ວັນທີ 3 ກໍລະກົດ 2017 ນີ້ຮາກຖານພັກພະແນກອຸດສາຫະກຳ ແລະ ການຄ້າ ແຂວງ ຄຳມ່ວນ ໄດ້ເປີດບັ້ນດຳເນີນຊີວິດການເມືອງປັບປຸງປົວແປງພັກຂຶ້ນ ໂດຍການເປັນກຽດເຂົ້າຮ່ວມຂອງ ສະຫາຍ ບຸນມີ ພິມມະສອນ ຮອງເລຂາພັກແຂວງ, ຮອງເຈົ້າແຂວງ ແຂວງ ຄຳມ່ວນ, ມີບັນດາສະຫາຍໃນຄະນະພັກ ຕະຫລອດເຖິງສະມາຊິກພັກພາຍໃນພະແນກເຂົ້າຮ່ວມ.
ບັ້ນດຳເນີນຊີວິດການເມືອງປັບປຸງປົວແປງພັກຄັ້ງນີ້ ສະຫາຍ ທອງໄຊ ມັງໝໍ່ເມກ ເລຂາຄະນະພັກຮາກຖານ ຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ກ່າວຈຸດປະສົງຂອງກອງປະຊຸມແມ່ນເພື່ອປັບປຸງແກ້ໄຂທັດສະນະແນວຄິດ ອັນບໍ່ຖືກຕ້ອງທັງໝົດຂອງສະມາຊິກພັກໃນທົ່ວຮາກຖານ ໂດຍເລີ່ມຈາກບັນສະຫາຍສະມາຊິກພັກ – ພະນັກງານຂົງເຂດ ຕົນເອງຮັບຜິດຊອບ ທັງເພື່ອເສີມຂະຫຍາຍມູນເຊື້ອຜົນງານທີ່ເຮັດໄດ້ໃນໄລຍະຜ່ານມາ ແລະ ກໍ່ເປັນການຍົກລະດັບຄວາມຮູ້, ຄວາມສາມາດນຳພາ – ຄຸ້ມຄອງ, ກວດກາຕີລາຄາຄືນ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນວິທີນຳພາ, ວິທີເຮັດວຽກ, ແບບແຜນດຳລົງຊີວິດ ຄວາມເປັນແບບຢ່າງນຳໜ້າຂອງຄະນະພັກ, ເພື່ອໃຫ້ຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍເຊື່ອມຊຶມກຳແໜ້ນ ຢ່າງເລິກເຊິ່ງຕໍ່ແນວທາງ ແລະ ມະຕິ, ຄຳສັ່ງຂອງພັກ, ຍົກສູງຄວາມຮັບຜິດຊອບການເມືອງຂອງຄະນະພັກ, ສະມາຊິກພັກແຕ່ລະສະຫາຍໃຫ້ສູງຂຶ້ນ ແນໃສ່ປັບປຸງຄຸນທາດການເມືອງ ຄຸນສົມບັດສິນທຳປະຕິວັດ, ປັບປຸງແບບແຜນນຳພາ ແລະ ວິທີເຮັດວຽກພາຍໃນພັກພວກເຮົາໃຫ້ເຂັ້ມງວດ, ກຳແໜ້ນວຽກງານກໍ່ສ້າງພັກ, ຫຼັກການຕຳນິຕິຊົມຕົນເອງ – ຕິຊົມໝູ່ເພື່ອນ, ສ້າງໃຫ້ໄດ້ຈິດໃຈຮັກຊາດ ແລະ ເສຍສະຫຼະເພື່ອຜົນປະ ໂຫຍດສ່ວນລວມ, ຖືເອົາຜົນປະໂຫຍດສ່ວນລວມເປັນສິ່ງຊຸກຍູ້ໃຫ້ແກ່ການສ້າງ ແລະ ຍົກສູງຄວາມສາມາດນຳພາຂອງຄະນະພັກ ແຕ່ລະຂັ້ນ. ບັ້ນດຳເນີນຊີວິດການເມືອງປັບປຸງປົວແປງພັກຄັ້ງນີ້ແມ່ນຈະໄດ້ດຳເນີນໄປເປັນເວລາ 5 ວັນ ຈິ່ງຈະສຳເລັດ. ປະຈຸບັນຮາກຖານພັກພະແນກອຸດສາຫະກຳ ແລະ ການຄ້າແຂວງ ແມ່ນມີ 3 ໜ່ວຍພັກທີ່ຂຶ້ນກັບຄື : ໜ່ວຍພັກວິຊາການ, ໜ່ວຍພັກບໍລິຫານ ແລະ ໜ່ວຍພັກລັດວິສາຫະກິດນ້ຳມັນເຊຶ້ອໄຟ, ມີສະມາຊິກພັກທັງໝົດ 67 ສະຫາຍ, ຍິງ 16 ສະຫາຍ.
ຂ່າວ : ມະນີວັນ
ຮຽບຮຽງໂດຍ: ຂະແໜງຂ່າວສານ
