ຕອນເຊົ້າ ເວລາ 9: 00 ໂມງ ຂອງວັນທີ 15 ມັງກອນ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ,ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາຂອງ ທ່ານ ນາງ Rena Bitter, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສະຫະລັດ ອາເມລິກາ ປະຈຳ ສປປ ລາວ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 7 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ນາງ Rena Bitter, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດໃຫ້ແກ່ສອງປະເທດ ລາວ-ອາເມລິກາ ໃນໄລຍະຜ່ານມາ ທ່ານ ກໍ່ມີຜົນງານທີ່ດີໃນການສ້າງສາຍພົວພັນຮ່ວມມືທີ່ດີນັບມື້ນັບແໜ້ນແຟ້ນຍິ່ງຂຶ້ນຫຼາຍດ້ານ ແລະ ຕີລາຄາສູງຕໍ່ການຊ່ວຍເຫຼືອໃຫ້ແກ່ລາວເປັນຕົ້ນ ບັນດາໂຄງການດ້ານການສຶກສາ, ສາທາລະນາສຸກ ທີ່ປິ່ນອ້ອມ ໃຫ້ແກ່ລາວ ແລະ ການຮ່ວມມືທາງດ້ານການຄ້າ ການລົງທຶນໃຫ້ແກ່ເສດຖະກິດຂອງລາວ.
ນອກນັ້ນຍັງເປັນຄູ່ຄ້າຮ່ວມກັນ ເປັນຕົ້ນສິນຄ້າການນຳເຂົ້າ-ສົ່ງອອກ ຂໍສະເໜີໃນຕໍ່ໜ້າໃຫ້ມີການຄ້າຮ່ວມກັນຫຼາຍຂຶ້ນ, ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ທັງສອງຝ່າຍສືບຕໍ່ຮ່ວມມືພັດທະນາເສດຖະກິດ ແລະ ວຽກງານອື່ນໆໃນຕໍ່ໜ້າໃຫ້ດີຂຶ້ນກວ່າເກົ່າ. ທ່ານ ນາງ Rena Bitter, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈທີ່ໄດ້ດໍາລົງຕໍາແໜ່ງເປັນ ເອກອັກຄະລັດຖະທູດຜູ້ມີອໍານາດເຕັມແຫ່ງ ສະຫະລັດ ອາເມລິກາ ປະຈໍາ ສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະທີ່ດຳລົງຕຳແໜ່ງເປັນເອກອັກຄະລັດຖະທູດຢູ່ລາວຜ່ານມາ ທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນ ກວ່າເກົ່າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
