ໃນລະຫວ່າງວັນທີ 27 – 31 ພຶດສະພາ 2019, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຮ່ວມກັບ ພະແນກອຸດສາຫະກຳ ແລະ ການຄ້າແຂວງວຽງຈັນ ໄດ້ຈັດຝຶກອົບຮົມຫົວຂໍ້: “ການບໍລິຫານຈັດການສະມາຄົມທຸລະກິດຂະໜາດນ້ອຍ’’ ພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄ້ຳປະກັນສະບຽງອາຫານ ຂອງກະຊວງ ອຸດສາຫະກໍາ ແລະ ການຄ້າ ທີ່ຫ້ອງປະຊຸມພະແນກ ອຄ ແຂວງວຽງຈັນ, ເຊິ່ງເຂົ້າຮ່ວມເປັນປະທານກ່າວເປີດໂດຍ ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ທ່ານ ວຽງສະຫວັນ ທອງເພັງບັນທະວົງ ຮອງຫົວໜ້າພະແນກ ອຄ ແຂວງວຽງຈັນ ເປັນປະທານຮ່ວມ. ມີນັກສຳມະນາກອນ ຈຳນວນ 31 ທ່ານ, ຍິງ 06 ທ່ານ ມາຈາກ 2 ເມືອງຄື: ເມືອງທຸລະຄົມ ແລະ ເມືອງໂພນໂຮງ. ແຂວງວຽງຈັນ ແມ່ນແຂວງໜຶ່ງທີ່ນອນໃນການຈັດຕັ້ງປະຕິບັດໂຄງການດັ່ງກ່າວ; ຈຸດປະສົງຂອງການຝຶກອົບຮົມຄັ້ງນີ້ ແມ່ນເພື່ອສ້າງຄວາມເຂົ້າໃຈໃຫ້ແກ່ບັນດາພາກທຸລະກິດ ແລະ ພາກລັດໃຫ້ມີຄວາມເຂົ້າໃຈເຖິງຄວາມສຳຄັນໃນການບໍລິຫານຈັດການກຸ່ມໃຫ້ເປັນລະບົບ ແລະ ມີຄວາມເຂັ້ມແຂງ, ມີຄວາມອາດສາມາດໃນການແຂ່ງຂັນ ແລະ ການເຂົ້າເຖິງຕະຫຼາດ, ເຂົ້າເຖິງຂໍ້ມູນຂ່າວສານດ້ານຕ່າງໆໂດຍງ່າຍ. ອີກດ້ານໜຶ່ງກໍ່ເພື່ອເຮັດໃຫ້ປະຊາຊົນ ຫຼື ຈຸນລະວິສາຫະກິດ ທີ່ຮ່ວມຕົວເຂົ້າກັນແລ້ວມີໂອກາດໃນການສ້າງຄວາມເຂັ້ມແຂງ, ແລກປ່ຽນບົດຮຽນໃໝ່ໆຊຶ່ງກັນ ແລະ ກັນ, ມີການຂະຫຍາຍຕົວພາຍໃນກຸ່ມທຸລະກິດດັ່ງກ່າວ ແລະ ມີການພັດທະນາແບບຍືນຍົງດ້ວຍຕົວເຂົາເຈົ້າເອງ.
ໃນເບື້ອງຕົ້ນຈະໃຫ້ບັນດາກຸ່ມມີການຝຶກອົບຮົມ ກ່ຽວກັບວິທີການສ້າງຕັ້ງກຸ່ມ, ການບໍລິຫານກຸ່ມທຸລະກິດ, ລະບຽບຂໍ້ກໍານົດ ແລະ ນະໂຍບາຍຕ່າງໆພາຍໃນກຸ່ມ, ການປະເມີນຄວາມຈຳເປັນ, ຂໍ້ໄດ້ປຽບ ແລະ ຂໍ້ເສຍປຽບຂອງການເຮັດເປັນກຸ່ມທຸລະກິດ, ການກຳນົດການເຄື່ອນໄຫວກິດຈະກໍາ, ການເຮັດວຽກຮ່ວມກັນ, ການແກ້ໄຂບັນຫາ, ການສື່ສານ, ການບໍລິຫານດ້ານການເງິນຂອງທຸລະກິດ, ການຕະຫຼາດ, ແຜນດຳເນີນງານ ເພື່ອກ້າວເຂົ້າໄປຫາການໄດ້ຮັບຢັ້ງຢືນເປັນກຸ່ມ ຂອງແຂວງໃຫ້ປະກົດຜົນເປັນຈິງ ໃນການສ້າງເປັນຕົວແບບ ຂອງການຮ່ວມກຸ່ມທຸລະກິດ (Cluster). ພ້ອມທັງເພື່ອສ້າງຄວາມຮັບຮູ້ໃນການຮ່ວມກຸ່ມທຸລະກິດ ແລະ ສ້າງເຂັ້ມແຂງໃຫ້ກັບຂະແໜງທຸລະກິດ ທີ່ເຮັດການຜະລິດໂດຍສະເພາະໃນຂະແໜງການເຂົ້າ, ສ້າງຄວາມຮັບຮູ້ດ້ານວິຊາການຕ່າງໆ ແລະ ຮູ້ເຖິງຄວາມ ໝາຍຄວາມສຳຄັນຂອງການຮ່ວມກຸ່ມທຸລະກິດ ໂດຍເລີ່ມຈາກການສ້າງກຸ່ມທຸລະກິດຕົວແບບ.
ຂ່າວໂດຍ: ນ ພິມພອນ ສາຍສູນທອນ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ
ຮຽບຮຽງໂດຍ: ນ ຖື ແຫວນວົງສົດ, ກົມແຜນການ ແລະ ການຮ່ວມມື
