ທ່ານ ນາງ ພະນົມພອນ ລ່ຽມພະບູ ປະທານບໍລິສັດພະນົມພອນການຄ້າຂາອອກ – ຂາເຂົ້າຈຳກັດຜູ້ດຽວ, ທັງເປັນຮອງປະທານນັກທຸລະກິດໜຸ່ມ, ນັກທຸລະກິດຍິງ ຂອງແຂວງຄຳມ່ວນ ໄດ້ໃຫ້ສຳພາດຕໍ່ນັກຂ່າວທ້ອງຖິ່ນເນື່ອງໃນໂອກາດວັນທີ 8 ມີນາ ວັນແມ່ຍິງສາກົນທີ່ຈະມາເຖິງໃນໝໍ່ໆ ນີ້ວ່າ : ໃນນາມທີ່ເປັນຜູ້ປະກອບການດ້ານການຄ້າ ແລະ ປະສົບຜົນສຳເລັດຂອງການດຳເນີນທຸລະກິດແຖວໜ້າຂອງແຂວງ, ທາງຄອບຄົວກໍ່ເຮັດໄດ້ດີ. ກ່ຽວກັບການດຳເນີນທຸລະກິດ ຂອງຕົນນອກຈາກບໍລິສັດພະນົມພອນການຄ້າຂາອອກ – ຂາເຂົ້າແລ້ວ ໃນ 1 ປີຜ່ານມາເຫັນໄດ້ວ່າມີທ່າກ້າວຂະຫຍາຍຂຶ້ນເລື້ອຍໆ ເຊັ່ນ : ໂຄງການສ້າງຕະຫລາດພະນົມພອນ ບ້ານເລົ່າໂພໄຊ ແມ່ນສຳເລັດເປັນທີ່ຮຽບຮ້ອຍລໍຖ້າແຕ່ມື້ເປີດຢ່າງເປັນທາງການ, ອີກທຸລະກິດໜຶ່ງແມ່ນພວມດຳເນີນເຮັດທຸລະກິດສູນການຄ້າຂະໜາດໃຫຍ່ພະນົມພອນ NPZ ຢູ່ເຂດເສດຖະກິດສະເພາະ ສົ້ນຂວາມິດຕະພາບ ( ຄຳມ່ວນ – ນະຄອນພະນົມ ) ເຊິ່ງວ່າຈະເປີດຕົວຂາຍໃນວັນທີ 3 ມີນາ 2018 ນີ້ ທັງສອງໂຄງການແມ່ນມີມູນຄ່າຫລາຍກວ່າ 100 ຕື້ກີບ, ສ່ວນສາເຫດທີ່ປະສົບສຳເລັດນັ້ນແມ່ນຍ້ອນພັກ – ລັດ ກໍ່ຄືອຳນາດການປົກຄອງຂອງແຂວງໄດ້ໃຫ້ການອຸປະຖຳຄໍ້າຊູດ້ວຍດີຕະຫລອດມາ ເປັນຕົ້ນກໍ່ແມ່ນໄດ້ຊີ້ນຳກ່ຽວກັບທຸລະກິດໃຫ້ເດີນແມ່ນແລ່ນສະດວກ, ສົ່ງເສີມຕາມແນວທາງເຊັ່ນ : ຫລຸດອາກອນກຳໄລໃຫ້ ແລະ ອື່ນໆ ແລະ ສ່ວນໜຶ່ງກໍ່ຍ້ອນຄອບຄົວໃຫ້ການສະໜັບສະໜູນ, ສ່ວນຜົນງານທີ່ພົ້ນເດັ່ນຂອງຕົນ ແມ່ນດຳເນີນທຸລະກິດຖືກຕ້ອງຕາມລະບຽບກົດໝາຍ ພ້ອມທັງປະກອບສ່ວນເສຍພັນທະໃຫ້ລັດຖະບານຢ່າງຕັ້ງໜ້າ ແລະ ສ້າງວຽກເຮັດງານທຳໃຫ້ແກ່ປະຊາຊົນລາວຫລາຍກວ່າ 70 ຄົນ. ໃນຕໍ່ໜ້າທາງບໍລິສັດຈະປັບປຸງລະບົບຄວາມຮູ້ຂອງພະນັກງານ ໂດຍສະເພາະຄວາມຮູ້ທາງດ້ານໄອທີໃຫ້ເທົ່າທຽມກັບສາກົນ ແລະ ດຳເນີນໄປຢ່າງຖືກຕ້ອງຕາມກົດໝາຍ. ສະເພາະບັນຫາຂໍ້ສະດວກແມ່ນມີຫລາຍໂດຍສະເພາະແມ່ນດ້ານມະຫາພາກເພີ່ນຊ່ວຍແກ້ໄຂເດີນຕາມແນວທາງຂອງພັກ-ລັດ, ສ່ວນຂໍ້ຫຍຸ້ງຍາກແມ່ນບຸກຄະລາກອນຄວາມຮູ້ຍັງບໍ່ທັນໄດ້ດີ ໂດຍສະເພາະທາງດ້ານໄອທີ ແລະ ດ້ານແຮງງານບໍ່ໜັ້້ນຄົງ, ສ່ວນເງິນເດືອນແມ່ນອີງຕາມພັກ – ລັດວາງອອກ.
ເນື່ອງໃນໂອກາດວັນທີ 8 ມີນາ ທີ່ຈະມາເຖິງນີ້ຂ້າພະເຈົ້າມີຄວາມຮູ້ສຶກດີໃຈຫລາຍ ທີ່ແມ່ຍິງໄດ້ມີວັນແມ່ຍິງ ແລະ ມີສິດສະເໝີພາບເທົ່າກັບເພດຊາຍ, ຂໍຖືໂອກາດອວຍພອນມາຍັງແດ່ການນຳພັກ – ລັດ ໂດຍສະເພາະພະນັກງານຂັ້ນນຳທີ່ເປັນແມ່ຍິງຂໍໃຫ້ປະສົບຜົນສຳເລັດໃນໜ້າທີ່ການງານ, ສຸຂະພາບເຂັ້ມແຂງໆ ແຮງ ແລະ ຮຽກຮ້ອງມາຍັງບັນດາແມ່ຍິງທຸກຄົນບໍ່ໃຫ້ທໍ້ຖອຍເພາະປະຈຸບັນພັກ – ລັດ ເຮົາໃຫ້ສິດເທົ່າທຽມກັບເພດຊາຍເຊັ່ນ : ບຸກຄະລາກອນຕ່າງໆ ແມ່ນມີແມ່ຍິງປະກອບສ່ວນເຂົ້າໃນການສ້າງສາພັດທະນາເປັນສ່ວນຫລາຍ ສະແດງອອກໄດ້ແມ່ຍິງເຮົາຫລາຍຄົນໄດ້ບັນຈຸເຂົ້າໃນ ການຈັດຕັ້ງສາມາດເປັນລັດຖະມົນຕີ, ຫົວໜ້າຂະແໜງຕ່າງໆ ແລະ ກໍ່ເປັນນັກທຸລະກິດຍິງທີ່ເປັນສ່ວນຫລາຍ.
[ຂ່າວ : ມະນີວັນ]
[ຮຽບຮຽງໂດຍ: ນ ຖື]
