ໃນຕອນບ່າຍຂອງວັນທີ 6 ກຸມພາ 2019 ເຈົ້າໜ້າທີ່ກວດກາສິນຄ້າຂະແໜງການຄ້າພາຍໃນ ພະແນກອຸດ ສາຫະກຳ ແລະ ການຄ້າແຂວງຄຳມ່ວນນຳໂດຍ ທ່ານ ບຸນໂຮມ ມຸກດາສັກ ຮອງຫົວໜ້າໜ້າພະແນກອຸດສາຫະກຳ ແລະ ການຄ້າແຂວງ ໄດ້ສົມທົບກັບພາກສ່ວນຮັບຜິດຊອບຈັດສັນຕະຫລາດ ຫລັກ 02 ແລະ ຕະຫລາດນາໂບ ລົງເຄື່ອນໄຫວກວດກາຕິດຕາມລາຄາສິນຄ້າປະເພດຊີ້ນ, ເຂົ້າ, ປາ ແລະ ອາຫານແຫ້ງຕາມບັນດາຫ້າງຮ້ານໃນທ້ອງຕະຫລາດດັ່ງກ່າວ ເນື່ອງໃນໂອກາດບຸນປີໃໝ່ຂອງພີ່ນ້ອງຊາວຫວຽດນາມ ແລະ ຊາວຈີນ ລວມເຖິງບຸນນະມັດສະການພຣະທາດສີໂຄດຕະບອງ ປະຈຳປີ 2019 ທີ່ຈະໄດ້ຈັດຂຶ້ນໃນມໍ່ໆ ນີ້.
ເນື່ອງຈາກວ່າໃນໂອກາດນີ້ໄດ້ເຮັດໃຫ້ບັນດາຜູ້ປະກອບການ, ພໍ່ຄ້າ, ແມ່ຄ້າ, ຂາຍເຄື່ອງບໍລິໂພກບາງກຸ່ມ ສວຍໂອກາດຂຶ້ນລາຄາສິນຄ້າໂດຍພາລະການລະເມີດລະບຽບຄ້າຂາຍ ຕາມໂຄງປະກອບລາຄາສິນຄ້າທີ່ຂະແໜງການກ່ຽວຂ້ອງກຳນົດໃຫ້ ເຊິ່ງເປັນການເອົາລັດເອົາປຽບຕໍ່ຜູ້ບໍລິໂພກໂດຍສະເພາະແມ່ນລາຄາຊີ້ນໝູ, ຊີ້ນງົວ, ຊີ້ນຄວາຍ, ຊີ້ນປາ ແລະ ສິນຄ້າປະເພດເຂົ້າ ຕໍ່ບັນຫາດັ່ງກ່າວເຈົ້າໜ້າທີ່ກວດກາສິນຄ້າຂະແໜງການຄ້າພາຍໃນ ພະແນກ ອຄ ຈຶ່ງເພີ່ມຄວາມເຂັ້ມງວດໃນການຕິດຕາມ,ກວດກາ, ພ້ອມທັງຮຽກຮ້ອງມາຍັງຄະນະຮັບຜິດຊອບຈັດສັນຕະຫລາດແຕ່ລະແຫ່ງ ຈົ່ງໃຫ້ການຮ່ວມມື ແລະ ອຳ ນວຍຄວາມສະດວກໃນການປະຕິບັດງານຂອງເຈົ້າໜ້າທີ່, ມີສ່ວນຮ່ວມໃນການແກ້ໄຂຕໍ່ບັນຫາດັ່ງກ່າວໃຫ້ຫລາຍຂຶ້ນ,ພ້ອມດຽວກັນນັ້ນບັນດາຜູ້ປະກອບການຄ້າຂາຍ ກໍ່ຈົ່ງເອົາໃຈໃສ່ເປັນເຈົ້າການເຄື່ອນໄຫວຕໍ່ການປະຕິບັດລະບຽບການຄ້າຂາຍຕາມໂຄງປະກອບແຈ້ງລາຄາສິນຄ້າ ທີ່ທາງພະແນກ ອຄ ໄດ້ວາງອອກ ແລະ ຖ້າຫາກພົບເຫັນການເອົາລັດເອົາປຽບດ້ານລາຄາທ່ານສາມາດແຈ້ງ ຫຼື ໂທລະສັບປະສານງານໄດ້ 24 ຊົ່ວໂມງ ເຊິ່ງປະຊາຊົນສາມາດເຂົ້າຫາໄດ້ເພື່ອຂໍຄວາມເປັນທຳໂດຍສະເພາະແຈ້ງສາຍດ່ວນ 1510 ຫຼື ພະແນກອຸດສາຫະກໍາ ແລະ ການຄ້າແຂວງ ( ຂະແໜງການຄ້າພາຍໃນ ) ໃນເວລາລັດຖະການຖ້າມີສະພາບການເກີດຂຶ້ນເພື່ອພ້ອມກັນແກ້ໄຂບັນຫາດັ່ງກ່າວໄດ້ທັນກັບສະພາບການ.
ຂ່າວ : ມະນີວັນ
ຮຽບຮຽງໂດຍ: ນາງ ຖື
