ປະຕິບັດຕາມກົດໝາຍວ່າດ້ວຍການປົກປ້ອງຜູ່ຊົມໃຊ້ ສະບັບເລກທີ 02/ສພຊ, ລົງວັນທີ 30 ມິຖຸນາ 2010, ຕາມຫາງສຽງສະທ້ອນຂອງສັງຄົມກ່ຽວກັບການດໍາເນີນທຸລະກິດນໍ້າມັນເຊື້ອໄຟ ທີ່ມີບາງປໍ້າຂາຍຍ່ອຍນໍ້າມັນເຊື້ອໄຟ ຈໍາ ໜ່າຍນໍ້າມັນ ບໍ່ໄດ້ຄຸນນະພາບ, ມີນໍ້າ ແລະ ສິ່ງເປີະເປື້ອນ ເຈືອປົນ, ຕໍ່ບັນຫາດັ່ງກ່າວໂດຍປະຕິບັດຕາມກົດໝາຍ ແລະ ລະບຽບການ ກົມການຄ້າພາຍໃນ, ກະຊວງອຸດສາຫະກໍາ ແລະ ການຄ້າ ໃນນາມເປັນຜູ່ຄຸ້ມຄອງການດໍາເນີນທຸລະກິດ ນໍ້າມັນເຊື້ອໄຟ ທັງເປັນອົງການປົກປ້ອງຜູ່ຊົມໃຊ້ຂອງຂະແໜງອຸດສາຫະກໍາ ແລະ ການຄ້າ. ໃນຊ່ວງເດືອນ ກັນຍາ ປີ 2015 ກົມການຄ້າພາຍໃນ, ກະຊວງອຸດສາຫະກໍາ ແລະ ການຄ້າ ໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ລົງສົມທົບກັບ ກົມມາດຕະຖານ, ກະຊວງວິທະຍາສາດ ແລະ ເຕັກກໂນໂລຊີ ແລະ ລັດວິສາຫະກິດນໍ້າມັນເຊື້ອໄຟລາວ ລົງກວດກາເບິ່ງຄວາມສະອາດຂອງນ້ຳມັນ ຢູ່ບັນດາປໍ້າເປົ້າໝາຍ ພົບວ່າ: ສ່ວນຫຼາຍ ບັນດາປໍ້າກໍ່ປະຕິບັດໄດ້ດີ ຕາມມາດຕະຖານ ທີ່ກະຊວງວິທະຍາສາດເຕັກໂນໂລຊີ ແລະ ສິ່ງແວດລ້ອມ ແລະ ອົງການທີ່ກ່ຽວຂ້ອງໄດ້ກໍານົດໄວ້ ແລະ ມີບາງປໍ້າຍັງເຫັນວ່າມີນ້ຳເຈືອປົນຢູ່ໃນຖັງບັນຈຸນໍ້າມັນ ໃນປະລິມານ 1.2 – 3 cm ເຊິ່ງເກີນມາດຕະຖານທີ່ກຳນົດໄວ້ຂອງອົງການວິທະຍາສາດເຕັກໂນໂລຊີ ແລະ ສິ່ງແວດລ້ອມສະບັບເລກທີ 241/ອວຕ.ສນ, ລົງວັນທີ 12/02/2001 ບໍ່ໃຫ້ເກີນ 0.05-0.3 cm. ສະນັ້ນ, ທາງຄະນະກວດກາໄດ້ໃຫ້ ຜູ່ຮັບຜິດຊອບປ້ຳຢຸດຕິການຈຳໜ່າຍນ້ຳມັນຖັງທີ່ມີນໍ້າເຈືອປົນຊົ່ວຄາວ ຈົນກວ່າຈະມີການອານາໄມໃຫ້ສະອາດກ່ອນຈຶ່ງສາມາດຈຳໜ່າຍໄດ້, ນອກນີ້ ກໍລະນີ ຕົວຖັງທີ່ບໍ່ໄດ້ມາດຕະຖານ ກໍໄດ້ສະເໜີ ໃຫ້ປໍ້າມີການແກ້ໄຂສ້ອມແປງຄືນ ໃຫ້ໄດ້ຕາມມາດຕະຖານ ທີ່ກໍານົດໄວ້ ຈິ່ງຈໍາໜ່າຍປົກກະຕິໄດ້. ນອກນັ້ນ, ຄະນະກວດກາຍັງໄດ້ສະເໜີໃຫ້ບໍລິສັດແມ່ກວດກາຄືນ ບັນດາລູກປໍ້າຂອງຕົນ ໃຫ້ປະຕິບັດຕາມລະບຽບ ການທີ່ໄດ້ກໍານົດອອກຢ່າງເຂັ້ມງວດ.
ທາງລັດວິສາຫະກິດນ້ຳມັນເຊື້ອໄຟລາວໄດ້ນຳຕົວຢ່າງນ້ຳມັນທັງສອງປ້ຳໄປວິໄຈຕື່ມອີກວ່າມີສິ່ງເຈືອປົນອື່ນອີກ ຫຼືບໍ່ ແລະ ລາຍລະອຽດທາງລັດວິສາຫະກິດໄດ້ສົ່ງຜົນວິໄຈມາໃຫ້ ເຫັນວ່າຄຸນນະພາບຂອງນ້ຳມັນແຕ່ລະປ້ຳທີ່ທາງເຈົ້າໜ້າທີ່ກວດກາການຄ້າ ແລະ ພາກສ່ວນກ່ຽວຂ້ອງໄດ້ລົງກວດກາ ຜົນທົດລອງ ແລະ ວິໄຈນ້ຳມັນດັ່ງກ່າວ ຢູ່ໃນເກນປົກກະຕິຕາມ ການຢັ້ງຢືນຂອງພະແນກເຕັກນິກລັດວິສາຫະກິດນ້ຳມັນເຊື້ອໄຟລາວ.
ນອກຈາກລົງກວດກາປໍ້ານໍ້າມັນເປົ້າໝາຍ ທີ່ມີນໍ້າ ຫຼື ສິ່ງເປີະເປື້ອນເຈືອປົນແລ້ວ ກົມການຄ້າພາຍໃນ, ກະຊວງ ອຸດສາຫະກໍາ ແລະ ການຄ້າ ຍັງໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ລົງຕິດຕາມການປັບລົງລາຄານໍ້າມັນຂາຍຍ່ອຍ ໃນແຕ່ລະຄັ້ງ ແລະ ຕິດຕາມກວດກາການຊື້ – ຂາຍນໍ້າມັນເຊື້ອໄຟນອກລະບົບ ເປັນແຕ່ລະໄລຍະ ຕາມແຫຼ່ງຂ່າວ ແລະ ຂໍ້ມູນທີ່ທາງ ຜູ່ຊົມໃຊ້ ແລະ ສຽງສະທ້ອນຂອງສັງຄົມ ສົ່ງມາໃຫ້.
ສະນັ້ນ, ກົມການຄ້າພາຍໃນ, ກະຊວງອຸດສາຫະກໍາ ແລະ ການຄ້າ ຂໍຮຽກຮ້ອງມາຍັງຜູ່ປະກອບການທຸລະກິດ ນໍ້າມັນເຊື້ອໄຟ ໂດຍສະເພາະບັນດາບໍລິສັດແມ່ ໃຫ້ເອົາໃຈໃສ່ຕິດຕາມກວດກາ ລູກປໍ້າທີ່ເປັນຕົວແທນຂອງຕົນ ໃຫ້ໝັ່ນ ກວດກາ ເບິ່ງຖັງເກັບນໍ້າມັນຂອງຕົນຢູ່ຕະຫຼອດ ເພື່ອບໍ່ໃຫ້ມີນໍ້າ ຫຼືສິ່ງເປີະເປື້ອນເຈືອປົນ. ອີກດ້ານໜຶ່ງກໍ່ຮຽກຮ້ອງໃຫ້ເຈົ້າຂອງປ້ຳ ປະຕິບັດ ລະບຽບການຄຸ້ມຄອງ ການດໍາເນີນທຸລະກິດນໍ້າມັນເຊື້ອໄຟ ຢ່າງເຂັ້ມງວດ, ພ້ອມທັງຮຽກຮ້ອງໃຫ້ຜູ່ຊົມໃຊ້ ເປັນເຈົ້າການ ເມື່ອເຫັນວ່າມີການປະຕິບັດບໍ່ຖືກຕ້ອງຕາມລະບຽບຫຼັກການຂອງບັນດາປ້ຳຕ່າງໆ ແຈ້ງໃຫ້ເຈົ້າໜ້າທີ່ກວດກາ ການຄ້າປະຈຳແຕ່ລະເມືອງ ເພື່ອລົງຕິດຕາມກວດກາໃຫ້ທັນການ.
ກົມການຄ້າພາຍໃນ
ກະຊວງອຸດສາຫະກຳ ແລະ ການຄ້າ
