ກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດເວທີສົນທະນາແລກປ່ຽນຄຳຄິດເຫັນພາຍຫຼັງເຂົ້າເປັນສະມາຊິກອົງການໆຄ້າໂລກ (ອຄລ) ຂອງ ສປປ ລາວ ຄົບຮອບ 3 ປີ.
ກອງປະຊຸມດັ່ງກ່າວຈັດຂຶ້ນໃນທ້າຍອາທິດ ຜ່ານມາທີ່ກະຊວງ ອຄ ໂດຍການເປັນປະທານຂອງ ທ່ານ ດຣ. ລາວຮົວ ເຈີຈິງ ຫົວໜ້າກົມນະໂຍບາຍການຄ້າຕ່າງປະເທດ ກະຊວງ ອຄ, ມີຄະນະຊ່ຽວຊານຈາກຂະແໜງການກ່ຽວຂ້ອງ, ຜູ້ເຂົ້າຮ່ວມຈາກພາກລັດ, ສະຖາບັນການສຶກສາ.
ທ່ານ ດຣ. ລາວຮົວ ເຈີຈິງ ໄດ້ກ່າວວ່າ: ກອງປະຊຸມມີຂຶ້ນເພື່ອທົບທວນຄືນວຽກງານ ແລະ ພັນທະພາຍຫຼັງການເຂົ້າເປັນສະມາຊິກອົງການໆຄ້າໂລກ (ອຄລ) ຂອງ ສປປ ລາວ ໃນໄລຍະ 3 ປີຜ່ານມາ ນັບຈາກວັນທີ 2 ກຸມພາ 2013 ເປັນຕົ້ນມາ.
ທ່ານກ່າວວ່າ: ສປປ ລາວ ໃນນາມເປັນສະມາຊິກໃໝ່ ແລະ ປະເທດດ້ອຍພັດທະນາຕ້ອງຍາດແຍ່ງເອົາຜົນປະໂຫຍດຈາກການເຂົ້າເປັນສະມາຊິກອົງການ ອຄລ ເປັນຕົ້ນແມ່ນການຮຽນຮູ້ກົດກະຕິກາຂອງສາກົນທີ່ອາດສົ່ງຜົນຕໍ່ທຸລະກິດລະຫວ່າງປະເທດ ໂດຍສະເພາະທຸລະກິດທີ່ຕິດພັນກັບການນຳເຂົ້າ – ສົ່ງອອກ, ການຈັດຕັ້ງປະຕິບັດພັນທະສັນຍາໃຫ້ທ່ວງທັນກັບກຳນົດເວລາ ແລະ ກະກຽມບຸກຄະລາກອນໃຫ້ມີຄວາມຮູ້ຄວາມສາມາດ ເພື່ອເຮັດແນວໃດໃຫ້ ສປປ ລາວ ສາມາດປະກອບສ່ວນຢ່າງຕັ້ງໜ້າເຂົ້າໃນເວທີການເຈລະຈາ ແລະ ຂະບວນການແກ້ໄຂຂໍ້ຂັດແຍ່ງຂອງ ອຄລ ເຊິ່ງເປັນກົນໄກທີ່ມີປະສິດທິຜົນສູງສຸດ ໃນລະບົບການຄ້າຫຼາຍຝ່າຍ.
ທ່ານຫົວໜ້າກົມກ່າວຕື່ມອີກວ່າ: ສຳລັບໂອກາດທີ່ຈະໄດ້ຊ່ວຍຍົກບົດບາດທາງດ້ານການເມືອງໃນເວທີສາກົນໃຫ້ສູງຂຶ້ນ, ລວມທັງການເຂົ້າຮ່ວມກຸ່ມເພື່ອເພີ່ມບົດບາດ ແລະ ອຳນາດຕໍ່ລອງທາງດ້ານເສດຖະກິດ, ການຂະຫຍາຍຕົວທາງດ້ານເສດຖະກິດ ຜ່ານການເປີດກວ້າງທາງດ້ານການຄ້າ ແລະ ການລົງທຶຶນ, ການປັບປຸງຄວາມສາມາດການແຂ່ງຂັນ ໂດຍຜູ້ຜະລິດສາມາດເລືອກຊື້ວັດຖຸດິບມີລາຄາຖືກກວ່າ ແລະ ຄຸນນະພາບດີກວ່າ; ໃນຂະນະດຽວກັນຜູ້ຊົມໃຊ້ກໍ່ມີທາງເລືອກທີ່ຫຼາຍຂຶ້ນ, ລະບຽບກົດໝາຍພາຍໃນທີ່ໄດ້ຮັບການປັບປຸງໃຫ້ສອດຄ່ອງກັບຫຼັກການໆຄ້າສາກົນ ເພື່ອສ້າງພື້ນຖານ ແລະ ຄວາມເຊື່ອໝັ້ນໃຫ້ແກ່ການລົງທຶນຕ່າງປະເທດ.
ຈາກການສຳພາດນັກສຶກສາທີ່ໄດ້ເຂົ້າຮ່ວມຮັບຟັງກອງປະຊຸມໃນຄັ້ງນີ້ ຫຼາຍນ້ອງກໍ່ໄດ້ໃຫ້ຄວາມເຫັນວ່າການໄດ້ເຂົ້າເປັນສະມາຊິກ ອຄລ ມີຄວາມສຳຄັນຫຼາຍໃນການພັດທະນາເສດຖະກິດ ເພາະເປັນອົງການທີ່ສ້າງເຄືອຂ່າຍທາງການຄ້າທີ່ມີຄວາມເປັນເອກະພາບ ແລະ ຍຸຕິທຳທີ່ສຸດ. ພ້ອມກັນນັ້ນ, ຍັງຮຽກຮ້ອງໃຫ້ພາກລັດໂດຍສະເພາະຂະແໜງການກ່ຽວຂ້ອງລົງເຜີຍແຜ່ລະບຽບ ແລະ ຫຼັກການຕ່າງໆໃຫ້ປະຊາຊົນ, ນັກທຸລະກິດຕາມທ້ອງຖິ່ນ, ຊາວກະສິກອນ ບັນດາຜູ້ຜະລິດຕ່າງໆໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ ເພາະເຂົາເຈົ້າເຫຼົ່ານັ້ນຈະເປັນຫົວໃຈສຳຄັນເພື່ອຮັບເອົາຂໍ້ມູນຈາກພາກລັດເພື່ອນຳໄປຜັນຂະຫຍາຍສ້າງເສດຖະກິດຕົວຈິງ.
[ບົດຂ່າວ: ໜັງສືພິມເສດຖະກິດ-ການຄ້າ]
