ວັນທີ 22 ມິຖຸນາ 2020 ພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ໄດ້ເປີດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ວາງທິດທາງ 6 ເດືອນທ້າຍປີ 2020 ທີ່ພະແນກອຸດສາຫະກໍາ ແລະ ການຄ້າແຂວງຜົ້ງສາລີ (ພອຄ.ຜລ) ໃຫ້ກຽດເປັນປະທານໂດຍ ທ່ານ ທະນູຄຳ ປິດຈະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງ ແລະ ມີ ທ່ານ ບຸນລົມ ຫົງຄຳ ຮອງຫົວໜ້າພະແນກ, ບັນດາຫົວໜ້າ- ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ຫົວໜ້າຂະແໜງ, ຮອງຫົວໜ້າຂະແໜງພາຍໃນພະແນກ ອຄ ແລະ ພະນັກງານວິຊາການ ເຂົ້າຮ່ວມ.

        ໂອກາດນີ້, ທ່ານ ບຸນລົມ ຫົງຄຳ ກໍ່ໄດ້ລາຍງານຕໍ່ກອງປະຊຸມໃຫ້ຊາບວ່າ: ການສະຫຼຸບຕີລາຄາຜົນງານການເຄື່ອນໄຫວວຽກງານ 6 ເດືອນຕົ້ນປີ ຜ່ານມາ ທຽບໃສ່ແຜນປີ 2020 ເຫັນວ່າ ຍອດມູນຄ່າການຜະລິດ ແລະ ການຈຳໜ່າຍອຸດສາຫະກຳປຸງແຕ່ງ ແລະ ຫັດຖະກຳ ທົ່ວແຂວງ ປະຕິບັດໄດ້ 182,34 ຕື້ກີບ ທຽບໃສ່ແຜນການປີ ແມ່ນປະຕິບັດໄດ້ 32,07%; ການຈໍລະຈອນສິນຄ້າພາຍໃນ (ການຄ້າຂາຍຍົກ-ຂາຍຍ່ອຍ ແລະ ເກັບຊື້້ຜະລິດຕະພັນພາຍໃນ) ສາມາດບັນລຸໄດ້ 648,34 ຕື້ກີບ; ມູນຄ່າການນໍາເຂົ້າ ແລະ ສົ່ງອອກ ບັນລຸ 190,91 ຕື້ກີບ ຫຼຸດລົງ 3,2% ເມື່ອທຽບໃສ່ໄລຍະດຽວກັນ ຂອງປີຜ່ານມາ. ໃນນີ້, ການສົ່ງອອກບັນລຸ 94,74 ຕື້ກີບ ເພີ່ມຂຶ້ນ 9,8% ແລະ ການນໍາເຂົ້າ 96,17 ຕື້ກີບ ຫຼຸດລົງ 14,3%; ການແຈ້ງຂຶ້ນທະບຽນ ແລະ ຄຸ້ມຄອງວິສາຫະກິດ ຂຶ້ນໃໝ່ ແລະ ດັດແກ້ 180 ຫົວໜ່ວຍ ມູນຄ່າທຶນຈົດທະບຽນ 314,32 ຕື້ກີບ ທຽບໃສ່ແຜນປີ ແມ່ນປະຕິບັດໄດ້ 51,43% ປັດຈຸບັນໃນທົ່ວແຂວງມີທັງໝົດ 2.068 ຫົວໜ່ວຍ ມີມູນຄ່າຈົດທະບຽນ 1.138,74 ຕື້ກີບ ໂດຍປະຕິບັດຕາມຂໍ້ຕົກລົງສະບັບເລກທີ 0023/ອຄ.ກທຄວ ເຮັດໃຫ້ການຂຶ້້ນທະບຽນວິສາຫະກິດ ຊ້າສຸດເຫຼືອພຽງ 2 ວັນລັດຖະການ ແລະ ການພັດທະນາສິນຄ້າທ່າແຮງ ແລະ ສິນຄ້າໜຶ່ງເມືອງໜຶ່ງຜະລິດຕະພັນ “ODOP” ສາມາດພັດທະນາໄດ້ 3 ຫົວໜ່ວຍຄື: ໂຮງງານປຸງແຕ່ງຊາບູຮານ ແສງຄຳ ລາວລີ ບ້ານຈ່າພູ ເມືອງຜົ້ງສາລີ, ໂຮງຜະລິດເສັ້ນເຝີ ແລະ ເຂົ້າປຸ້ນສ່ວນບຸກົນ ບ້ານພຽງດອກຄຳ ເມືອງບຸນເໜືອ ແລະ ກຸ່ມແປຮູບຜະລິດຕະພັນໄຄແຜ່ນ ບ້ານສິນໄຊ ເມືອງຂວາ. ພ້ອມດຽວກັນນີ້, ໄດ້ຕໍ່ສັນຍາການນຳໃຊ້ກາໝາຍໂອດ໋ອບແຫ່ງຊາດ ຂອງແຂວງຜົ້ງສາລີ ຈຳນວນ 5 ຫົວໜ່ວຍ ຄື: 1) ກຸ່ມຜະລິດນ້ຳເຜິ້ງທຳມະຊາດ ບ້ານແສນລາດ ເມືອງຂວາ, 2​) ກຸ່ມຜະລິດສິນຄ້າຫັດຖະກໍາແຜ່ນແພ ບ້ານລ້ອງນານເກົ່າ ເມືອງບຸນໃຕ້, 3) ຊາພຽງໂມຢາ ບ້ານບໍ່ກົ້ງ ເມືອງຜົ້ງສາລີ, 4) ຊາຂຽວຜົ້ງສາລີ, 5) ຊາບັ້ງ ບ້ານລຸ້ງຈີ້ງ ເມືອງຜົ້ງສາລີ; ຜ່ານການຄົ້ນຄວ້າຂອງຜູ້ແທນກອງປະຊຸມ ໄດ້ມີຄວາມເປັນເອກະພາບສູງ ຕໍ່ທິດທາງແຜນການ 6 ເດືອນທ້າຍປີ 2020 ຂອງຂະແໜງອຸດສາຫະກຳ ແລະ ການຄ້າ.​

      ​ໃນຕອນທ້າຍຂອງກອງປະຊຸມ, ທ່ານ ທະນູຄຳ ປິດຈະວົງ ຫົວໜ້າພະແນກອຸດສາຫະກຳ ແລະ ການຄ້າ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານ ທີ່ຂະແໜງອຸດສາຫະກຳ ແລະ ການຄ້າ ຍາດມາໄດ້ ໃນໄລຍະ 6 ຕົ້ນປີ2020 ຜ່ານມາ. ພ້ອມນີ້, ເພື່ອເປັນທິດຊີ້ນຳ ໃຫ້ແກ່ການເຄື່ອນໄຫວວຽກງານໃນຕໍ່ໜ້າ ທ່ານຍັງໄດ້ເນັ້ນບາງບັນຫາ ຄື:

1. ໃຫ້ສືບຕໍ່ຫັນເອົາແຕ່ລະໜ້າທີ່ ຫັນເປັນແຜນງານອັນລະອຽດ ແລ້ວມອບໃຫ້ອ້າຍນ້ອງພາຍໃນຂະແໜງ, ພາຍໃນຫ້ອງການສືບຕໍ່ເອົາໄປຈັດຕັ້ງປະຕິບັດ ພັດທະນາໜ້າວຽກຂອງຕົນເອງ
2. ເພີ່ມທະວີຊີ້ນຳ-ນຳພາ ຫົວໜ່ວຍທຸລະກິດພາຍໃນເມືອງຂອງຕົນ ໃຫ້ມີຄວາມເຂັ້ມແຂງ, ສ້າງປະຊາກອນຫົວໜ່ວຍທຸລະກິດ ໃຫ້ເຕີບໃຫຍ່ຂະຫຍາຍຕົວ
3. ສຸມໃສ່ຜັນຂະຫຍາຍແຜນພັດທະນາ 5 ປີ ຂອງພະແນກ ອຄ ຂອງເມືອງ ໃຫ້ສັບຊ້ອນບັນດາວຽກເຂົ້າກັນ ແລ້ວນຳໄປຈັດຕັ້ງປະຕິບັດໃຫ້ໄດ້ຮັບຜົນດີ
4. ສືບຕໍ່ປະສານງານ ລະຫວ່າງ ສາຍຕັ້ງ-ສາຍຂວາງ ໂດຍນໍາໃຊ້ກົນໄກທີ່ທັນສະໄໝ
5. ຮຽກຮ້ອງໃຫ້ຫົວໜ້າຫ້ອງການອຸດສາຫະກຳ ແລະ ການຄ້າເມືອງ ນຳເອົາວິໄສທັດຂອງພະແນກ ແລະ ທິດທາງແຜນການ 6 ເດືອນທ້າຍປີ 2020 ນຳໄປສະເໜີ ຕໍ່ການນຳຂອງເມືອງ ໄປຜັນຂະຫຍາຍໃນການຈັດຕັ້ງປະຕິບັດ.

ພາບ ແລະ ຂ່າວໂດຍ: ແສງວິລັດ ຍົດສະວັດ ພະແນກ ອຄ ແຂວງຜົ້ງສາລີ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ