ໃນຕອນເຊົ້າ ເວລາ 8: 30 ຂອງວັນທີ 13 ກຸມພາ 2019 ນີ້ທີ່ຫ້ອງປະຊຸມພະແນກອຸດສາຫະກຳ ແລະ ການຄ້າແຂວງອຸດົມໄຊ, ໄດ້ຈັດພິທີພົບປະແລກປ່ຽນບົດຮຽນວຽກງານ ສົ່ງເສີມວິສາຫະກິດຂະໜາດນ້ອຍ ແລະກາງ ແລະ ການຄ້າ ລະຫວ່າງພະແນກອຸດສາຫະກໍາ ແລະ ການຄ້າແຂວງອຸດົມໄຊ ກັບ ພະແນກອຸດສາຫະກຳ ແລະ ການຄ້າແຂວງບໍລິຄຳໄຊ ໂດຍການເປັນປະທານຂອງທ່ານ ຄໍາເພົ້າ ສີລິສຸກ ກໍາມະການພັກແຂວງ ເລຂາໜ່ວຍພັກ ຫົວໜ້າພະແນກອຸດສາຫະກໍາ ແລະ ການຄ້າແຂວງອຸດົມໄຊ ເຂົ້າຮ່ວມການພົບປະໃນຄັ້ງນີ້ມີບັນດາຄະນະພະແນກ, ຫົວໜ້າ-ຮອງຂະແໜງ ແລະ ວິຊາການພາຍໃນຂະແໜງສົ່ງເສີມ ພ້ອມດ້ວຍອາສາສະມັກໄຈກ້າ ຈາກທັງສອງແຂວງເຂົ້າຮ່ວມທັງໝົດ 17 ທ່ານ; ເຊິ່ງການພົບປະໄດ້ຮັບຟັງການລາຍງານໂດຍຫຍໍ້ ກ່ຽວກັບວຽກງານອຸດສາຫະກໍາ ແລະ ການຄ້າແຂວງອຸດົມໄຊໃນໄລຍະຜ່ານມາ ໂດຍສະເພາະແມ່ນວຽກງານສົ່ງເສີມວິສາຫະກິດຂະໜາດນ້ອຍ ແລະກາງ ແລະ ການຄ້າໃນໄລຍະທີ່ຜ່ານມາຈາກທ່ານ ຄໍາເພົ້າ ສີລິສຸກ ຫົວໜ້າພະແນກອຸດສາຫະກໍາ ແລະ ການຄ້າແຂວງອຸດົມໄຊ. ພ້ອມດຽວກັນນັ້ນກໍ່ໄດ້ມີການແລກປ່ຽນບົດຮຽນເຊິ່ງກັນ ແລະ ກັນລະຫວ່າງສອງພະແນກ ເພື່ອເຮັດໃຫ້ວຽກງານສົ່ງເສີມມີບາດກ້າວຂະຫຍາຍຕົວຢ່າງຕໍ່ເນື່ອງ.
ຈາກນັ້ນ, ທາງທີມງານກໍ່ໄດ້ຢ້ຽມຊົມບັນດາກຸ່ມຜູ້ຜະລິດ ຢູ່ເມືອງໄຊ ແລະ ເມືອງແບ່ງ ແຂວງອຸດົມໄຊ.
ຂ່າວໂດຍ: ຄຳຝັ້ນ ພາວິວົງກອນ
ຮຽບຮຽງໂດຍ: ນາງ ຖື ແຫວນວົງສົດ
