ໃນວັນທີ 10 ກຸມພາ 2017 ເວລາ 9:00ໂມງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ພ້ອມຄະນະພະແນກອຸດສາຫະກໍາ ແລະ ການຄ້າ ນະຄອນຫລວງ ໄດ້ເອົາໃຈໃສ່ລົງຕິດຕາມການຕິດລາຄາສິນຄ້າທີ່ນໍາເຂົ້າ ເປັນພາສາລາວຂອງສາມບໍລິສັດໃຫຍ່ ເພື່ອເຮັດໃຫ້ວຽກງານນໍາເຂົ້າ-ສົ່ງອອກ ບັນດາສິນຄ້າປະເພດເຄື່ອງອຸປະໂພກ, ບໍລິໂພກໃຫ້ໄດ້ຮັບການຄຸ້ມຄອງຢ່າງມີປະສິດທິຜົນ ປົກປ້ອງສິດທິ ແລະ ຜົນປະໂຫຍດຂອງຜູ້ຊົມໃຊ້, ຜ່ານການລົງຕິດຕາມກວດກາສາມບໍລິສັດຄື: ບໍລິສັດຊີໄອ ການຄ້າຂາເຂົ້າ-ຂາອອກຈຳກັດ; ບໍລິສັດພອນສະຫວັນການຄ້າຂາເຂົ້າ-ຂາອອອກຈຳກັດ ແລະ ບໍລິສັດສົມບູນການຄ້າຂາເຂົ້າ-ຂາອອກຈຳກັດ, ເຫັນວ່າບໍລິສັດດັ່ງກ່າວໄດ້ມີການຕິດສະຫຼາກພາສາລາວໃສ່ສິນຄ້າທີ່ໄດ້ນຳເຂົ້າມາ ແລະ ເພື່ອກຽມ ຈຳໜ່າຍສຳເລັດແລ້ວ , ເຊິ່ງບາງບໍລິສັດກໍ່ໃຫ້ບໍລິສັດຜູູ້ຜະລິດເປັນຜູ້ຕິດໃຫ້ພ້ອມເລີຍ, ບາງບໍລິສັດກໍ່ໄດ້ມາຕິດເອງ.
ທ່ານ ສົມຈິດ ອິນທະມິດ ກ່າວວ່າອີງໃສ່ກົດໝາຍດ້ວຍການປົກປ້ອງຜູ້ຊົມໃຊ້; ກະຊວງອຸດສາຫະກຳ ແລະ ການຄ້າ ໄດ້ມີຄໍາສັ່ງເລກທີ 2501/ອຄ. ຄພນ ລົງວັນທີ 16 ທັນວາ 2016 ກ່ຽວກັບການຕິດສະຫຼາກສິນຄ້າເປັນພາສາລາວ ເພື່ອແນໃສ່ສິນຄ້າທຸກປະເພດທີ່ນຳເຂົ້າຕ້ອງໄດ້ຕິດສະຫຼາກກຳກັບເປັນພາສາລາວ, ເພື່ອໃຫ້ຮູ້ຈັກວ່າສິນຄ້ານັ້ນແມ່ນນຳເຂົ້າມາບ່ອນໃດ, ສັບພະຄຸນແນວໃດ ແລະ ທີ່ສຳຄັນວັນເດືອນປີທີ່ຜະລິດ-ວັນເດືອນປີໝົດອາຍຸ; ຖ້າຫາກຜູ້ຊົມໃຊ້ ແລະ ຜູ້ບໍລິໂພກກິນດື່ມ ຫຼື ຊົມໃຊ້ແລ້ວມີບັນຫາກະທົບຕໍ່ດ້ານສຸຂະພາບ ( ສຸຂານາໄມ ) ແມ່ນຜູ້ບໍລິໂພກສາມາດຟ້ອງຮ້ອງກັບໄປຫາບໍລິສັດທີ່ນຳເຂົ້າມາຈຳໜ່າຍໄດ້.
ສຳລັບຂະແໜງອຸດສາຫະກຳ ແລະ ການຄ້າເອງການຕິດສະຫຼາກເປັນພາສາລາວກໍ່ເປັນເຄື່ອງມືໜຶ່ງທີ່ຈະຊ່ວຍດຶງເອົາລະບົບການຄ້າໃຫ້ເຂົ້າເປັນລະບຽບເຊິ່ງຈະເຮັດໃຫ້ໄດ້ຄືແນວນັ້ນຕ້ອງແມ່ນຜູ້ທີ່ນຳເຂົ້າທີ່ຖືກຕ້ອງ ປະຕິບັດຕາມລະບຽບກົດຫມາຍບ້ານເມືອງວາງອອກອັນຈະເຮັດໃຫ້ພວກເຮົາສາມາດແກ້ໄຂໄດ້ການຄ້າເຖື່ອນ ( ແມ່ຄ້າທີ່ລັກລອບນຳເຂົ້າ ). ຜ່ານການຈັດຕັ້ງປະຕິບັດຜ່ານມາກໍ່ມີບໍລິສັດຈຳນວນໜຶ່ງທີ່ໃຫ້ການຮ່ວມມື ແລະ ຍັງມີບາງບໍລິສັດທີ່ຍັງບໍ່ໃຫ້ການຮ່ວມມື ແລະ ມີກຸ່ມແມ່ຄ້າລາຍຍ່ອຍທີ່ປ່ອຍຂ່າວດ້ານທີ່ບໍ່ດີເນື່ອງຈາກເສຍຜົນປະໂຫຍດ.
ນອກຈາກນີ້ ທ່ານ ວັນສົມ ວິລະວົງ ອຳນວຍການບໍລິສັດ ພອນສະຫວັນຂາເຂົ້າ-ຂາອອກຈຳກັດ ຍັງໄດ້ກ່າວວ່າ: ການຕິດສະຫຼາກເປັນພາສາລາວ ຈະເຮັດໃຫ້ຜູ້ບໍລິໂພກ ຮູ້ຈັກແຫຼ່ງສິນຄ້າ ເຈົ້າຂອງສິນຄ້າ ໂດຍສະເພາະແມ່ນຜູ້ນຳເຂົ້າ, ລູກຄ້າສາມາດຮັບຮູ້ໄດ້ວ່າສິນຄ້າມາຈາກບ່ອນໃດ ແລະ ສະແດງໃຫ້ຮູ້ວ່າສິນຄ້າດັ່ງກ່າວມີບໍລິສັດໃດເປັນຜູ້ຮັບຜິດຊອບ, ຫາກບໍ່ມີສະຫຼາກພາສາລາວຕິດກໍ່ຈະບໍ່ຮູ້ເລີຍວ່າສິນຄ້ານັ້ນນຳເຂົ້າແບບຖືກຕ້ອງ ຫລືບໍ່ ເຮັກວິທີນີ້ມັນຈະເປັນການງ່າຍໃຫ້ແກ່ພາກລັດໃນການກວດສອບ. ຫາກພາກລັດຈັດຕັ້ງປະຕິບັດຢ່າງເຄັ່ງຄັດໃນທົ່ວປະເທດກໍ່ຈະເປັນການດີ ເພາະຈະເຮັດໃຫ້ການເກັບພັນທະເຂົ້າລັດໄດ້ຫຼາຍຂຶ້ນ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
