ຕອນເຊົ້າເວລາ 9:00 ໂມງ ຂອງວັນທີ 21 ມິຖຸນາ 2017 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ຈັດກອງປະຊຸມຕີລາຄາປະເມີນຜົນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປະຈໍາປີ 2017 ແລະ ວາງທິດທາງແຜນການໃນຕໍ່ໜ້າແນໃສ່ກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2018 ທົ່ວໜ່ວຍພັກກະຊວງຊຶ່ງມີ 12 ໜ່ວຍ ໂດຍການເປັນປະທານຂອງ ທ່ານ ບຸນມີ ມະນີວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ກະຊວງ ອຄ ແລະ ມີຜູ້ຕາງໜ້າ ສະມາຊິກພັກທັງໝົດ 12 ໜ່ວຍພັກເຂົ້າຮ່ວມ ປະມານ 100 ກວ່າທ່ານ.
ກອງປະຊຸມຄັ້ງນີ້ ມີຈຸດປະສົງ ແນໃສ່ປັບປຸງແກ້ໄຂຂໍ້ຄົງຄ້າງ ໃຫ້ໜ່ວຍພັກທົ່ວກະຊວງມີຄວາມປອດໃສ ໜັກແໜ້ນ ເຂັ້ມແຂງ-ຮູ້ນໍາພາຮອບດ້ານ, ຮູ້ຊີ້ນໍາ-ນໍາພາກໍ່ສ້າງພັກໃຫ້ມີຄວາມເຂັ້ມແຂງໃນຕໍ່ໜ້າ ນອກນັ້ນແຕ່ລະໜ່ວຍພັກຫ້ອງການ, ບັນດາກົມ, ສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ ກໍ່ໄດ້ພັດປ່ຽນກັນຂຶ້ນ ຜ່ານບົດສະຫລຸບການຈັດຕັ້ງການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປະຈໍາປີ 2017 ໂດຍຫຍໍ້ ຂອງຕົນ ຊຶ່ງສອ່ງແສງໃຫ້ເຫັນຜົນງານ ຈຸດດີເຂັ້ມແຂງ ແລະ ຈຸດອ່ອນຂໍ້ຄົງຄ້າງ ໃນ 1 ປີຜ່ານມາ ພ້ອມທັງປະກອບຄໍາຄິດຄໍາເຫັນໃສ່ ທິດທາງແຜນການໃນຕໍ່ໜ້າ ແລະ ປະເມີນຜົນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ໃຫ້ເຊິ່ງກັນ ແລະ ກັນ; ກອງປະຊຸມດໍາເນີນເປັນເວລາ 1 ວັນເຕັມ ໂດຍໄດ້ແບ່ງອອກເປັນ 2 ກຸ່ມຄື: ກຸ່ມທີ 1 ມີໜ່ວຍພັກຫ້ອງການ, ກົມຈັດຕັ້ງ ແລະ ພະນັກງານ, ກົມແຜນການ ແລະ ການຮ່ວມມື, ກົມກວດກາ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ; ກຸ່ມທີ 2 ມີໜ່ວຍພັກກົມອຸດສາຫະກໍາ ແລະ ຫັດຖະກໍາ, ການນໍາເຂົ້າ ແລະ ສົ່ງອອກ, ທະບຽນ ແລະ ຄຸ້ມຄອງວິສາຫະກິດ, ສົ່ງເສີມການຄ້າ, ການຄ້າພາຍໃນ, ສົ່ງເສີມວິສາຫະກິດຂະໜາດນ້ອຍ ແລະ ກາງ, ນະໂຍບາຍການຄ້າຕ່າງປະເທດ.
ຕອນທ້າຍ ທ່ານ ບຸນມີ ມະນີວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ກະຊວງ ອຄ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ບັນດາໜ່ວຍພັກ ທົ່ວກະຊວງ ອຄ ນໍາເອົາເນື້ອໃນຂອງຄໍາສັ່ງ ວ່າດ້ວຍການເພີ່ມທະວີ ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຂອງກົມການເມືອງສູນກາງພັກ ເລກທີ 01/ກມສພ, ລົງວັນທີ 03 ມັງກອນ 2018 ໄປຜັນຂະຫຍາຍ ແລະ ດັດປັບເຂົ້າໃນທິດທາງແຜນການປີ 2018 ຂອງຕົນ.
ຂ່າວໂດຍ: ນາງ ຖື ແຫວນວົງສົດ
