ຕອນເຊົ້າ ເວລາ 10: 00 ໂມງ ຂອງວັນທີ 17 ກໍລະກົດ 2020ຜ່ານມາ, ທີ່ຫ້ອງປະຊຸມທາງໄກ ຊັ້ນ 3 ກະຊວງອຸດສາຫະກຳ ແລະ ການຄ້າ ທ່ານ ສົມຈິດ ອິນທະມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ “The Joint Session of the 13th Mekong-Japan Industry and Government Dialogue and the 1st Meeting of 2020 AMEICC Working Group Meeting on West-East Corridor Development (WEC-WG)” ໂດຍການເປັນປະທານຂອງທ່ານ Saksayam Chidchob ລັດຖະມົນຕີ ກະຊວງຄົມມະນາຄົມ ແຫ່ງປະເທດໄທ ແລະ ປະທານຮ່ວມທ່ານ Shigehiro Tanaka ຮອງລັດຖະມົນຕີ ກະຊວງເສດຖະກິດ, ການຄ້າ ແລະ ອຸດສາຫະກໍາ ແຫ່ງປະເທດຍີ່ປຸ່ນ ຊຶ່ງມີຕາງໜ້າຈາກກົມແຜນການ ແລະ ການຮ່ວມມື ກະຊວງໂຍທາທິການ ແລະ ຂົນສົ່ງ, ກົມເສດຖະກິດ ກະຊວງການຕ່າງປະເທດ, ກົມອຸດສາຫະກໍາ ແລະ ຫັດຖະກໍາ, ກົມແຜນການ ແລະ ການຮ່ວມມື, ກົມນະໂຍບາຍການຄ້າຕ່າງປະເທດ ກະຊວງອຸດສາຫະກໍາ ແລະ ການຄ້າ ແລະ ວິຊາການກ່ຽວຂ້ອງເຂົ້າຮ່ວມ ປະມານ 10 ກວ່າທ່ານ.
ຈຸດປະສົງຂອງກອງປະຊຸມຄັ້ງນີ້ເປັນກອງປະຊຸມປະຈໍາປີ ຂອງ “The Joint Session of the 13th Mekong-Japan Industry and Government Dialogue” ແລະ ການນໍາສະເໜີບັນດາໂຄງການຂອງ ບັນດາປະເທດແມ່ນໍ້າຂອງ 5 ປະເທດຄື: ກໍາປູເຈຍ, ລາວ, ມຽນມ້າ, ຫວຽດນາມ ແລະ ໄທ ຕໍ່ກອງເລຂາ AMEICC ຂອງຍີ່ປຸ່ນ ແລະ ຄູ່ຮ່ວມພັດທະນາ ເພື່ອຄົ້ນຄວ້າພິຈາລະນາບັນຈຸເຂົ້າເປັນ Road Map ຂອງແຜນ Mekong Industrial Development Vision 2.0(MIDV2.0) ຫຼັງຈາກນັ້ນ ຝ່າຍຍີ່ປຸ່ນຈະສະເໜີການຮັບຮອງ ບັນດາໂຄງການ ຕໍ່ກອງປະຊຸມບັນດາລັດຖະມົນເສດຖະກິດ ແມ່ນໍ້າຂອງ-ຍີ່ປຸ່ນ ຄັ້ງທີ 12 ແລະ ກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 12 ຕໍ່ໄປ.
ຕາມວິໄສທັດການພັດທະນາອຸດສາຫະກໍາແມ່ນໍ້າຂອງ (Mekong Industrial Development Vision 2.0-MIDV2.0) ປະກອບມີ 3 ເສົາຄໍ້າຫຼັກ ຄື: (1) ການເຊື່ອມຈອດທາງດ້ານອຸດສາຫະກຳ (Industry Connectivity), (2) ການເຊື່ອມຈອດທາງດ້ານໂຄງບົນ (Soft Connectivity) ແລະ (3) ການເຊື່ອມຈອດທາງດ້ານໂຄງລ່າງພື້ນຖານ (Hard Connectivity) ແລະ 9 ເສົາຄໍ້າຍ່ອຍ; ຊຶ່ງໃນນີ້ຝ່າຍລາວໄດ້ນໍາສະເໜີ 8 ໂຄງການ ໂດຍຜ່ານ 3 ເສົາຄ້ຳຍ່ອຍ (sub-pillars) ປະກອບດ້ວຍ: 1- Promoting green economy; 2- Promoting investment/business collaboration; ແລະ 3- Upgrading industries through digital technologies ເປັນຕົ້ນ ການສົ່ງເສີມການບໍລິໂພກ ແລະ ການຜະລິດແບບຍືນຍົງໃນບັນດາປະເທດແມ່ນໍ້າຂອງ, ຫຼຸດຜ່ອນການປ່ອຍອາຍເຮືອນແກ້ວ ໃນພາກອຸດສາຫະກໍາ, ເປີດຕົວການລິເລີ່ມອຸດສາຫະກໍາສີຂຽວ ໃນປະເທດແມ່ນໍ້າຂອງ, ສົ່ງເສີມການລົງທຶນອຸດສາຫະກໍາ ໂດຍຜ່ານການພັດທະນາສວນອຸດສາຫະກໍາ ແລະ ເຂດເສດຖະກິດພິເສດໃນປະເທດແມ່ນໍ້າຂອງ, ເທັກໂນໂລຊີດີຈີຕອນ ສໍາລັບໂຄງການເປົ້າໝາຍການພັດທະນາເສດຖະກິດ ແລະ ສັງຄົມທີ່ຍືນຍົງ, ການຖ່າຍທອດຄວາມຮູ້ ແລະ ເທັກໂນໂລຊີ ກ່ຽວກັບໂຄງການອຸດສາຫະກໍາ 4.0 ແລະ ການນໍາໃຊ້ເທັກໂນໂລຊີດີຈີຕອນ ສໍາລັບການຈັດການອຸດສາຫະກໍາ ແລະ ການປ້ອງກັນການຄ້າທີ່ຜິດກົດໝາຍ.
ແຫຼ່ງຂ່າວ: ກົມອຸດສາຫະກໍາ ແລະ ຫັດຖະກໍາ
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
