ຖືວ່າເປັນເລີກງາມຍາມດີຂອງຫນັງສືພິມເສດຖະກິດ-ການຄ້າທີ່ໄດ້ດໍາເນີນການເປີດໂຕເວັບໄຊ ແລະ ເຟສບຸກຢ່າງເປັນທາງການ ໃນເວລາ 2:00 ໂມງ ຂອງວັນທີ 16 ມັງກອນ 2017 ທີ່ກະຊວງອຸດສາຫະກໍາ ແລະ ການຄ້າ ໂດຍການເຂົ້າຮ່ວມເປັນປະທານກິດຕິມະສັກຂອງ ທ່ານ ສຽວສະຫວາດ ສະແຫວງສຶກສາ, ທ່ານ ບຸນມີ ມະນີວົງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ປິ່ນ ປາດຖະໜາ ພັນທະມາລີ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ການທ່ອງທ່ຽວ, ທ່ານ ນາງ ຖາວອນ ວົງສົມບັດ ປະທານຜູ້ບໍລິຫານກຸ່ມບໍລິສັດໂຄລາວ ແລະ ທ່ານ ປອ. ຄໍາຂັນ ນະພາວົງ ຫົວຫນ້າຄະນະບັນນາທິການຫນັງສືພິມເສດຖະກິດ-ການຄ້າ, ພ້ອມທັງບັນດາຫົວໜ້າກົມ, ຮອງກົມ , ຫົວຫນ້າພະແນກ, ຮອງພະແນກ, ວິຊາການທີ່ກ່ຽວຂ້ອງຂອງກະຊວງ ແລະ ສື່ມວນຊົນຫລາຍຂະແຫນງການກໍ່ເຂົ້າຮ່ວມ.
ຊຶ່ງຍາມໃດຄະນະພັກກະຊວງອຸດສາຫະກໍາ ແລະ ການຄ້າ ກໍ່ໃຫ້ຄວາມສໍາຄັນແກ່ຫນັງສືພິມເສດຖະກິດ - ການຄ້າ ເພາະເປັນກະບອກສຽງອັນສໍາຄັນຂອງຂະແຫນງອຸດສາຫະກໍາ ແລະ ການຄ້າ ໂດຍດານເອົາໃຈໃສ່ຕິດຕາມ ແລະ ປັບປຸງຈົນເຖິງປະຈຸບັນ ເພື່ອຮັບໃຊ້ໜ້າທີ່ການເມືອງຂອງຂະແໜງອຸດສາຫະກໍາ ແລະ ການຄ້າ ໃນໄລຍະໃຫມ່ ທີ່ໄດ້ ກ້າວເຂົ້າສູ່ການເຊື່ອມໂຍງກັບສາກົນ ແລະ ພາກພື້ນ ແລະ ເປັນທີ່ຫນ້າພູມໃຈທີ່ກຸ່ມບໍລິສັດໂຄລາວໄດ້ຕົກລົງປົງໃຈປະກາດເປັນຜູ້ອຸປະຖໍາຫລັກໃຫ້ຫນັງສືພິມເສດຖະກິດການຄ້າໃນໄລຍະຜ່ານມາເຮັດໃຫ້ຫນັງສືພິມນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະ ເປັນບາດກ້າວໃຫມ່ທີ່ຈະພັດທະນາສື່ໃຫ້ກ້ວາງຂວາງຂື້ນເພື່ອເຮັດໃຫ້ການລາຍງານຂ່າວທັນກັບສະພາບການ ແລະ ເວລາ ໂດຍຫັນໄປສູ່ລະບົບອອນລາຍ ແລະ ເຂົ້າເຖິງກຸ່ມຜູ້ອ່ານໃຫ້ໄດ້ຫລາຍທີ່ສຸດ ໃນຍຸກເທັກໂນໂລຊີຂໍ້ມູນ - ຂ່າວສານ (www.laoedaily.com.la ແລະ facebook )
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
