ໃນຕອນເຊົ້າຂອງວັນທີ 22 ຕຸລາ 2015 ຜ່ານມາ, ທີ່ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດພິທີ ມອບ-ຮັບ ເງິນອຸປະຖຳຈາກທ່ານປະທານກຸ່ມບໍລິສັດຄຳໄພ່ກໍ່ສ້າງຈຳກັດຜູ້ດຽວ ຈຳນວນ 50 ລ້ານກີບ ເພື່ອນຳໃຊ້ ເຂົ້າໃນວຽກງານກະກຽມງານສະເຫຼີມສະຫຼອງວັນຊາດທີ 2 ທັນວາ ຄົບຮອບ 40 ປີ ທີ່ຈະຈັດຂຶ້ນທ້າຍປີນີ້.
ພິທີດັ່ງກາວໃຫ້ກຽດເຂົ້າຮ່ວມຮັບເອົາໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ພ້ອມດ້ວຍຕ່າງໜ້າຄະນະຫ້ອງການ, ຄະນະຮັບຜິດຊອບສວນສະໜາມ ແລະ ພະນັກງານຈຳນວນໜຶ່ງກໍໄດ້ເຂົ້າຮ່ວມ.
ເພື່ອເປັນການສະແດງຄວາມຮູ້ບຸນຄຸນຕໍ່ການປະກອບສ່ວນດັ່ງກ່າວ ທ່ານລັດຖະມົນຕີວ່າການ ກໍ່ໄດ້ມອບໃບກຽດຕິຄຸນໃຫ້ແກ່ທ່ານປະທ່ານບໍລິສັດ ທີ່ໄດ້ໃຫ້ການອຸປະຖຳ ແລະ ເຫັນຄວາມສຳຄັນໃນວຽກງານດັ່ງກ່າວ.
ງານສະເຫຼີມສະຫຼອງ ວັນຊາດທີ 2 ທັນວາ ຄົບຮອບ 40 ປີ ທີ່ຈະມາເຖິງນີ້ ທາງກະຊວງ ອຄ ກໍ່ໄດ້ມີການກະກຽມເຂົ້າຮ່ວມຢ່າງເປັນຂະບວນຟົດຟື້ນ ແລະ ເພື່ອໃຫ້ເຂົ້າຮ່ວມຢ່າງສົມກຽດ ເຊັ່ນ: ມີການຝຶກຊ້ອມກ້ອນກຳລັງສວນສະໜາມ, ອອກແບບກ້ອນກຳລັງສວນສະໜາມ, ການຕົບແຕ່ງລົດແຮ່ ສວນສະໜາມ ແລະ ອື່ນໆ ເປັນຕົ້ນ. ຊຶ່ງເງິນທີ່ໄດ້ຮັບການອຸປະຖຳໃນຄັ້ງນີ້ ກໍ່ຈະມາໝູນໃຊ້ເຂົ້າໃນວຽກງານຈຳເປັນທີ່ປິ່ນອ້ອມກະຊວງ ເພື່ອໃຫ້ວຽກງານສະເຫຼີມສະຫຼອງດັ່ງກ່າວໄດ້ຮັບຜົນສຳເລັດຕາມຈຸດປະສົງທີ່ຄາດໝາຍໃວ້.
[ພາບ ແລະ ຂ່າວ: ກະຊວງອຸດສາຫະກຳ ແລະ ການຄ້າ]
