ກອງປະຊຸມສະພາທີ່ປຶກສາທຸລະກິດອາຊຽນຄັ້ງທີ 2 (ASEAN-BAC) ໄດ້ຍົກ 3 ຫົວຂໍ້ ໂດຍສະເພາະແຜນງານປະຊາຄົມເສດຖະກິດອາຊຽນ ພາຍຫຼັງປີ 2015, ການຫຼຸດຊ່ອງວ່າງລະຫວ່າງປະເທດ CLMV ກັບອີກ 6 ປະເທດໃນອາຊຽນ ແລະ ຫົວຂໍ້ທຸລະກິດຂະໜາດນ້ອຍ ແລະ ກາງ (SMEs) ໃນການພັດທະນາປະຊາຄົມເສດຖະກິດອາຊຽນໃຫ້ພາກລັດ ແລະ ທຸລະກິດຫາລືແລກປ່ຽນຄວາມຄິດເຫັນນຳກັນ ເພື່ອສ້າງຄວາມເຂັ້ມແຂງຂອງພາກທຸລະກິດຫຼັງປີ 2015 ແລະ ຄວາມພ້ອມຮອບດ້ານໃນການເປັນປະທານອາຊຽນຂອງ ສປປ ລາວ ປີ 2016.
ກອງປະຊຸມຄັ້ງນີ້, ແມ່ນໄດ້ເນັ້ນໃສ່ກ່ຽວກັບແຜນງານປະຊາຄົມເສດຖະກິດອາຊຽນພາຍຫຼັງປີ 2015 (Post-2015 Agenda of the AEC) ແລະ ຜົນຂອງຂະບວນການເຊື່ອມໂຍງສັງຄົມ ແລະ ເສດຖະກິດອາຊຽນ ໃນທ້າຍປີ 2015 ໂດຍສະເພາະແມ່ນໄດ້ເນັ້ນໜັກເປັນພິເສດກ່ຽວກັບ ສປປ ລາວ ທີ່ຈະໄດ້ຮັບໜ້າໃນການເປັນປະທານອາຊຽນ ໃນປີ 2016.
ທ່ານ ອຸເດດ ສຸວັນນະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອ) ທັງເປັນປະທານ ASEAN-BAC ໄດ້ນຳສະເໜີໃນຫົວຂໍ້: “ການຫຼຸດຊ່ອງວ່າງລະຫວ່າງປະເທດ CLMV ກັບອີກ 6 ປະເທດໃນອາຊຽນ” ໂດຍມີລາຍລະອຽດກ່ຽວກັບ ສປປ ລາວ ກັບບັນດາປະເທດດ້ອຍພັດທະນາອື່ນໆ ເພື່ອໃຫ້ສາມາດກ້າວທັນ ຫຼື ທຽບເທົ່າກັບປະເທດອື່ນໆໃນອາຊຽນ ແລະ ໄດ້ມີການສົນທະນາປຶກສາຫາລື ໂດຍຊ່ຽວຊານຮັບເຊີນ, ຄະນະທີ່ປຶກສາຫຼັກໂຄງການກົດລະບຽບ ແລະ ນະໂຍບາຍການແຂ່ງຂັນ (Principle Advisor for the Competition Policy and Law Project), ຜູ້ປະສານງານແຜນການພັດທະນາເສດຖະກິດອາຊຽນ (Coordinator of the Economic Development Programme of ASEAM) ແລະ ການສົ່ງເສີມການຮ່ວມມືກັບປະເທດເຢຍລະມັນ (German Development Cooperation) ແລະ ຄະນະບໍລິຫານງານສະພາທຸລະກິດ EU-ASEAN.
ທ່ານ Fabien Lum, Senior EVP ແລະ ທ່ານ ສົມດີ ອິນມີໄຊ ຫົວໜ້າກົມສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ, ກະຊວງອຸດສາຫະກຳ ແລະ ການຄ້າ ໄດ້ນຳສະເໜີຫົວຂໍ້ກ່ຽວກັບ “ທຸລະກິດຂະໜາດນ້ອຍ ແລະ ກາງ ແລະ ບົດບາດຂອງທຸລະກິດຂະໜາດນ້ອຍ ແລະ ກາງ ໃນການພັດທະນາປະຊາຄົມເສດຖະກິດອາຊຽນ” ເພື່ອກຳນົດບົດບາດຂອງ SMEs ໃນຂະບວນການເຊື່ອມໂຍງ.
ທ່ານ Tan Sri Dato’ Dr. MohdMunir Abdul Majid, ປະທານທະນາຄານ Maumalate, ປະເທດມາເລເຊຍ. ໄດ້ມີການນຳສະເໜີກ່ຽວກັບການປະກອບຄຳເຫັນຂອງສະພາທີ່ປຶກສາທຸລະກິດອາຊຽນ ກ່ຽວກັບແຜນງານປະຊາຄົມເສດຖະກິດອາຊຽນພາຍຫຼັງປີ 2015 ເຊິ່ງທຸກພາກສ່ວນຕ້ອງເປັນເຈົ້າການຮ່ວມມືກັນໃນການສ້າງຄວາມເຂັ້ມແຂງ ໂດຍສະເພາະພາກລັດຕ້ອງເປັນຜູ້ສະໜອງຂໍ້ມູນໃຫ້ພາກທຸລະກິດ ແລະ ພາກທຸລະກິດຕ້ອງເອົາໃຈໃສ່ໃນການຈັດຕັ້ງທຸລະກິດຂອງຕົນ.
ກອງປະຊຸມດັ່ງກ່າວຈັດຂຶ້ນໃນທ້າຍອາທິດ ຜ່ານມາທີ່ໂຮງແຮມລາວພາຊາ ພາຍໃຕ້ການເປັນປະທານຂອງ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານ ສີສະຫວາດ ທິຣະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ Tan Sri Dato’ Dr. Mohdmunir Abdul Majid ປະທານທະນາຄານ Maumalate, ທ່ານ Guy Apovy, ປະທານສະພາການຄ້າ ແລະ ອຸດສາຫະກຳ ເອີຣົບ ປະຈຳ ສປປ ລາວ ແລະ ທ່ານ ອຸເດດ ສຸວັນນະວົງ ປະທານສະພາທີ່ປຶກສາທຸລະກິດອາຊຽນ (ASEAN-BAC).
[ພາບ ແລະ ບົດຂາວຈາກ: ໜັງສືພິມເສດຖະກິດ-ການຄ້າ]
[ສະບັບວັນທີ: 08 ກຸມພາ 2016]
