ໃນວັນທີ 27 ພະຈິກ 2018 ເວລາ: 11:15, ທີ່ຫ້ອງຮັບແຂກກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບຄະນະທ່ານເອກອັກຄະລັດຖະທູດ ແຫ່ງ ສີລັງກາ ໂດຍໃຫ້ກຽດຕ້ອນຮັບຄະນະດັ່ງກ່າວທ່ານ ນາງ ເຂັມມະນີ ພົນເສນາ ລັດ ຖະມົນຕີກະຊວງອຸດສາຫະກໍາ ແລະ ການຄ້າ ພ້ອມດ້ວຍບັນດາກົມທີ່ກ່ຽວຂ້ອງ ເປັນຕົ້ນຫ້ອງການກະຊວງ ແລະ ກົມແຜນການ ແລະ ການຮ່ວມມື ພ້ອມດ້ວຍວິຊາການ.
ທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ເອກອັກຄະລັດຖະທູດ ແຫ່ງ ສີລັງກາ ໄດ້ກ່າວເຖິງການພົວພັນການຄ້າ ຂອງສອງປະເທດວ່າ: ເຖິງແມ່ນວ່າການພົວພັນການຄ້າ ລະຫວ່າງ ສປປ ລາວ ແລະ ສີລັງກາ ຍັງບໍ່ທັນມີບາດກ້າວຂະຫຍາຍຕົວເທົ່າທີ່ຄວນແຕ່ສອງປະເທດກໍ່ໄດ້ເຂົ້າຮ່ວມ ແລະ ເປັນພາຄີຂອງ WTO ແລະ ເປັນສະມາຊິກຂອງສັນຍາການຄ້າອາຊີ-ປາຊີຟິກ (Asia Pacific Trade Agreement-APTA) ຫລ້າສຸດກອງປະຊຸມຄະນະລັດຖະມົນຕີປະເທດສະມາຊິກ ໃນປີ 2017 ທີ່ບາງກອກ, ປະເທດໄທ. ມູນຄ່າການຄ້າສອງຝ່າຍ ໃນປີ 2017 ສາມາດບັນລຸໄດ້ພຽງ 488.000 ໂດລາ ຫຼຸດລົງ -95% ທຽບກັບປີຜ່ານມາ, ໃນນັ້ນ ສປປ ລາວ ສົ່ງອອກ 269.000 $ໂດລາ ແລະ ນຳເຂົ້າ 219.000 $ໂດລາ.
ປະຈຸບັນ ມີນັກລົງທຶນຈາກປະເທດສີລັງການ ເຂົ້າມາລົງທຶນຢູ່ ສປປ ລາວ ຈຳນວນ 06 ບໍລິສັດ ທຶນຈົດທະບຽນທັງໝົດ 12.300.000.000 ກິບ. ຊຶ່ງລົງທຶນໃນຂະແໜງ ກະສິກຳ, ປ່າໄມ້ ແລະ ການປະມົງ; ການເຄື່ອນໄຫວດ້ານວິທະຍາສາດ ແລະ ເຕັກນິກ; ການຄ້າ ຂາຍຍົກ-ຂາຍຍ່ອຍ; ການເຄື່ອນໄຫວບໍລິການທີ່ພັກເຊົາ ແລະ ບໍລິການອາຫານ.
ສຸດທ້າຍທັງສອງທ່ານ ໄດ້ກ່າວຄໍາຂອບໃຈເຊິ່ງກັນ ແລະ ກັນ ໂດຍສະເພາະທ່ານເອກອັກຄະລັດຖະທູດ ແຫ່ງ ສີລັງກາແມ່ນມີຄວາມພໍໃຈຫລາຍທີ່ທ່ານລັດຖະມົນຕີ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄວາມສໍາຄັນຂອງການຄ້າ ການລົງທຶນຂອງສອງປະເທດ ແລະ ຈະໄດ້ພັດທະນາການຮ່ວມມືກັນເຮັດການຄ້າຂະຫຍາຍຕົວຂຶ້ນໄປເລື້ອຍ.
ຂ່າວໂດຍ: ພູຄໍາ ຫຼວງສຸພົນ
