ໃນຕອນເຊົ້າຂອງວັນທີ 20 ທັນວາ 2016 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ໄດ້ເຂົ້າເປັນປະທານກອງປະຊຸມ ຜັນຂະຫຍາຍເນື້ອໃນວຽກງານກວດກາທົ່ວປະເທດຄັ້ງທີ 3 ແລະ ສະຫລຸບຕີລາຄາການເຄື່ອນໄຫວວຽກງານກວດກາຂອງກະຊວງອຸດສາຫະກໍາ ແລະ ການຄ້າ 5 ປີ 2011-2015 ໃນຕໍ່ຫນ້າ ປີ 2016-2020 ທີ່ກະຊວງອຸດສາຫະກໍາ ແລະ ການຄ້າ. ທ່ານ ໄດ້ເນັ້ນໃຫ້ກະຊວງອຸດສາຫະກໍາ ແລະ ການຄ້າ ເອົາໃຈໃສ່ຕິດຕາມການກວດກາການເຄື່ອນໄຫວວຽກງານຕາມພາລະບົດບານຂອງຕົນໃຫ້ເປັນລະບົບຕໍ່ເນື່ອງ ຮັບປະກັນຜົນປະໂຫຍດລວມຂອງຊາດ ກໍ່ຄືການສະກັດກັ້ນການສໍ້ລາດບັງຫລວງໃຫ້ຫມົດໄປ
ຜ່ານການຟັງການລາຍງານຂອງກອງປະຊມທ່ານໃຫ້ທິດຊີ້ນໍາວ່າ: ໃນ 5 ປີຜ່ານມາ ພາຍໃຕ້ການນໍາພາຂອງຄະນະພັກກະຊວງອຸດສາຫະກໍາ ແລະ ການຄ້າ ແມ່ນມີຄວາມບຸກບືນປະຕິບັດຫນ້າທີ່ການເມືອງຂອງຕົນເຊິ່ງເຮັດໃຫ້ວຽກງານການຄ້າລວມທັງນະໂຍບາຍຂອງຕ່າງປະເທດ, ການນໍາເຂົ້າ - ສົ່ງອອກ, ການພັດທະນາອຸດສາຫະກໍາ ແລະ ຫັດຖະກໍາ ພ້ອມທັງການຄຸ້ມຄອງດັດສົມວິສາຫະກິດຕ່າງໆ ໄດ້ມີການພັດທະນາ ແລະ ມີການຫັນປ່ຽນທີ່ຕັ້ງຫນ້າ, ແຕ່ຄຽງຄູ່ກັບຜົນສໍາເລັດທີ່ຍາດມາໄດ້ ເມື່ອທຽບໃສ່ກັບບັນດາຄາດຫມາຍສູ້ຊົນແຕ່ລະດ້ານທີ່ພັກ-ລັດ ກໍ່ຄືກະຊວງອຸດສາຫະກໍາແລະ ການຄ້າວາງອອກ ຍັງມີບັນຫາຈໍານວນຫນຶ່ງຕ້ອງໄດ້ສືບຕໍ່ປັບປຸງແກ້ໄຂເຊັ່ນ: ການຜັນຂະຫຍາຍ ວິໄສທັດ, ກົດຫມາຍນິຕິກໍາລຸ່ມກົດຫມາຍ ຫລາຍສະບັບ ຍັງບໍ່ເລິກເຊິ່ງກ້ວາງຂວາງທົ່ວເຖິງ ແລະ ຍັງມີຫລາຍອັນຍັງບໍ່ເປັນນະໂຍບາຍ ລະອຽດ, ການຈັດຕັ້ງປະຕິບັດນະໂຍບາຍການສົ່ງເສີມວິສາຫະກິດຂະຫນາດນ້ອຍ ແລະ ກາງ ຍັງບໍ່ທັນເປັນຮູບປະທໍາຢ່າງກ່ວາງຂວາງ, ການດັດສົມ-ຄຸ້ມຄອງໂຮງຈັກໂຮງງານຍັງບໍ່ທັນເຂັ້ມງວດ, ຕ້ອງເອົາໃຈໃສ່ເພີ່ມເຕີມໃນການຄຸ້ມຄອງລາຄາສິນຄ້າປະເພດຕ່າງໆ, ວຽກງານການຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງໃຫ້ສືບຕໍ່ເພີ່ມທະວີການຕິດຕາມກວດກາໃຫ້ເຂັ້ມງວດກ່ວາເກົ່າ, ພ້ອມທັງແກ້ໄຂວຽກການເກັບກູ້ວັດຖຸເງິນຄໍາທີ່ຕົກເຮ່ຍເສຍຫາຍຄືນມາໃຫ້ໄດ້ຕາມກໍານົດເວລາ.
ສ່ວນວຽກງານການແຈ້ງຂື້ນບັນຊີຊັບສິນ ແລະ ລາຍນັບຂອງພະນັກງານ, ລັດຖະກອນ, ທະຫານ, ຕໍາຫລວດ ຕາມລະບຽບການແລ້ວ 2 ປີຕໍ່ຄັ້ງ, ດັ້ງນັ້ນຄະນະພັກ, ຄະນະກວດກາ ແຕ່ລະຂັ້ນຕ້ອງໄດ້ເອົາໃຈໃສ່ຊີ້ນໍາຢ່າງຖືກຕ້ອງຕາມລະບຽບກົດຫມາຍ.
[ສູນສະຖິຕິ ແລະ ຂໍ້ມູນຂ່າວສານ]
