ເວລາ 11:00ໂມງ ຂອງວັນທີ 31 ມັງກອນ 2017 ທີ່ຫ້ອງຮັບແຂກກະຊວງອຸດສາຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີກະຂວງອຸດສາຫະກໍາ ແລະ ການຄ້າໄດ້ຮັບຕ້ອນການຢຽມຂໍ່ານັບຂອງທ່ານ Pablo Antonio Rodriguez Vidal ເອກອັກຄະລັດຖະທູດ ວິສາມັນຜູ້ມີອໍານາດເຕັມປະເທດກູບາປະຈໍາ ສປປ ລາວ ເນື່ອງໃນໂອກາດໄດ້ດໍາລົງຕໍາແໜ່ງໄຫມ່.
ການເຂົ້າຢ້ຽມໃນຄັ້ງນີ້ມີການສົນທະນາແລກປ່ຽນຄໍາຄິດຄໍາເຫັນດ້ວຍບັນຍາກາດທີ່ເປັນກັນເອງ ບົນເນື້ອໃນຈິດໃຈຂອງສາຍພົວພັນມິດຕະພາບທີ່ມີມາແຕ່ດົນນານ ລະຫວ່າງລາວ-ກູບາ ແລະ ໄດ້ເນັ້ນໃສ່ການຮ່ວມມື ໃນຂົງເຂດເສດຖະ ກິດ, ການຄ້າ ແລະ ການລົງທຶນ ເພື່ອເຮັດໃຫ້ການຮ່ວມມື ລະຫວ່າງສອງປະເທດໃຫ້ນັບມື້ໄດ້ຮັບການຂະຫຍາຍຕົວ ໂດຍສະເພາະຢາກໃຫ້ມີການຈັດເວທີພົບປະທຸລະກິດລາວ-ກູບາດ້ວຍການເຊື້ອເຊີນນັກລົງທຶນຂອງກູບາທີ່ກໍາລັງລົງທຶນຢູ່ໃນຂົງເຂດພາກພື້ນອາຊີເຂົ້າຮ່ວມ ແລະ ທ່ານ ລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ສະເໜີໃຫ້ມີການຈັດງານວາງສະແດງສິນຄ້າຂອງປະເທດກູບາທີ່ປະເທດລາວ ໂດຍສະເພາະສິນຄ້າທີ່ເປັນທ່າແຮງຂອງປະເທດກູບາ.
ສຸດທ້າຍ ທ່ານເອກອັກຄະລັດຖະທູດ ນ້ອມນໍາເອົາເນື້ອໃນໃຈຄວາມຂອງທ່ານ ລັດຖະມົນຕີໄປສະເໜີຕໍ່ນັກລົງທຶນຂອງກູບາ ແລະ ທ່ານ ລັດຖະມົນຕີກໍ່ໄດ້ສະແດງຄວາມຂອບໃຈຕໍ່ທ່ານເອກອັກຄະລັດຖະທູດທີ່ໃຫ້ຄວາມສໍາຄັນ ຕໍ່ສາຍພົວພັນທີ່ມີມາແຕ່ດົນນານ ແລະ ໃຫ້ຄວາມເປັນຫ່ວງເປັນໄຍຕໍ່ຂົງເຂດເສດຖະກິດ ແລະ ຫວັງວ່າໃນໄລຍະດໍາລົງຕໍາແໜ່ງຂອງທ່ານ ເອກອັກຄະລັດຖະທູດຈະເຮັດໃຫ້ການຮ່ວມມືສາຍພົວພັນຮອບດ້ານລະຫວ່າງສອງປະເທດນັບມື້ນັບຂະຫຍາຍຕົວ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
