ໃນວັນທີ 5 ພຶດສະພາ 2017 ທີ່ຫ້ອງປະຊຸມໃຫຍ່ຂອງສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ໄດ້ຈັດພິທີເຊັນບົດບັນທຶກຮ່ວມມືແຮກສ່ຽວ ລະຫວ່າງຄະນະບໍລິຫານງານ ຊປປລ (ຊາວໜຸ່ມ ປະຊາຊົນ ປະຕິວັດ ລາວ) ກະຊວງການເງິນ ແລະ ຄະນະບໍລິຫານງານ ຊປປລ (ຊາວໜຸ່ມ ປະຊາຊົນ ປະຕິວັດ ລາວ) ກະຊວງອຸດສາຫະກຳ ແລະ ການຄ້າ (ອຄ) ຢ່າງເປັນທາງການ ໂດຍພາຍໃຕ້ການເປັນປະທານ ຂອງທ່ານ ໄຊສົມເພັດ ນໍລະສິງຫ໌ ເລຂາ ຊປປລ ກະຊວງອຸດສາຫະກໍາ ແລະ ການຄ້າ ພ້ອມດ້ວຍແຂກຜູ້ມີກຽດຮ່ວມເປັນສັກຂີພະຍານ
ເພື່ອເປັນການປຸກລະດົມທຸກກໍາລັງແຮງຂອງຊາວຫນຸ່ມ ເຂົ້າໃນການປະຕິບັດແນວທາງນະໂຍບາຍ ຂອງພັກ ແຜນພັດທະນາເສດຖະກິດ-ສັງຄົມຂອງລັດໃຫ້ສໍາເລັດຕາມຄາດຫມາຍ ເຮັດໃຫ້ການຈັດຕັ້ງຊາວໜຸ່ມແຕ່ລະຂັ້ນມີຄວາມເຂັ້ມແຂງ, ໜັກແໜ້ນ, ມີຄວາມສາມັກຄີອັນໜັກແໜ້ນຟົດຟື້ນປະຕິວັດ, ມີແບບແຜນວິທີເຮັດວຽກຢ່າງຖືກຕ້ອງມີຂະບວນການຟົດຟື້ນ ແລະ ມີປະສິດທິຜົນສູງ.
ຜ່ານການຕົກລົງເຫັນດີເປັນເອກະພາບກັນທັງ 2 ຄະນະບໍລິຫານງານ ຊປປລ ຫຼື ທັງ 2 ສ່ຽວໄດ້ຕົກລົງໃຫ້ຄຳໝັ້ນສັນຍາຈັບມືຖືແຂນກັນໃນການຮ່ວມມືກັນໃນໜ້າວຽກສຳຄັນດັ່ງນີ້:
ສອງສ່ຽວໄດ້ຕົກລົງຮ່ວມກັນຈັດກິດຈະກໍາເຄື່ອນໄຫວຂະບວນການກິລາຢ່າງໜ້ອຍ 2 ຄັ້ງ ຕໍ່ປີ, ສິນ ລະປະຢ່າງໜ້ອຍ 1 ຄັ້ງຕໍ່ປີ ເພື່ອເປັນການສ້າງມິດຕະພາບ ແລະ ຮັດແໜ້ນຄວາມສາມັກຄີ ລະຫວ່າງ 2 ກະຊວງ, ມີແລກປ່ຽນຈັດສຳມະນາ ເຊີນເຂົ້າຮ່ວມສຳມະນາພາຍໃນ ແລະ ຕ່າງປະເທດ, ຍົກລະດັບຄວາມອາດສາມາດຕາມຄວາມຮູ້ວິຊາສະເພາະ, ວິຊາການໃຫ້ແກ່ຊາວໜຸ່ມທັງສອງກະຊວງໃຫ້ມີຄວາມຮູ້, ຄວາມສາມາດ ທີ່ຕອບສະໜອງກັບຄວາມຮຽກຮ້ອງຕ້ອງການຂອງຫນ້າວຽກຂອງຕົນ ແລະ ເງື່ອນໄຂການເຊື່ອມໂຍງກັບພາກພື້ນ ແລະ ສາກົນ.
ນອກນີ້ຄະນະຊາວໜຸ່ມ ຊປປລ ກະຊວງການເງິນຍັງຈະສະໜອງຂໍ້ມູນທີ່ເປັນອັນຈຳເປັນໃຫ້ແກ່ຄະນະຊາວໜຸ່ມ ຊປປລ ກະຊວງອຸດສາຫະກຳ ແລະ ການຄ້າ ຄື:
1) ຂໍ້ມູນດ້ານນິຕິກຳທີ່ຢູ່ພາຍໃຕ້ການຄຸ້ມຄອງຂອງກະຊວງການເງິນ
2) ຂໍ້ມູນດ້ານພາສີ ທີ່ກ່ຽວກັບການພັດທະນາ ອຸດສາຫະກຳ ແລະ ການຄ້າ ໂດຍສະເພາະແມ່ນວຽກງານນຳເຂົ້າ ແລະ ສົ່ງອອກສິນຄ້າ
3) ຂໍ້ມູນດ້ານອາກອນ ທີ່ມີຜົນຕໍ່ການດຳເນີນດ້ານທຸລະກິດ
4) ຂໍ້ມູນດ້ານລະບຽບການກ່ຽວກັບການເງິນ.
- ຄະນະຊາວໜຸ່ມ ຊປປລ ກະຊວງອຸດສາຫະກໍາ ແລະ ການຄ້າ ມີຫນ້າທີ່ທີ່ຈະໄດ້ສະໜອງຂໍ້ມູນທີ່ຈຳເປັນ ໃຫ້ແກ່ຄະນະຊາວໜຸ່ມ ຊປປລ ກະຊວງການເງິນດັ່ງນີ້:
1) ຊໍ້ມູນດ້ານນິຕິກຳທີ່ຢູ່ພາຍໃຕ້ການຄຸ້ມຄອງຂອງກະຊວງອຸດສາຫະກຳ ແລະ ການຄ້າ
2) ຂໍ້ມູນທາງດ້ານການຄ້າເຂດພາກພື້ນ ແລະ ສາກົນ
3) ຂໍ້ມູນດ້ານຕົວເລກສະຖິຕິ ການນໍາເຂົ້າ ແລະ ສົ່ງອອກ
4) ຂໍ້ມູນດ້ານການຄຸ້ມຄອງລາຄາສິນຄ້າທີ່ມີຜົນກະທົບໄວຕໍ່ການດໍາລົງຊີວິດ
5) ຂໍ້ມູນດ້ານການສົ່ງເສີມວິສາຫະກິດຂະຫນາດນ້ອຍ ແລະ ກາງ
ຜ່ານການເຊັນບົດບັນທຶກຂອງຮອງເລຂາຄະນະບໍລິຫານງານ ຊປປລ ທັງ 2 ກະຊວງ ໄດ້ມີປະທານກໍ່ຄືເລຂາ ຊປປລ ກະຊວງ ອຄ ຈະໄດ້ນຳເອົາເນື້ອໃນບົດບັນທຶກທີ່ໄດ້ເຊັນກັນສະເໜີຂໍທິດຊີ້ນຳໃນການຈັດຕັ້ງປະຕິບັດຈາກຄະນະປະຈຳພັກກະຊວງຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນກະຊວງ ຮັບຊາບ ພ້ອມທັງບັນທຶກທິດຊີ້ນຳທັງ 2 ຄະນະພັກໄວ້ເປັນບ່ອນອີງ ຫລັງຈາກນັ້ນຈະເຮັດບົດລາຍງານຄະນະພັກຂອງຕົນຮັບຊາບໃນທ້າຍປີຂອງທຸກໆປີ, ທີ່ສໍາຄັນການຈັດຕັ້ງປະຕິບັດບັນດາກິດຈະກໍາທີ່ລະບຸໄວ້ແມ່ນອີງໃສ່ສະພາບ ແລະ ເງື່ອນໄຂຕົວຈິງທາງດ້ານງົບປະມານໃນແຕ່ລະປີ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ
