ໃນຕອນເຊົ້າຂອງວັນທີ 14 ມິຖຸນາ 2018 ທີ່ຫ້ອງປະຊຸມພະແນກອຸດສາຫະກໍາ ແລະ ການຄ້າ ແຂວງສະຫວັນນະເຂດ ໄດ້ເປີດກອງປະຊຸມປຶກສາຫາລືໃສ່ບັນດາຮ່າງນະໂຍບາຍ ແລະ ມາດຕະການຮັກສາສະຖຽນລະພາບລາຄາສິນຄ້າຂອງບາງພືດເສດ ຖະກິດຂອງລາວ ໂດຍການເປັນປະທານ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອປຶກສາຫາລືໃສ່ບັນດາຮ່າງນະໂຍບາຍ ແລະ ມາດຕະການຮັກສາສະຖຽນລະພາບລາຄາສິນຄ້າຂອງບາງພືດເສດຖະກິດຂອງລາວ ທີ່ຢູ່ພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄ້ຳປະກັນສະບຽງອາ ຫານແຫ່ງຊາດ ແລະ ມີຄວາມໝາຍສຳຄັນເປັນຢ່າງຍິ່ງ ເພາະເປັນການຜັນຂະຫຍາຍມະຕິ 10 ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແຫ່ງລັດ (ແຜນ 8) ພ້ອມດຽວກັນນັ້ນພວກເຮົາກຳລັງຂຸ້ນຂ້ຽວໃນການກະກຽມສະຫຼຸບກາງສະໄໝ ຂອງການຈັດຕັ້ງປະຕິບັດແຜນພັດທະນາ.
ສະພາບການປັດຈຸບັນການຜັນແປໄປຢ່າງສັບສົນຂອງສະພາບເສດຖະກິດຂອງໂລກ ທີ່ສົ່ງຜົນກະທົບຕໍ່ປະເທດເຮົາ ເຊັ່ນ: ບັນຫາການກີດກັນທາງດ້ານການຄ້າທີ່ອາດກາຍເປັນສົງຄາມການຄ້າ, ບັນຫາລາຄານໍ້າມັນໃນຕະຫຼາດໂລກມີທ່າອ່ຽງເພີ່ມຂຶ້ນ ຍ້ອນກຸ່ມຜູ້ຜະລິດຫຼຸດການຜະ ລິດລົງ ແລະ ຄ່າເງິນໂດລານັບທັງລາຄາຄຳ ແລະ ທອງ ໃນຕະຫຼາດໂລກຍັງສືບຕໍ່ຜັນແປ ແລະ ມີລັກສະນະບໍ່ແນ່ນອນ, ການປ່ຽນແປງດິນຟ້າອາກາດ ແລະ ສັດຕູພືດ ທີ່ເປັນຄວາມສ່ຽງຂອງການຜະລິດກະສິກໍາເປັນສິນຄ້າ. ດັ່ງນັ້ນ, ກະຊວງອຸດສະຫະກໍາ ແລະ ການຄ້າ ກໍ່ຄືລັດຖະບານ ຈຶ່ງມີຄວາມເປັນຫ່ວງ ແລະ ຊອກຫາວິທີປ້ອງກັນກໍ່ຄືການຊອກຫາທາງອອກຊ່ວຍປະຊາຊົນຜູ້ທຳການຜະລິດ, ຜູ້ປຸງແຕ່ງ ແລະ ຊາວຄ້າຂາຍ, ນັບທັງພາຍໃນ ແລະ ຕ່າງປະເທດ ເພື່ອຫລີກລ່ຽງບັນຫາຕ່າງໆ ທີ່ຈະກະທົບໃສ່ການຊື້-ຂາຍ, ສິນຄ້າ, ລາຄາໃນຕະຫລາດ, ການລະເມີດລະບຽບກົດໝາຍດ້ານການຜະລິດ-ທຸລະກິດ ແລະ ການຄ້າ ແລະ ອື່ນໆ. ກອງປະຊຸມດໍາເນີນໂດຍການໃຊເວລາ 2 ວັນ (14-15), ຍົກປະເດັນ 4 ຫົວຂໍ້ມາປຶກສາຫາລືກັນດັ່ງນີ້:
- ຮ່າງຄໍາສັ່ງ ຂອງນາຍົກລັດຖະມົນຕີ ວ່າດ້ວຍການເພີ່ມຄວາມເອົາໃຈໃສ່ ຄຸ້ມຄອງການສົ່ງເສີມການຜະລິດກະສິກໍາເປັນສິນຄ້າດ້ວຍຮູບແບບສັນຍາຜູກພັນສອງສົ້ນ.
- ຮ່າງຂໍ້ຕົກລົງ ວ່າດວ້ຍສະຫະກອນອຸດສາຫະກໍາປຸງແຕ່ງ ແລະ ການຄ້າ.
- ການສະເໜີ ຮ່າງມາດຕະຖານສິນຄ້າກະສິກໍາ ປະເພດ ເຂົ້າ, ສາລີ, ກາເຟ, ໝາກເດືອຍ ແລະ ຢາງພາລາ.
- ມາດຕະການທີ່ກ່ຽວຂ້ອງ ກັບການຮັກສາສະຖຽນລະພາບລາຄາສິນຄ້າ ບາງພຶດເສດຖະກິດຂອງລາວ.
ນອກນັ້ນບັນດາແຂກຜູ້ທີ່ເຂົ້າຮ່ວມໃນກອງປະຊຸມມີທັງພາກລັດ ແລະ ພາກທຸລະກິດແມ່ນໃຫ້ຄວາມສົນໃຈຫລາຍ ເພາະມັນກ່ຽວກັບປະເດັນບັນຫາເສດຖະກິດໃນປັດຈຸບັນ ແລະ ທີ່ສໍາຄັນແຂກເຂົ້າຮ່ວມທັງຫມົດປະມານ 60 ກ່ວາທ່ານ ແມ່ນໄດ້ເອົາໃຈໃສ່, ປະກອບຄໍາຄິດຄໍາເຫັນໃສ່ຮ່າງ ແລະ ມາດຕະການຕ່າງໆ ທີ່ໄດ້ນໍາສະເໜີ, ໃນດ້ານນະໂຍບາຍເຊັ່ນ: ການເຜີຍແຜ່ຂໍ້ມູນຂ່າວສານ ລວມທັງການພະຍາກອນລາຄາ, ການສ້າງອົງກອນຕະຫຼາດ ເພື່ອຊາວກະສິກອນ, ນະໂຍບາຍ ແລະ ລະບຽບການປະກັນໄພສິນຄ້າກະສິກໍາ; ນະໂຍບາຍການເຊົ່າຊື້ພາຫະນະກົນຈັກກະສິກໍາ ແລະ ອື່ນໆ, ຢ່າງກົງໄປກົງມາ.
ຂ່າວໂດຍ: ພູຄໍາ ຫລວງສຸພົນ
