ຕອນບ່າຍ ເວລາ 13: 30 ໂມງ ຂອງວັນທີ 16 ສິງຫາ 2017 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຮັບຕ້ອນການຢ້ຽມຂໍ່ານັບ ຂອງທ່ານ Mohd Aini Atan ເອກອັກຄະລັດຖະທູດຜູ້ມີອຳນາດເຕັມ ແຫ່ງ ປະເທດມາເລເຊຍ ປະຈໍາ ສປປ ລາວຄົນໃໝ່ ເນື່ອງໃນໂອກາດທີ່ໄດ້ດຳລົງຕຳແໜ່ງໃໝ່.
ການເຂົ້າຢ້ຽມໃນຄັ້ງນີ້ ແມ່ນເພື່ອຕິດຕາມຜົນໃນບັນຫາ ທີ່ກ່ຽວຂ້ອງກັບຜົນການປະຊຸມ Business Forum ມາເລເຊຍ ແລະ ສປປ ລາວ ຊຶ່ງໄດ້ຈັດຂຶ້ນທີ່ ກົວລາລຳເປີ ປະເທດມາເລເຊຍ ໃນວັນທີ 9 ພຶດສະພາ 2017 ຜ່ານມາ, ພ້ອມທັງປຶກສາຫາລື ການຮ່ວມມືຂອງປະຊາຊົນສອງປະເທດ, ການເສີມຂະຫຍາຍສາຍພົວພັນການຄ້າ , ການລົງທຶນລະຫວ່າງສອງປະເທດ ແລະ ກົນໄກການປະສານງານ ລະຫວ່າງສອງຝ່າຍໃຫ້ມີການຈັດຕັ້ງປະຕິບັດໃຫ້ເກີດຜົນເປັນຈິງ;
ເຂົ້າຮ່ວມພົບປະຈາກຝ່າຍລາວ ນໍາໂດຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຂອງ ສປປ ລາວ ພ້ອມດ້ວຍ ຮອງຫົວໜ້າຫ້ອງການ, ຫົວໜ້າພະແນກ ແລະ ວິຊາການທີ່ກ່ຽວຂ້ອງ, ພ້ອມທັງຄະນະຈາກຝ່າຍມາເລເຊຍ ຈຳນວນ 7 ທ່ານ;
ທ່ານ ລັດຖະມົນຕີ ກ່າວຍິນດີຕ້ອນຮັບ ທ່ານເອກອັກຄະລັດຖະທູດມາເລເຊຍ ປະຈໍາ ສປປ ລາວ ຄົນໃໝ່, ຊົມເຊີຍການໃຫ້ຄວາມຮ່ວມມື ເປັນຢ່າງດີ ຂອງຝ່າຍມາເລເຊຍ
ແລະ ອວຍພອນໄຊໃຫ້ມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ ການງານທີ່ທ່ານດຳລົງຕຳແໜ່ງຢູ່ ສປປ ລາວ ແລະ ສຸດທ້າຍ, ທ່ານ ເອກອັກຄະລັດຖະທູດມາເລເຊຍ ກໍ່ສະແດງຄວາມຂອບໃຈມາຍັງ ທ່ານລັດຖະມົນຕີ ກະຊວງ ອຄ ຂອງລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ.
[ພາບ ແລະ ຂ່າວ: ຂະແໜງຂ່າວສານ]
