ຕອນບາ່ຍເວລາ 3: 00 ໂມງ ຂອງວັນທີ 24/05/2017 ທີ່ຫ້ອງປະຊຸມຊັ້ນ 3 ກະຊວງອຸດຫະກໍາ ແລະ ການຄ້າໄດ້ມີການພົບປະລະຫ່ວາງລັດຖະມົນຕີກະຊວງອຸດສາຫະກໍາ ແລະ ການຄ້າ ສປປ ລາວ ແລະ ລັດຖະມົນຕີກະຊວງພານິດໄທ ການພົບປະຄັ້ງນີ້ແມ່ນການຄົ້ນຄ້ວາປຶກສາຫາລືການຫາທາງອອກຂອງສິນຄ້າ, ການຂາຍ, ການເພີ່ມ ຕະຫຼາດ ອຸດສາຫະກໍາ ແລະ ການກະສິກໍາ ເປີດຕາມຊາຍແດນລະຫ່ວາງລາວ ແລະ ໄທ ເພື່ອອໍານວຍຄວາມສະດວກການຄ້າຂາຍທັງສອງປະເທດ.
ທັງສອງຝ່າຍໄດ້ປຶກສາຫາລືການນໍາເຂົ້າ-ສົ່ງອອກຊາຍແດນ, ດ່ານສາກົນ ດ່ານປະເພນີໃຫ້ມີຈຸດກະຈາຍສິນຄ້າເພີ່ມຂື້ນເພື່ອອໍານວຍຄວາມສະດວກໃຫ້ແກ່ພໍ່ແມ່ປະຊາຊົນທັງສອງຝ່າຍ ທໍາການຄ້າຂາຍຮ່ວມກັນຫຼາຍຂື້ນ, ນອກນັ້ນຍັງສະເໜີ ໃຫ້ກົມ SME, ກົມອຸດສາຫະກໍາ ກະຊວງອຸດຫະກໍາ ແລະ ການຄ້າ ສປປ ລາວ ແລະ ກົມເຈລະການຄ້າ ກະຊວງພານິດໄທ ຄົ້ນຄ້ວາຮ່ວມກັນເພື່ອແກ້ໄຂຫາຊ່ອງທາງອອກສິນຄ້າທັງສອງປະເທດໃຫ້ໄດ້ແລກປ່ຽນສິນຄ້າ, ຄ້າຂາຍຮ່ວມກັນລະຫ່ວາງລາວ-ໄທ.
ລາວສະເໜີຝ່າຍໄທ ຊຸກຍູ້ການຜັນຂະຫຍາຍການລົງນາມນະໂຍບາຍກະສິກຳແບບມີພັນທະສັນຍາ, ຊຸກຍູ້ນັກລົງທຶນຂອງໄທ (ລວມເຖິງຂະໜາດ SME) ເພື່ອເຂົ້າມາລົງທຶນ ແລະ ຮ່ວມທຸລະກິດ ໃນຂະແໜງອຸດສາຫະກຳປຸງແຕ່ງ ຈາກພືດກະສິກຳ ຢູ່ສປປ ລາວ, ຮ່ວມກັນສ້າງກົນໄກປະສານງານແກ້ໄຂບັນຫາການນຳເຂົ້າ ແລະ ສົ່ງອອກ ສະເພາະລະຫວ່າງສອງກະຊວງ ໃນຂັ້ນຫົວໜ້າຫ້ອງການ, ກົມກ່ຽວຂ້ອງ ເພື່ອສົ່ງເສີມມູນຄ່າການຄ້າສອງຝ່າຍໃຫ້ຫຼາຍຂຶ້ນ ແລະ ກ້າວໄປເຖິງການສ້າງຖານຜະລິດດຽວ Production Based Program ທີ່ມີການຮ່ວມລົງທຶນຂອງທຸລະກິດສອງຝ່າຍຢູ່ລາວ.
ເຂົ້າຮ່ວມພົບປະຝ່າຍລາວນໍາໂດຍ ທ່ານ ນ. ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສປປ ລາວ, ພ້ອມດ້ວຍຫົວໜ້າກົມ, ຮອງກົມ, ຫົວໜ້າພະແນກ ແລະ ວິຊາການທີ່ກ່ຽວຂ້ອງເຂົ້າຮ່ວມ. ແລະ ຝ່າຍໄທນໍາໂດຍທາ່ນ ນ. ອະພິລະດີ ຕັນຕະກອນ ລັດຖະມົນຕີກະຊວງພານິດໄທ ແລະ ທ່ານ ອຸດຕົມ ສາວນາຍົນ ລັດຖະມົນຕີ ກະຊວງອຸດສາຫະກໍາໄທ ພ້ອມດ້ວຍຄະນະທັງສອງຝ່າຍເຂົ້າຮ່ວມປະມານ 20 ກ່ວາທ່ານ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
