ຕອນເຊົ້າ ເວລາ 9:00 ໂມງ ຂອງວັນ 23-24 ສິງຫາ 2018 ທີ່ຫ້ອງປະຊຸມໃຫ່ຍຊັ້ນ 1 ກະຊວງອຸດຫະກໍາ ແລະ ການຄ້າ ໄດ້ມີກອງປະຊຸມເຜີຍແຜ່ ເຊື່ອມຊຶມ ດໍາລັດ ແລະ ຄໍາແນະນໍາ ກ່ຽວກັບວຽກງານປັບປຸງກົງຈັກ ແລະ ຄຸ້ມຄອງລັດຖະກອນໂດຍອີງຕາມກົດໝາຍວ່າດ້ວຍພະນັກງານ-ລັດຖະກອນ ສະບັບເລກທີ 74/ສພຊ, ລົງວັນທີ 18 ທັນວາ 2015 ໃຫ້ພະນັກງານ-ລັດຖະກອນ ກະຊວງອຸດສາຫະກໍາ ແລະ ການຄ້າ.
ກອງປະຊຸມເປັນປະທານຮ່ວມ ໂດຍ ທ່ານ ບຸນມີ ມະນີວົງ ຮອງເລຂາພັກກະຊວງ ຮອງລັດຖະມົນຕີ ກະຊວງ ອຄ ທ່ານໄດ້ກ່າວວ່າ: ກອງປະຊຸມຄັ້ງນີ້ເພື່ອເຜີຍແຜ່ເຊື່ອມຊຶມ ດໍາລັດ ແລະ ຄໍາແນະນໍາ ກ່ຽວກັບວຽກງານປັບປຸງກົງຈັກການຈັດຕັ້ງ ແລະ ວຽກງານຄຸ້ມຄອງລັດຖະກອນສຸດທີ່ມີຄວາມໝາຍສໍາຄັນເປັນຢ່າງຍິ່ງທີ່ຕິດພັນກັບວຽກງານພະນັກງານ-ລັດຖະກອນ, ໃຫ້ພະນັກງານ-ລັດຖະກອນທຸກຄົນ ເຊື່ອມຊຶມເອົາໃຈໃສ່ຈັດຕັ້ງປະຕິບັດໃຫ້ຖືກຕ້ອງຕາມລະບຽບການຄຸ້ມຄອງພະນັກງານ.
ກະຊວງອຸດສາຫະກໍາ ແລະ ການຄ້າ ໃນໄລຍະຜ່ານມາແມ່ນອີງໃສ່ການປັບປຸງໃຫ້ກະທັດຮັດເບົາບາງ ແລະ ສົມເຫດສົມຜົນຕາມພາລະບົດບາດຄຸ້ມຄອງມະຫາພາກ ຂັ້ນກະຊວງຍັງຮັກສາໂຄງປະກອບກົງຈັກການຈັດຕັ້ງມີ 1 ຫ້ອງການ, 10 ກົມ ແລະ 1 ສະຖາບັນຄົ້ນຄ້ວາເສດຖະກິດອຸດສາຫະກໍາ ແລະ ການຄ້າ ສໍາລັບຂັ້ນພະແນກ ອຄ ແຂວງ ແລະ ນະຄອນຫຼວງແມ່ນ ຍັງສືບຕໍ່ຮັກສາ 8 ຂະແໜງການ ຂັ້ນເມືອງມີ 4 ໜ່ວຍງານ ການຄຸ້ມຄອງແມ່ນອີງໃສ່ພາລະບົດບາດແບ່ງຂັ້ນຕອນຄຸ້ມຄອງແຕ່ສູນກາງ ລົງຮອດທ້ອງຖິ່ນ.
ກອງປະຊຸມໃນມື້ທຳອິດໄດ້ຮັບຟັງ ທ່ານ ວິໄຊ ພັນດານຸວົງ ຮອງລັດຖະມົນຕີ ກະຊວງພາຍໃນຊຶ່ງເປັນປະທານຮ່ວມ ແລະ ໄດ້ຂຶ້ນບັນຍາຍດໍາລັດ ສະບັບເລກທີ 300/ລບ, ລົງວັນທີ 13 ກັນຍາ 2017 ແລະ ດໍາລັດເລກທີ 294/ລບ, ລົງວັນທີ 04 ກັນຍາ 2017, ຄໍາສັ່ງເລກທີ 03/ນຍ, ລົງວັນທີ 09 ກຸມພາ 2018 ແລະ ຄໍາແນະນໍາ ຂອງລັດຖະມົນຕີກະຊວງພາຍໃນ ສະບັບເລກທີ 06/ພນ, ລົງວັນທີ 19 ຕຸລາ 2017 ແລະ ເລກທີ 06/ພນ ລົງວັນທີ 02 ພຶດສະພາ 2018 ວ່າດ້ວຍການປະເມີນຜົນ ການປະຕິບັດວຽກງານຂອງພະນັກງານ-ລັດຖະກອນໂດຍແນໃສ່ໃຫ້ພະນັກງານ-ລັດຖະກອນພາຍໃນກະຊວງອຸດສາຫະກໍາ ແລະ ການຄ້າ ປະຕິບັດຕາມກົດໝາຍວ່າດ້ວຍພະນັກງານ-ລັດຖະກອນຂອງ ສປປ ລາວ, ເພື່ອການຄຸ້ມຄອງພະນັກງານ-ລັດຖະກອນງ່າຍຂຶ້ນ, ເຊິ່ງບັນດາດໍາລັດ. ຄໍາສັ່ງ ແລະ ຄໍາແນະນໍາ ສະບັບນີ້ໄດ້ຜ່ານລັດຖະບານຢ່າງສົມບູນ.
ມື້ທີສອງຮັບຟັງທ່ານ ວັນໄຊ ວັນນະວົງ ຮອງຫົວໜ້າກົມປະເມີນຜົນ ແລະ ພັດທະນາລັດຖະກອນ(ປພລ) ກະຊວງພາຍໃນ ຂຶ້ນບັນຍາຍ ຄຳແນະນໍາ ສະບັບເລກທີ 06/ພນ ລົງວັນທີ 02 ພຶດສະພາ 2018 ໃນການຈັດຕັ້ງປະຕິບັດດໍາລັດ ວ່າດ້ວຍການປະເມີນຜົນການປະຕິບັດວຽກງານ ຂອງພະນັກງານ-ລັດຖະກອນ, ພ້ອມທັງການທົດລອງປະຕິບັດລະບົບສັງລວມຜົນປະເມີນ (ຂັ້ນຄະນະກົມ, ຂັ້ນພະແນກ ຮອດວິຊາການ) ຈາກທ່ານ ເອກະສິດ ຈັນທະປັນຍາ ວິຊາການ ກະຊວງພາຍໃນ;
ຂ່າວໂດຍ: ໄພຄໍາອີ ວິໄລຄໍາ
