ຕອນບ່າຍ ເວລາ 4: 00 ໂມງ ຂອງວັນທີ 17 ພຶດສະພາ 2019 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ Obaid Saeed Bin Taresh AI Dhaheri, ເອກອັກຄະລັດຖະທູດ ແຫ່ງ ສະຫະລັດອາລັບ ເອມີເຫລດ ປະຈໍາ ສປປ ລາວ ເຊິ່ງມີສໍານັກງານສະຖານເອກອັກຄະລັດສະຖະທູດ ຕັ້ງຢູ່ ຮ່າໂນ້ຍ, ສສ ຫວຽດນາມ ພ້ອມດ້ວຍຄະນະໄດ້ເຂົ້າຢ້ຽມຂໍ່ານັບ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງ ອຄ ໂດຍການເຂົ້າຮ່ວມທັງສອງຝ່າຍມີຈໍານວນ 11 ກວ່າທ່ານ.
ການເຂົ້າຢ້ຽມຂໍ່ານັບໃນຄັ້ງນີ້ເປັນການແລກປ່ຽນບົດຮຽນ ແລະ ເສີມສ້າງສາຍພົວພັນຮ່ວມມືຊຶ່ງກັນ ແລະ ກັນ; ໄລຍະຜ່ານມາທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງ ສະຫະລັດອາລັບ ເອມີເຫລດ-ສປປ ລາວ. ພ້ອມທັງການສົ່ງເສີມການເພີ່ມຜະລິດຕະພາບໃນຂົງເຂດພາກລັດ ແລະ ພາກທຸລະກິດ ລະຫວ່າງ ສອງປະເທດ ໃຫ້ມີການຄ້າຮ່ວມກັນ ໂດຍສະເພາະ ສິນຄ້າການນໍາເຂົ້າ ແລະ ສົ່ງອອກເພີ້ມຂຶ້ນໃນອະນາຄົດ;
ຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີຕ້ອນຮັບ ແລະ ການໃຫ້ຄວາມຮ່ວມມືເປັນຢ່າງດີ ຂອງ ທ່ານ Obaid Saeed Bin Taresh AI Dhaheri, ເອກອັກຄະລັດຖະທູດ ແຫ່ງ ສະຫະລັດອາລັບ ເອມີເຫລດ, ແລະ ທ່ານ Obaid Saeed Bin Taresh AI Dhaheri ກໍ່ສະແດງຄວາມຂອບໃຈມາຍັງ ທ່ານ ລັດຖະມົນຕີກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບ.
ຂ່າວໂດຍ: ໄພຄໍາອີ ວິໄລຄໍາ
