ຕອນເຊົ້າ ເວລາ 11: 30 ໂມງ ວັນທີ 17 ກໍລະກົດ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ໄດ້ມີການຕ້ອນຮັບການເຂົ້າຢ້ຽມຂໍ່ານັບພົບປະຂອງທ່ານ Mr. Tetsuji Kawabe, ກົງສູນກິດຕິມະສັກແຫ່ງ ສປປ ລາວ ປະຈໍາ Fukuoka ທີ່ປະເທດຍີ່ປຸ່ນ ຊຶ່ງເປັນຫົວໜ້ານໍາພາຄະນະທີມງານນັກທຸລະກິດຍີ່ປຸ່ນ ໂດຍຖືໂອກາດນີ້ປຶກສາຫາລືດ້ານເສດຖະກິດ ໂດຍສະເພາະຂະແໜງອຸດສາຫະກໍາ ແລະ ການຄ້າ ທີ່ຕິດພັນສ່ວນໜຶ່ງ ດ້ານນະໂຍບາຍໂຮງແຮມ-ຮ້ານອາຫານຍີ່ປຸ່ນ ຢູ່ສປປ ລາວ ຊຶ່ງເປັນການແລກປ່ຽນບົດຮຽນ ແລະ ສະເໜີອາຫານຍີ່ປຸ່ນ ໃຫ້ທ່ານລັດຖະມົນຕີຮັບຊາບ; ການເຂົ້າຢ້ຽມຂໍ່ານັບງນີ້ ມີຜູ້ຕາງໜ້າຈາກທັງສອງຝ່າຍເຂົ້າຮ່ວມຈໍານວນ 11 ກວ່າທ່ານ.
ໃນໂອກາດພົບປະຄັ້ງນີ້ ທັງສອງຝ່າຍໄດ້ປຶກສາຫາລືດ້ານການພັດທະນາສະພາບແວດລ້ອມ ໃນການດໍາເນີນທຸລະກິດຄວາມເຂົ້າໃຈຮ່ວມກັນຫຼາຍດ້ານ, ດ້ານໂຮງແຮມ-ຮ້ານອາຫານຍີ່ປຸ່ນເປັນຕົ້ນ ນອກນີ້, ຍັງສຶກສາສະພາບ ຂອງຂະແໜງອຸດສາຫະກໍາ ແລະ ການຄ້າ, ສະພາບດິນຟ້າອາກາດ ແລະ ພື້ນທີ່ອຳນວຍຄວາມສະດວກເໝາະແກ່ການສ້າງໂຮງແຮມ ແລະ ຮ້ານອາຫານ ທົ່ວຂົງເຂດແຕ່ເໜືອຮອດໃຕ້; ຖ້າສຶກສາຄວາມເປັນໄປໄດ້ບໍລິສັດຈະຂະຫຍາຍໄປຕ່າງແຂວງ, ແຂວງໃດທີ່ມີເງື່ອນໄຂເໝາະສົມທາງດ້ານອາຫານຍີ່ປຸ່ນ, ເພາະວ່າບໍລິສັດດັ່ງກ່າວມີສາຂາຢູ່ຫວຽດນາມ, ໄທ ແລະ ອາເມລິກາ ທີ່ດໍາເນີນທຸລະກິດໄປດ້ວຍດີ. ສະນັ້ນ, ຖ້າບໍລິສັດດັ່ງກ່າວສຶກສາຄວາມເປັນໄປໄດ້ ແລະ ໄດ້ສ້າງຕັ້ງສາຂາຢູ່ລາວ ຈະຊ່ວຍໃຫ້ຄົນລາວມີວຽກເຮັດງານທຳຫຼາຍຂຶ້ນ ແລະ ເປັນການປະກອບສ່ວນເຂົ້າໃນການສ້າງສາພັດທະນາເສດຖະກິດ ຂອງ ສປປ ລາວ ໃຫ້ດີຂຶ້ນ.
ຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ ທ່ານ Mr. Tetsuji Kawabe, ຫົວໜ້າຄະນະທີມງານນັກທຸລະກິດ ທີ່ໃຫ້ຄວາມຮ່ວມມືເປັນຢ່າງດີ ແລະ ທ່ານ Mr. Tetsuji Kawabe, ກໍ່ສະແດງຄວາມຂອບໃຈມາຍັງ ທ່ານລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ດີ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂ່າວສານ
