ໃນວັນທີ 02 ມີນາ 2018 ກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ໄດ້ເປັນເຈົ້າພາບຈັດກອງປະຊຸມສຳມະນາການເຊື່ອມໂຍງເສດຖະກິດກັບສາກົນ: ການເຜີຍແຜ່ສັນຍາວ່າດ້ວຍການເພີ່ມທະວີການຮ່ວມມືດ້ານເສດຖະກິດ ແລະ ການຄ້າຊາຍແດນ ລະຫວ່າງ ສປປ ລາວ ແລະ ສປ ຈີນ ຢູ່ທີ່ ສະໂມສອນຫ້ອງວ່າການປົກຄອງ ແຂວງຫຼວງນໍ້າທາ ໂດຍການເປັນປະທານຮ່ວມຂອງ ທ່ານ ສັນຕິສຸກ ພູນສະຫວັດ, ຮອງຫົວໜ້າກົມນະໂຍບາຍການຄ້າຕ່າງປະເທດ ແລະ ທ່ານ ວັນທາ ພົມວິໄລ, ຮັກສາການຫົວໜ້າພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາ.

       ກອງປະຊຸມໄດ້ແນໃສ່ການເຜີຍແຜ່ ກ່ຽວກັບວຽກງານການເຊື່ອມໂຍງເສດຖະກິດສາກົນ ຊຶ່ງເປັນໜຶ່ງໃນສາມແຜນງານຫຼັກປີ 2018 ຂອງກະຊວງອຸດສາຫະກໍາ ແລະ ການຄ້າ ຄື: ການເຊື່ອມໂຍງເສດຖະກິດສາກົນ, ການສ້າງສະພາບແວດລ້ອມທາງດ້ານເສດຖະກິດເອື້ອອຳນວຍໃຫ້ກັບພາກທຸລະກິດ ແລະ ການສ້າງຄວາມເຂັ້ມແຂງໃຫ້ກັບພາກທຸລະກິດ ເພື່ອຮອງຮັບກັບການແຂ່ງຂັນ ຊຶ່ງຈຸດປະສົງຂອງກອງປະຊຸມຄັ້ງນີ້ ແມ່ນເນັ້ນໜັກການສ້າງຄວາມເຂົ້າໃຈໃຫ້ພາກລັດ ແລະ ພາກທຸລະກິດ ກ່ຽວກັບການເຊື່ອມໂຍງກັບສາກົນຂອງ ສປປ ລາວ, ການພົວພັນການຄ້າສອງຝ່າຍ ແລະ ເນື້ອໃນຂອງສັນຍາວ່າດ້ວຍການເພີ່ມທະວີການຮ່ວມມືດ້ານເສດຖະກິດ ແລະ ການຄ້າຊາຍແດນ ລະຫວ່າງ ສປປ ລາວ ແລະ ສປ ຈີນ ທີ່ໄດ້ລົງນາມໃນວັນທີ 28  ພະຈິກ 2016.

     ກອງປະຊຸມຄັ້ງນີ້ມີຜູ້ເຂົ້າຮ່ວມຈາກ 3 ແຂວງພາກເໜືອ ທີ່ມີຊາຍແດນຕິດກັບ ສປ ຈີນ ຄື: ແຂວງຫຼວງນໍ້າທາ, ແຂວງຜົ້ງສາລີ ແລະ ແຂວງອຸດົມໄຊ  ຊຶ່ງມາຈາກຫ້ອງວ່າການແຂວງ, ພະແນກການເງິນ, ພະແນກອຸດສາຫະກໍາ ແລະ ການຄ້າ, ພະແນກກະສິກຳ ແລະ ປ່າໄມ້, ພະແນກສາທາລະນະສຸກ, ພະແນກໂຍທາທິການ ແລະ ຂົນສົ່ງ, ບັນດາເຈົ້າເມືອງ, ຮອງເຈົ້າເມືອງ, ຫ້ອງການອຸດສາຫະກໍາ ແລະ ການຄ້າເມືອງ ແລະ ພາກທຸລະກິດ ເຂົ້າຮ່ວມ ຫລາຍກວ່າ 80 ທ່ານ.

[ແຫຼ່ງຂ່າວ: ກົມນະໂຍບາຍການຄ້າຕ່າງປະເທດ]

[ຮຽບຮຽງໂດຍ: ນ ຖື]