ໃນຕອນເຊົ້າຂອງວັນທີ 29 ມິຖຸນາ 2017 ທີ່ສູນການຄ້າລາວ-ໄອເຕັກ ໄດ້ເປິດພິທີງານວາງສະແດງສິນຄ້າ ລາວ- ຫວຽດນາມ ຄັ້ງທີ 10 ປະຈໍາປີ 2017 ຂຶ້ນຢ່າງເປັນທາງການ ໂດຍການໃຫ້ກຽດເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ; ມີບັນດາແຂກທີ່ເຂົ້າຮ່ວມເຊັ່ນ: ທ່ານ ສອນໄຊ ສີພັນດອນ, ກຳມະການກົມການເມືອງສູນກາງພັກປະຊາຊົນປະຕິວັດລາວ ຮອງນາຍົກລັດຖະມົນຕີແຫ່ງ ສປປ ລາວ, ທ່ານ ພັນຕີ ແອສະໄຫມ ເລືອງວັນໄຊ, ຮອງລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ, ທ່ານ ພົນໂທ ເຈິ່ນເດີນ ກໍາມະການສູນກາງພັກຄອມມູນິດຫວຽດນາມ, ຮອງລັດຖະມົນຕີກະຊວງປ້ອງກັນປະເທດແຫ່ງ ສສ ຫວຽດນາມ, ທ່ານ ຫງ້ຽນ ແທ໋ງ ຕຸ່ງ ທີ່ປຶກສາເອກອັກຄະລັດຖະທູດແຫ່ງ ສສ ຫວຽດນາມ ປະຈໍາ ສປປ ລາວ, ທ່ານ ເຈິ່ນ ກວກ ແຂ໋ງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສສ ຫວຽດນາມ, ອົງການຈັດຕັ້ງສາກົນ ຜູ້ຕາງຫນ້າສະຖານເອກອັກຄະລັດຖະທູດຕ່າງປະເທດປະຈໍາລາວ ແລະ ພ້ອມດ້ວຍບັນດາທ່ານ ຫົວຫນ້າຫ້ອງການ, ຫົວຫນ້າກົມ, ຮອງກົມ, ຄະນະພະແນກ ຈາກກະຊວງ, ແຂວງ ແລະ ຜູ້ປະກອບການ ທັງພາຍໃນລາວ ແລະ ສສ ຫວຽດນາມ.
ທ່ານ ປະທານ ໄດ້ກ່າວສະແດງຄວາມປື້ມປິຕິຍິນດີຕ້ອນຮັບຢ່າງອົບອຸ່ນ ຕໍ່ສະຫາຍສອນໄຊ ສີພັນດອນ ກໍາມະການກົມການເມຶອງສູນກາງພັກປະຊາຊົນປະຕິວັດລາວ ຮອງນາຍົກລັດຖະມົນຕີແຫ່ງ ສປປ ລາວ ແລະ ຄະນະຜູ້ແທນຈາກກະຊວງປ້ອງກັນປະເທດ ແລະ ກະຊວງອຸດສາຫະກໍາ ແລະ ການຄ້າແຫ່ງ ສສ ຫວຽດນາມ, ເຊິ່ງນໍາໂດຍສະຫາຍ ເຈີ່ນເດີນ ແລະ ກໍາມະການສູນກາງພັກຄອມມູນິດຫວຽດນາມ, ຮອງລັດຖະມົນຕີກະຊວງປ້ອງກັນປະເທດ ແລະ ສະຫາຍ ເຈີ່ນກວກແຂ໋ງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າແຫ່ງ ສສ ຫວຽດນາມ ພ້ອມດ້ວຍຄະນະທີ່ໃຫ້ກຽດເຂົ້າຮ່ວມງານວາງສະແດງສິນຄ້າ ລາວ-ຫວຽດນາມ ຄັ້ງທີ 10 ປະຈໍາປີ 2017. ໃນໂອກາດນີ້ ກໍສະແດງຄວາມຊົມເຊີຍ ແລະ ຍິນດີຕ້ອນຮັບຢ່າງສຸດໃຈ, ພ້ອມນີ້ຂໍສະແດງຄວາມຍິນດີຕ້ອນຮັບແຂກທີ່ມີກຽດຈາກອົງການຈັດຕັ້ງສາກົນ, ບັນດາທ່ານຜູ້ຕາງໜ້າຈາກກະຊວງ, ບັນດາແຂວງ ແລະ ພາກທຸລະກິດຂອງສອງປະເທດເຂົ້າຮ່ວມພິທີເປີດງານໃນຄັ້ງນີ້.
ໃນທ່າມກາງທີ່ປວງຊົນລາວທົ່ວປະເທດ ກໍາລັງສຸມໃສ່ເພື່ອຈັດຕັ້ງຜັນຂະຫຍາຍມະຕິ X ຂອງພັກ ແລະ ລັດຖະບານ, ໃນປະຈຸບັນ ພັກ-ລັດ ໄດ້ເອົາໃຈໃສ່ໃນການພັດທະນາເສດຖະກິດ-ສັງຄົມ ເປົ້າໝາຍການແກ້ໄຂຄວາມທຸກຍາກຂອງປະຊາຊົນ ແລະ ເພື່ອບັນລຸຜົນໃຫ້ຫລຸດພົ້ນອອກຈາກປະເທດດ້ອຍພັດທະນາຢ່າງສິ້ນເຊີງໃນປີ 2020. ໂດຍຕິດພັນກັບວຽກງານການຮ່ວມມືກັບຄຸ່ຮ່ວມຍຸດທະສາດຮອບດ້ານ ລາວ-ຫວຽດນາມ ໂດຍສະເພາະປີນີ້ປະຊາຊົນສອງຊາດ ລາວ-ຫວຽດນາມ ສະເຫຼີມສະຫຼອງສອງປີສາມັກຄີມິດຕະພາບ ລາວ-ຫວຽດນາມ 2017 ເຊັ່ນ: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ (18 ກໍລະກົດ 1977 – 18 ກໍລະກົດ 2017) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ (5 ກັນຍາ 1962 – 5 ກັນຍາ 2017) ໂດຍມີຈຸດປະສົງເພື່ອທົບທວນຄືນມູນເຊື້ອ ແຫ່ງການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ເປັນປັດໄຈພື້ນຖານອັນໜຶ່ງໃນການຕັດສິນໄຊຊະນະ ຂອງການປະຕິວັດຂອງສອງປະເທດ, ທັງເປັນການສຶກສາອົບຮົມພະນັກງານ, ນັກຮົບ ແລະ ປະຊາຊົນບັນດາເຜົ່າທົ່ວປະເທດ ໃຫ້ຮັບຮູ້ເຖິງສອງວັນສຳຄັນດັ່ງກ່າວ.
ງານວາງສະແດງຄັ້ງນີ້ມີຫ້ອງວາງສະແດງທັງຫມົດ 320 ຫ້ອງ ໃນນັ້ນ 120 ຫ້ອງແມ່ນຜູ້ປະກອບການທຸລະກິດມາຈາກ ຫວຽດນາມ ແລະ 200 ຫ້ອງແມ່ນຫົວໜ່ວຍທຸລະກິດ ຂອງລາວ, ປະເພດສິນຄ້າທີ່ເອົາມາວາງສະແດງສ່ວນໃຫຍ່ ແມ່ນເຄື່ອງໃຊ້ໄຟຟ້າ, ວັດສະດຸກໍ່ສ້າງ, ກົນຈັກການກະເສດ, ເຄື່ອງອຸປະໂພກ-ບໍລິໂພກ, ສິນຄ້າໂອດ໊ອບ ແລະ ອື່ນໆ;
ນອກນີ້ພາຍໃນງານຍັງມີພິທີເປີດໂຕເວັບໄຊ໌ການຄ້າ ລາວ-ຫວຽດນາມ www.vietlaotrade.com ເຊິ່ງເວັບໄຊ໌ນີ້ຈະເປັນເຄື່ອງມືຫນຶ່ງທີ່ຊ່ວຍໃຫ້ການເຜີຍແຜ່ຂໍ້ມູນ ກ່ຽວກັບການຮ່ວມມືຮອບດ້ານ ເສດຖະກິດ ແລະ ການຄ້າຂອງສອງປະເທດ ໃຫ້ມີລະບົບຄົ້ນຫາຂໍ້ມູນທີ່ສະດວກ ມີຖານຂໍ້ມູນທາງດ້ານນິຕິກໍາ, ລະບຽບການ ແລະ ສັນຍາດ້ານການຄ້າລາວ-ຫວຽດນາມ.
[ພາບ ແລະ ຂ່າວໂດຍ: ຂະແໜງຂ່າວສານ]
