ໃນຕອນເຊົ້າຂອງວັນທີ 14 ສິງຫາ 2018 ທີ່ສະໂມສອນກະຊວງອຸດສາຫະກໍາ ແລະ ການຄ້າ ໄດ້ໄຂກອງປະຊຸມຄົບຄະນະບໍລິຫານງານພັກກາງສະໄຫມ ຂອງອົງຄະນະພັກກະຊວງ ອຄ  ສະໄໝທີ IV ຢ່າງເປັນທາງການ ໂດຍການເປັນປະທານ ຂອງທ່ານ ນາງ ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງລັດຖະມົນຕີກະຊວງອຸດສາຫະກໍາ ແລະ ການຄ້າ.

ເນື້ອໃນຈິດໃຈຂອງກອງປະຊຸມເພື່ອເປັນການສະຫລຸບຕີລາຄາຜົນການຊີ້ນໍາ-ນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກກະຊວງອຸດສາຫະກໍາ ແລະ ການຄ້າ ໄລຍະກາງສະໄຫມທີ IV ນັບແຕ່ ເດືອນ ກໍລະ ກົດ 2015 ເຖິງປັດຈຸບັນ ແລະ ທິດທາງແຜນການຮອດປີ 2020, ໂດຍໄດ້ຜ່ານບົດສໍາຫລວດການນໍາພາລວມ ຂອງອົງຄະນະບໍລິຫານ ພັກກະຊວງໃນໄລຍະກາງສະໄຫມ, ບົດສຳຫລວດບຸກຄົນໃນຄະນະບໍລິຫານງານພັກກະຊວງສະ ໄຫມທີ່ IV  ແລະ ປະ ກອບຄໍາເຫັນຕໍ່ບັນດາເນື້ອໃນຕ່າງໆ ຂອງກອງປະຊຸມດັ່ງກ່າວ.

     ໃນກອງປະຊຸມມີບັນດາສະຫາຍໃນຄະນະປະຈໍາພັກກະຊວງ, ບັນດາສະຫາຍຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ເລຂາໜ່ວຍພັກ, ຄະນະຫນ່ວຍພັກຫ້ອງການ, ບັນດາກົມ, ສະຖາບັນຄົ້ນຄວ້າເສດຖະ ກິດອຸດສາຫະກໍາ ແລະ ການຄ້າ, ບັນດາຫນ່ວຍພັກລັດວິສາຫະກິດ, ບໍລິສັດ, ສະພາການຄ້າ ແລະ ອຸດສາຫະກໍາແຫ້ງຊາດ, ຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ, ມີຜູ້ເຂົ້າຮ່ວມທັງຫມົດປະມານ 90 ສະຫາຍ.

ຂ່າວໂດຍ: ພູຄໍາ ຫລວງສຸພົນ