ໃນລະຫວ່າງວັນທີ 16-17 ມີນາ 2017 ທີ່ ແຂວງ ໄຊຍະບູລີ ໄດ້ໄຂກອງປະຊຸມ ວິຊາການຄົ້ນ ຄ້ວາ ແລະ ເຜີຍແຜ່ບົດຄົ້ນຄວ້າທີ່ໄດ້ຮັບທຶນຈາກໂຄງການ TDF2 ຂຶ້ນ ໂດຍການເປັນປະທານ ຂອງທ່ານ ສັນຕິສຸກ ວິໄລຈະເລີນ ຫົວໜ້າສະຖາບັນຄົ້ນຄວ້າ ເສດຖະກິດ ແລະ ການຄ້າ ແລະ ມີຮອງຫົວໜ້າສະຖາບັນຄົ້ນຄວ້າ ເສດຖະກິດ ແລະ ການຄ້າ, ວິຊາການ ແລະ ຕາງຫນ້າແຕ່ລະກົມເຂົ້າຮ່ວມ ຢ່າງເປັນຂະບວນຟົກຟື້ນ, ໂຄງການ ທີດີເອຟ ເປັນໂຄງການໜຶ່ງທີ່ສະໜັບສະໜູນການພັດທະນາວຽກງານໃນຂະແໜງອຸດສາຫະກຳ ແລະ ການຄ້າ, ໃນນີ້ ໂຄງການດັ່ງກ່າວໄດ້ມີງົບປະມານສ່ວນໜຶ່ງພັດທະນາຄວາມອາດສາມາດ ດ້ານວຽກງານຄົ້ນຄ້ວາ ເປັນຕົ້ນແມ່ນ ການສ້າງຄວາມອາດສາມາດ ໃຫ້ນັກວິໄຈໃຫກັບ ສະຖາບັນ ແລະ ບັນດານັກຄົ້ນຄ້ວາທັງໃນສູນກາງ ແລະ ທ້ອງຖິ່ນ ເພື່ອໃຫ້ສາມາດ ກາຍ ເປັນ ຜູ້ວິເຄາະ ແລະ ວິໄຈບັນຫາທາງດ້ານເສດຖະກິດ ແລະ ວຽກງານອຸດສາ ຫະກຳ ແລະ ການຄ້າໃຫ້ກັບ ການນຳກະຊວງ ກໍ່ຄືລັດຖະບານ
ກອງປະຊຸມຈະນຳໃຊ້ເວລາ 1 ມື້ ເຄີ່ງ ໃນການປຶກສາຫາລື, ສົນທະນາ ແລະ ປະກອບຄຳເຫັນໃຫ້ໄດ້ ຫຼາຍທີ່ສຸດ ເພື່ອຈະເຮັດໃຫ້ບົດຄົ້ນຄ້ວາທຸກໆຫົວບົດສາມາດບັຍລຸໄດ້ຈຸດປະສົງການສຶກສາ ແລະ ເພີ່ມເຕີມບາງຂໍ້ມູນທີ່ຂາດຫາຍ, ທີ່ສໍາຄັນ ທ່ານປະທານກອງປະຊຸມແມ່ນເໜັ້ນໃຫ້ເອົາໃຈໃສ່ບາງບັນຫາດັ່ງນີ້:
- ບັນດາຂໍ້ມູນທີ່ນຳມາສະເໝີ ແມ່ນຄົບຖ້ວນ, ຕິດພັນກັບຕົວຈິງ ແລະ ແທດເໝາະກັບສະພາບການຫຼືບໍ່ ຫຼື ຂໍ້ມູນນັ້ນເກົ່າ ຫຼື ໃໝ່ບໍ່
- ການວິເຄາະແມ່ນຖກຕ້ອງຕາມທິດສະດີ ແລະ ມີຄວາມເປັນໄປໄດ້ ຫຼື ຖືກຕ້ອງຕາມຕົວຈິງບໍ່?
- ການໃຫ້ຄຳສະເໝີແນະ ຫຼື ຄຳເຫັນຕໍ່ກັບສັງຄົມ ກໍ່ຄືລັດຖະບານ ແມ່ນສາມາດຜັນຂະຫຍາຍໄດ້ບໍ່? ສາມາດນຳໃຊ້ ເຂົ້າໃນການວາງແຜນ, ການວາງແຜນນະໂຍບາຍ ຫຼື ແທດເໝາະກັບບ້ານເຮົາບໍ່?
- ບົດຄົ້ນຄ້ວາທີ່ນຳສະເໝີໄປທັງໝົດນັ້ນ ໄດ້ຕິດພັນກັບວຽກງານທີ່ໄດ້ປະຕິບັດໃນທ້ອງຖິ່ນບໍ່?
ຫຼື ທ້ອງຖິ່ນສາມາດນຳເອົາໄປຜັນຂະຫຍາຍໄດ້ບໍ່? ທີ່ສໍາຄັນ ການຈັດກອງປະຊຸມວິຊາການຄັ້ງນີ້ແມ່ນເພື່ອການພັດທະນາອຸດສາຫະກໍາ ແລະ ຈະຊ່ອຍໃຫ້ລັດຖະບານໄດ້ວາງແຜນໃນການວາງແຜນລ່ວງຫນ້າ ແລະ ຄົ້ນຄວ້າ ຄວາມຫຍຸງຍາກຂອງທຸລະກິດ ໂດຍສະເພາະຄຸນນະພາບຂອງຜົນຜະລິດທີ່ບໍ່ຕອບສະຫນອງກັບຕະຫລາດ.
ໃນຄະນະດັ່ງກ່າວເຫັນດີເປັນເອກະພາບກັນໃນການລຽບລຽງເອກະສານຂອງກອງປະຊຸມຄືນໄຫມ່ ແລະ ປັບປຸງເນື້ອໃນບາງຢ່າງ ເພື່ອຈະໄດ້ເຮັດເປັນວາລະສານ ແລະ ລົງເວັບໄຊຂອງສະຖາບັນ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
