ໃນວັນທີ 06 ສິງຫາ 2020, ກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມ ຜ່ານຮ່າງເນື້ອໃນ ແລະ ທາບທາມບຸກຄະລາກອນ ເພື່ອເປັນເປົ້າໝາຍ ຄະນະບໍລິຫານງານພັກກະຊວງອຸດສາຫະກຳ ແລະ ການຄ້າ ສະໄໝທີ V, ຮອບທີ II ຢ່າງເປັນທາງການ ທີ່ກະຊວງອຸດສາຫະກຳ ແລະ ການຄ້າ ຊຶ່ງຈັດໃນຮູບແບບກອງປະຊຸມທາງໄກ ໂດຍການເປັນປະທານ ຂອງ ທ່ານ ນາງ ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງອຸດສາຫະກຳ ແລະ ການຄ້າ. ກອງປະຊຸມ ດໍາເນີນເປັນເວລາ 1 ວັນ, ມີຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ຄະນະໜ່ວຍພັກ ແລະ ບັນດາສະຫາຍ ສະມາຊິກພັກສົມບູນ ທີ່ມີຕໍາແໜ່ງຮອງຫົວໜ້າພະແນກຂຶ້ນໄປ ທີ່ສັງກັດຢູ່ແຕ່ລະໜ່ວຍພັກ ທົ່ວອົງຄະນະພັກກະຊວງ ອຄ ເຂົ້າຮ່ວມ ປະມານ 298 ສະຫາຍ.
ຈຸດປະສົງຂອງກອງປະຊຸມ ແມ່ນເພື່ອຜ່ານຮ່າງເນື້ອໃນ ຂອງບົດຮ່າງລາຍງານການເມືອງ, ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກກະຊວງ ສະໄໝທີ IV, ຮ່າງແຜນພັດທະນາວຽກງານອຸດສາຫະກໍາປຸງແຕ່ງ ແລະ ການຄ້າ 5 ປີ (2021-2025) ແລະ ທາບທາມບຸກຄະລາກອນ ເພື່ອເປັນເປົ້າໝາຍຄະນະບໍລິຫານງານພັກກະຊວງ ອຄ ສະໄໝທີ V, ຮອບ II ແລະ ທາບທາມເອົາຄະນະປະຈໍາພັກ, ເລຂາ, ຮອງເລຂາ, ປະທານ ແລະ ຮອງປະທານຄະນະກວດກາພັກ ຮອບທີ I.
ກອງປະຊຸມໄດ້ລົງເລິກ ສະຫລຸບຜົນງານ ທັງດ້ານດີ ແລະ ດ້ານອ່ອນ-ຂໍ້ຄົງຄ້າງ, ການປະກອບຄໍາຄິດເຫັນ ຂອງບັນດາຜູ້ແທນ ໃນບັນຫາຕ່າງໆ ທີ່ຈະຕ້ອງເອົາໃຈໃສ່, ແກ້ໄຂ ແລະ ນຳໄປຈັດຕັ້ງປະຕິບັດຢ່າງເປັນເອກະພາບກັນ ໃນຕໍ່ໜ້າ; ພ້ອມທັງ ການຜ່ານມາດຕະຖານ, ເງື່ອນໄຂ ຂອງຄະນະບໍລິຫານງານພັກກະຊວງ, ຄະນະປະຈໍາພັກ, ເລຂາ, ຮອງເລຂາ, ປະທານ ແລະ ຮອງປະທານຄະນະກວດກາພັກ ແລະ ດໍາເນີນການປ່ອນບັດ ທາບທາມບຸກຄະລາກອນ.
ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ, ກຜຮ
ພາບໂດຍ: ທ ໄພຄໍາອີ ວິໄລຄໍາ ສູນສະຖິຕິ ແລະ ຂໍ້ມູນຂ່າວສານ, ກຜຮ
