ໃນລະຫວ່າງວັນທີ 20 – 23 ມີຖຸນາ 2017 ທີ່ຜ່ານມານີ້ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ໄດ້ຈັດກອງປະຊຸມປັບປຸງປົວແປງພັກ ພາຍໃນໜ່ວຍພັກພະແນກອຸດສາຫະກຳ ແລະ ການຄ້າຂຶ້ນຢ່າງເປັນທາງການໂດຍການເປັນປະທານ ຂອງທ່ານ ຄຳພຽນ ຢາຈົງວາ ຮອງເລຂາພັກແຂວງ, ຮອງເຈົ້າແຂວງ ເຂົ້າຮ່ວມມີທ່ານ ຄຳເພົ້າ ສີລິສຸກ ກຳມະການພັກແຂວງເລຂາໜ່ວຍພັກ ຫົວໜ້າພະແນກອຸດສາຫະກຳ ແລະ ການຄ້າແຂວງ ມີຄະນະພັກ, ສະມາຊິກພັກພາຍໃນພະແນກອຸດສາຫະກຳ ແລະ ການຄ້າ ເຂົ້າຮ່ວມທັງໝົດຈຳນວນ 30 ສະຫາຍ, ຍິງ 06 ສະຫາຍ.
ໃນວາລະດຳເນີນປັບປຸງປົວແປງພັກໃນຄັ້ງນີ້ ກອງປະຊຸມກໍ່ໄດ້ຮັບຟັງການເຜີຍແຜ່ເອກະສານທີ່ສຳຄັນກ່ຽວກັບວຽກງານພັກເປັນຕົ້ນ ຄຳສັ່ງ ຂອງກົມການເມືອງສູນກາງພັກເລກທີ 01/ກມສພ, ລົງວັນທີ 01 ກຸມພາ 2017 ວ່າດ້ວຍການດຳເນີນຊີວິດປັບປຸງປົວແປງທົ່ວພັກປີ 2017 ແລະ ເອກະສານທີ່ກ່ຽວຂ້ອງອື່ນໆ. ເພື່ອໃຫ້ບັນດາສະມາຊິກພັກໄດ້ເຊື່ອມຊຶມ, ກຳແໜ້ນ ແລະ ມີຄວາມເປັນເອກະພາບສູງກ່ຽວກັບຄວາມສຳຄັນ, ຄວາມຈຳເປັນ ແລະ ວິທີການຈັດຕັ້ງປະຕິບັດໃຫ້ເລິກເຊີ່ງ ເພື່ອນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ມີປະສິດທິຜົນສູງ. ຈາກນັ້ນກໍ່ໄດ້ຜ່ານບົດສຳຫຼວດການນຳພາລວມຂອງໜ່ວຍພັກພາຍໃນພະແນກອຸດສາຫະກຳ ແລະ ການຄ້າໃນໄລຍະປີເຄິ່ງ ເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງໃນການຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VIII ຂອງແຂວງ ແລະ ມະຕິກອງປະຊຸມໃຫຍ່ຄັ້ງທີ XIV ຂອງໜ່ວຍພັກພະແນກອຸດສາຫະກຳ ແລະ ການຄ້າຜ່ານມາ ແລະ ທິດທາງແຜນການຈຸດສຸມໃນຕໍ່ໜ້າ. ຈາກນັ້ນກອງປະຊຸມໄດ້ແບ່ງໜ່ວຍເພື່ອດຳເນີນການສຳຫຼວດກວດກາຕິຊົມຕົນເອງ, ຕິຊົມຊຶ່ງກັນ ແລະ ກັນພາຍໃນໜ່ວຍພັກ ເຊິ່ງບັນດາສະມາຊິກພັກກໍ່ໄດ້ຜ່ານໃບສຳຫຼວດຂອງຕົນເອງ ແລະ ມີການປະກອບຄຳຄິດເຫັນ, ຕຳນິສົ່ງຂ່າວເພື່ອກໍ່ສ້າງຊ່ວຍເຫຼືອຊຶ່ງກັນ ແລະ ກັນ ໂດຍສະເພາະເພື່ອເສີມຂະຫຍາຍດ້ານດີ ແລະ ປັບປຸງແກ້ໄຂດ້ານອ່ອນຂໍ້ຄົງຄ້າງ ໃນການຈັດຕັ້ງປະຕິບັດໜ້າທີ່ວຽກງານໃນໄລຍະປີເຄິ່ງທີ່ຜ່ານມາ ຂອງແຕ່ລະສະຫາຍ, ເພື່ອຊອກຫາວິທີການແກ້ໄຂໃນຕໍ່ໜ້າໃຫ້ດີຂຶ້ນເທື່ອລະກ້າວ. ກອງປະຊຸມປັບປຸງປົວແປງພັກປະຈຳປີ 2017 ໄດ້ດໍາເນີນໄປເປັນເວລາ 3 ວັນ ກໍ່ໄດ້ອັດລົງດ້ວຍຜົນສຳເລັດອັນຈົບງາມ.
ຂຽນໂດຍ: ຄຳຝັ້ນ ພາວິວົງກອນ
