ຕອນບ່າຍ ເວລາ 2: 30 ໂມງ ຂອງວັນທີ 10 ທັນວາ 2018 ທີ່ຫ້ອງປະຊຸມຊັ້ນ 3 ກະຊວງອຸດສາຫະກໍາ ແລະ ການຄ້າ ໄດ້ມີການຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Deng Boqing, ຮອງຫົວໜ້າອົງການຮ່ວມມືສາກົນເພື່ອການພັດທະນາແຫ່ງຊາດຈີນ (CIDCA) ໃນໂອກາດທີ່ໄດ້ເດີນທາງ ແລະ ນໍາພາຄະນະມາ ຢ້ຽມຢາມ ສປປ ລາວ ເປັນຄັ້ງທໍາອິດ ໂດຍ ທ່ານ ນາງ ເຂັມມະນີ ພົນເສນາ, ປະທານຄະນະກໍາມະການຮ່ວມມື ລາວ-ຈີນ, ລັດຖະມົນຕີ ກະຊວງອຸດສາຫະກໍາ ແລະ ການຄ້າແຫ່ງ ສປປ ລາວ ພ້ອມດ້ວຍຜູ້ຕາງໜ້າຈາກຄະນະກໍາມະການຮ່ວມມື ລາວ-ຈີນ, ທ່ານຮອງຫົວໜ້າຫ້ອງການ, ບັນດາທ່ານຫົວໜ້າກົມ-ຮອງກົມ ແລະ ວິຊາການກ່ຽວຂ້ອງຈໍານວນໜຶ່ງ ຊຶ່ງເປັນການແລກປ່ຽນບົດຮຽນທີ່ດີດ້ານການຮ່ວມມື ຈາກຜູ້ແທນອົງການຮ່ວມມືສາກົນ ເພື່ອການພັດທະນາແຫ່ງຊາດຈີນ. ການເຂົ້າຢ້ຽມຂໍ່ານັບຄັ້ງນີ້ມີຜູ້ຕາງໜ້າຈາກທັງສອງຝ່າຍເຂົ້າຮ່ວມຈໍານວນ 28 ທ່ານ.
ໃນໂອກາດພົບປະຄັ້ງນີ້ ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ຊຶ່ງເປັນການປະກອບສ່ວນ ຊ່ວຍຊຸກຍູ້ສາຍພົວພັນ ຄູ່ຮ່ວມຍຸດທະສາດຮອບດ້ານ , ນອກຈາກນັ້ນຍັງປຶກສາຫາລືການຊ່ວຍເຫຼືອເງິນກູ້ໂດຍບໍ່ມີດອກເບັ້ຍ ໃນໂຄງການຊ່ວຍເຫຼືອດ້ານສາທາລະນະສຸກ, ໂຄງການຊ່ວຍເຫຼືອດ້ານການສຶກສາ ແລະ
ໂຄງການຊ່ວຍເຫຼືອດ້ານ ພັດທະນາເຕັກໂນໂລຊີ 4.0 ດ້ານການຄ້າ, ພ້ອມທັງເປັນຄູ່ຮ່ວມຊະຕາກໍາຍຸດທະສາດທີ່ບໍ່ສາມາດຕັດແຍກອອກຈາກກັນໄດ້ ລະຫ່ວາງ ລາວ-ຈີນ ໃຫ້ນັບມື້ນັບຈະເລີນງອກງາມ; ບັນດາໂຄງການໃຫຍ່ຈະເປັນໂຄງການກໍ່ສ້າງທາງລົດໄຟ ລາວ-ຈີນ, ໂຄງການຊ່ວຍ ເຫຼືອລ້າ 4 ຕື້ຢວນ, ໂຄງການການພັດທະນາພື້ນຖານໂຄງລ່າງໂດຍສະເພາະວຽກງານການພັດທະນາຊົນນະບົດ ແລະ ແກ້ໄຂຄວາມທຸກຍາກຈະຊ່ວຍໃຫ້ລັດຖະບານລາວບັນລຸເປົ້າໝາຍພາປະເທດຊາດຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ ທ່ານ Deng Boqing, ໄດ້ໃຫ້ຄວາມຮ່ວມມືເປັນຢ່າງດີ, ພອ້ມດຽວກັນນັ້ນ, ທ່ານ Deng Boqing, ຮອງຫົວໜ້າອົງການຮ່ວມມືສາກົນເພື່ອການພັດທະນາແຫ່ງຊາດຈີນ, ກໍ່ສະແດງຄວາມຂອບໃຈມາຍັງ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ດີ.
ຂ່າວໂດຍ: ໄພຄໍາອີ ວິໄລຄໍາ
