ຕອນເຊົ້າ ເວລາ 11: 00 ໂມງ ຂອງວັນທີ 02 ກັນຍາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ; ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບ ຂອງ ທ່ານ ນາງ Yuri SATO, ຮອງປະທານອົງການ ເຈໂຕຣ (JETRO) ແລະ ທ່ານ Katsuichi IWAKAMI ຫົວໜ້າອົງການສົ່ງເສີມການຄ້າຍີ່ປຸ່ນ (JETRO) ປະຈຳລາວ ໃນໂອກາດມາຢ້ຽມຢາມພົບປະຢ່າງເປັນທາງການ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 9 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມ ຊົມເຊີຍຕໍ່ ທ່ານ ນາງ Yuri SATO, ທີ່ ມາຢ້ຽມຢາມພົບປະຄັ້ງນີ້ ຊຶ່ງເຮັດໃຫ້ສາຍພົວພັນຮ່ວມມືລະຫວ່າງສອງປະເທດ ລາວ-ຍີ່ປຸ່ນ ນັບມື້ນັບດີຂຶ້ນ ແລະ ຕີລາຄາສູງຕໍ່ການຊ່ວຍເຫຼືອຫຼາຍດ້ານໃຫ້ແກ່ລາວ ເປັນຕົ້ນການສົ່ງເສີມດ້ານການຄ້າ, ການລົງທຶນໂຄງການໃຫຍ່ທີ່ປິ່ນອ້ອມໃຫ້ແກ່ເສດຖະກິດຂອງລາວ ແລະ ໂຄງການພັດທະນາການສຶກສາ, ສາທາລະນະສຸກ, ການປຸກສ້າງໂຮງຮຽນ, ໂຮງໝໍ ແລະ ດ້ານກະສິກຳການປຸງແຕ່ງອາຫານສົດທີ່ມີຄຸນນະພາບສູງ. ນອກຈາກນັ້ນ, ຍັງສະໜັບສະໜູນການຈັດກອງປະຊຸມຮ່ວມກັນຫຼາຍຄັ້ງ ຊຶ່ງເປັນການແລກປ່ຽນບົດຮຽນຊຶ່ງກັນ ແລະ ກັນ, ການຈັດງານວາງສະແດງສິນຄ້າໂອດ໊ອບຮ່ວມກັນລາວ-ຍີ່ປຸ່ນ ແລະ ອື່ນໆ. ຍັງມີ ບໍລິສັດ Start up ທີ່ເປັນຕົວແທນຂອງຍີ່ປຸນປະຈຳລາວ ທີ່ມີສຳນັກງານຕັ້ງຢູ່ນະຄອນຫຼວງວຽງຈັນ, ມີສາຂາຢູ່ຫຼວງພະບາງ, ປາກເຊ ບໍລິສັດນີ້ລົງເລິກດ້ານກະສິກຳປຸງແຕ່ງອາຫານເປັນຕົ້ນຕໍ ລວມເຖິງການຊ່ວຍເຫຼືອໃນໄລຍະຜ່ານມາ. ພ້ອມນີ້, ທັງສອງຝ່າຍໄດ້ໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍຮັກສາມູນເຊື້ອອັນດີງາມຕໍ່ການພັດທະນາເສດຖະກິດ ສປປ ລາວ ໃຫ້ດີຂຶ້ນ. ທ່ານ ນາງ Yuri SATO, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ມາຢ້ຽມຢາມພົບປະຫຼາຍກະຊວງຂອງລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ ສປປ ລາວ ທີ່ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບ.
ຕອນທ້າຍ ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ອວຍພອນໃຫ້ ທ່ານ ນາງ Yuri SATO ຮອງປະທານອົງການ ເຈໂຕຣ (JETRO) ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນເລື້ອຍໆ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
