ້າງຂຶ້ນເພື່ອເພີ່ມທະວີ ແລະ ຍົກສູງມິດຕະພາບ ແບບພິເສດ ແລະ ການຮ່ວມມືແບບຮອບດ້ານ, ສົ່ງເສີມການເຂົ້າເຖິງຕະຫຼາດດ້ານສິນຄ້າ, ດ້ານບໍລິການ ແລະ ພັດທະນາການເຊື່ອມຈອດ ລະຫວ່າງສອງປະເທດ ໃຫ້ມີຄວາມໝັ້ນຄົງ, ຢືນຍົງ ແລະ ຍາວນານ ເຊິ່ງສັນຍາດັ່ງກ່າວປະກອບມີ 6 ໝວດ 16 ມາດຕາ; ສ່ວນສັນຍາວ່າດ້ວຍການຄ້າຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ ທີ່ໄດ້ລົງນາມໃນວັນທີ 27 ມີຖຸນາ 2015 ທີ່ແຂວງ ເຫງະອານ ສສ ຫວຽດນາມ ເປັນສັນຍາທີ່ສ້າງຂຶ້ນເພື່ອປະກອບສ່ວນກະຕຸ້ນມູນຄ່າການຄ້າ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ສູງຂຶ້ນ ແລະ ເພື່ອເພີ່ມທະວີການຮ່ວມມືເສດຖະກິດ-ການຄ້າ ແລະ ການເຊື່ອມໂຍງໃນຂອບອາຊຽນ ແລະ ຂອບລຸ່ມແມ່ນ້ຳຂອງ (GMS), ເພື່ອພັດທະນາດ້ານຊາຍແດນລາວ-ຫວຽດນາມ ໃຫ້ກາຍເປັນຈຸດເຊື່ອມຕໍ່ ໃຫ້ແກ່ການຈໍລະຈອນຂອງສິນຄ້າໃນພາກພື້ນ ແລະ ສາກົນ ແລະ ອຳນວຍຄວາມສະດວກໃຫ້ແກ່ການຄ້າໃນເຂດພາກພື້ນ, ເພື່ອສ້າງຄວາມເຂັ້ມແຂງໃຫ້ແກ່ການຄ້າຜ່ານຊາຍແດນ ແລະ ການລົງທຶນ ລະຫວ່າງ ສປປ ລາວ ແລະ ສສ ຫວຽດນາມ, ປະກອບສ່ວນເຂົ້າໃນການເພີ່ມທະວີການພົວພັນແບບເພື່ອນມິດທີ່ມີມູນເຊື້ອ, ຄວາມສາມັກຄີແບບພິເສດ ແລະ ຮອບດ້ານ ລະຫວ່າງ ສປປ ລາວ ແລະ ຫວຽດນາມ, ເພື່ອຊູກຍູ້ການພົວພັນໃນດ້ານເສດຖະກິດ, ການຄ້າ, ສັງຄົມ ແລະ ວັດທະຖະນະທຳ ລະຫວ່າງ ບັນດາແຂວງຊາຍແດນ ຂອງສອງປະເທດ, ປະກອບສ່ວນເຂົ້າໃນການສ້າງດ່ານຊາຍແດນລາວ-ຫວຽດນາມ ໃຫ້ກາຍເປັນດ່ານແຫ່ງການແລກປ່ຽນຊື້ຂາຍ, ມີຄວາມສະຫງົບ, ໝັ້ນຄົງ, ມິດຕະພາບ, ການຮ່ວມມື ແລະ ພັດທະນາແບບຍືນຍົງ, ເພື່ອເພີ່ມທະວີການພັດທະນາເສດຖະກິດ-ສັງຄົມ ແລະ ການລົບລ້າງຄວາມທຸກຍາກ, ໂດຍສະເພາະແມ່ນປະຊາຊົນຊົນເຜົ່າທີ່ອາໄສຢູ່ຕາມພູດອຍ, ຫ່າງໄກຊອກຫຼີກ ແລະ ເຂດຊາຍແດນ ລະຫວ່າງ ສອງປະເທດ, ປະກອບສ່ວນເຂົ້າໃນການຮັກສາຄວາມປອດໄພ, ປ້ອງກັນຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມ ຢູ່ຕາມແລວຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ ເຊິ່ງສັນຍາດັ່ງກ່າວປະກອບມີ 23 ມາດຕາ.
ກອງປະຊຸມດັ່ງກ່າວ ມີຜູ້ເຂົ້າຮ່ວມຈາກບັນດາກົມອ້ອມຂ້ອງ ກະຊວງອຸດສາຫະກຳ ແລະ ການຄ້າ 10 ກົມ, ຫ້ອງການກະຊວງ, ສະຖາບັນຄົ້ນຄວ້າເສດຖະກິດ-ການຄ້າ, ພະແນກອຸດສາຫະກຳ ແລະ ການຄ້າ ນະຄອນຫຼວງ, ສະພາການຄ້າ ແລະ ອຸດສາຫະກຳ ແຫ່ງຊາດລາວ, ກະຊວງຂະແໜງການທີ່ກ່ຽວຂ້ອງ 18 ກະຊວງ ແລະ ພາກທຸລະກິດ, ລວມທັງໝົດ 139 ທ່ານ.
ບົດຂ່າວ: ສູນສະຖິຕິ ແລະ ຂ່າວສານ
