ຕອນບ່າຍ ເວລາ 3: 00 ໂມງ ຂອງວັນທີ 27 ທັນວາ 2018 ຫ້ອງຮັບແຂກຊັ້ນ 4 ກະຊວງ ອຸດສາຫະກໍາ ແລະ ການຄ້າ ໄດ້ມີການຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ LE THI PHUONG HOA, ທີ່ປຶກສາທູດການຄ້າ ແຫ່ງ ສສ ຫວຽດນາມ ປະຈໍາ ສປປ ລາວ ຄົນໃໝ່ ເນື່ອງໃນໂອກາດທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງໃໝ່ ປະຈໍາ ສປປ ລາວ, ໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ພ້ອມດ້ວຍທ່ານຫົວໜ້າຫ້ອງການ, ຫົວໜ້າກົມແຜນການ ແລະ ການຮ່ວມມື, ຫົວໜ້າກົມນະໂຍບາຍການຄ້າຕ່າງປະເທດ ແລະ ວິຊາການກ່ຽວຂ້ອງຈໍານວນໜຶ່ງ. ການເຂົ້າຢ້ຽມຂໍ່ານັບຄັ້ງນີ້ ມີຜູ້ຕາງໜ້າຈາກທັງສອງຝ່າຍເຂົ້າຮ່ວມຈໍານວນ 9 ທ່ານ.
ໃນໂອກາດນີ້ ສອງຝ່າຍໄດ້ປຶກສາຫາລືຄວາມເຂົ້າໃຈຮ່ວມກັນຫຼາຍດ້ານ ຄື: ດ້ານການຄ້າ, ການຮ່ວມມື, ການລົງທຶນ ແລະ ເຊິ່ງເປັນການປະກອບສ່ວນອັນສໍາຄັນເຂົ້າການເສີມສ້າງສາຍພົວພັນມິດຕະພາບແບບພິເສດ ແລະ ການຮ່ວມມື ລະຫວ່າງສອງພັກສອງລັດ ລາວ-ຫວຽດນາມ; ພ້ອມດຽວກັນນີ ທ່ານ ທີ່ປຶກສາທູດການຄ້າ ໄດ້ສະເໜີໃນຕໍ່ໜ້າຈະໃຫ້ການຮ່ວມມື ໃນວຽກງານການຄ້າໂດຍໄດ້ຕັ້ງເປົ້າຈະເພີ່ມມູນຄ່າການຄ້າສອງຝ່າຍ ໃຫ້ສູງກວ່າ 10% ຫຼາຍກວ່າທີ່ຜ່ານມາ ແລະ ມີແຜນຈະສ້າງຫ້ອງວາງສະແດງສິນຄ້າ ຂອງ ສສ ຫວຽດນາມ ຢູ່ລາວ ເພື່ອເປັນການໂຄສະນາສິນຄ້າໃຫ້ປະຊາຊົນລາວໄດ້ຮັບຮູ້ຢ່າງກວ້າງຂວາງກວ່າເກົ່າ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ, ສະເໜີໃຫ້ມີຮັກສາການຕິດຕໍ່ພົວພັນ ຊຶ່ງກັນ ແລະ ກັນ ແລະ ອວຍພອນໄຊເນື່ອງໃນໂອກາດປີໃໝ່ສາກົນທີ່ຈະມາເຖິງນີ້ ຂໍໃຫ້ວຽກງານທຸກສິ່ງຢ່າງລາບລື້ນ ຕໍ່ທ່ານ ທີ່ປຶກສາທູດການຄ້າ ແຫ່ງ ສສ ຫວຽດນາມ ປະຈໍາ ສປປ ລາວ ຄົນໃໝ່ ແລະ ທ່ານ ທີ່ປຶກສາທູດການຄ້າກໍ່ສະແດງຄວາມຂອບໃຈ ມາຍັງທ່ານລັດຖະມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ.
ຂ່າວໂດຍ: ໄພຄໍາອີ ວິໄລຄໍາ
