ຕອນເຊົ້າເວລາ 8:30 ໂມງ ຂອງວັນທີ 17 ພຶດສະພາ 2021 ທີ່ຫ້ອງປະຊຸມທາງໄກ ກະຊວງອຸດສາຫະກໍາ ແລະ ການຄ້າ ທ່ານສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ທັງເປັນຮອງຫົວໜ້າຄະນະສະເພາະກິດຮັບມືການແຜ່ລະບາດ ຂອງພະຍາດໂຄວິດ-19 ນໍາພາຄະນະ ຊຶ່ງຕາງໜ້າຈາກຫ້ອງການ, ກົມການຄ້າພາຍໃນ, ກົມການນໍາເຂົ້າ ແລະ ສົ່ງອອກ, ກົມອຸດສາຫະກໍາ ແລະ ຫັດຖະກໍາ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກົມແຜນການ ແລະ ການຮ່ວມມື ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກະຊວງ ອຄ ເຂົ້າຮ່ວມປະຊຸມ ປະມານ 10 ທ່ານ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ພັນຄໍາ ວິພາວັນ ນາຍົກລັດຖະມົນຕີ, ໂດຍມີຈຸດປະສົງ ເພື່ອປຶກສາຫາລື ກ່ຽວກັບການຈັດຕັ້ງປະຕິບັດ ຄໍາສັ່ງ 15/ນຍ ແລະ ມາດຕະການປ້ອງກັນ ຄວບຄຸມ ແລະ ແກ້ໄຂສະພາບການແຜ່ລະບາດພະຍາດໂຄວິດ-19 ຂອງນະຄອນຫຼວງ ແລະ ບັນດາແຂວງທົ່ວປະເທດ; ພ້ອມທັງ ຮັບຟັງການລາຍງານການປະເມີນຜົນການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ໄລຍະວັນທີ 6-17 ພຶດສະພາ 2021 ແລະ ສະເໜີທິດທາງແຜນການໃນຕໍ່ໜ້າ ໂດຍຄະນະສະເພາະກິດ ນອກຈາກນີ້, ຕາງໜ້າຫ້ອງວ່າການປົກຄອງນະຄອນຫລວງວຽງຈັນ, ຫ້ອງວ່າການປົກຄອງແຂວງບໍ່ແກ້ວ, ຫ້ອງວ່າການປົກຄອງແຂວງຈໍາປາສັກ, ຫ້ອງວ່າການປົກຄອງແຂວງສະຫວັນນະເຂດ ລາຍງານສະພາບການຕິດເຊື້ອໂຄວິດຂອງແຂວງຕົນ ແລະ ມີຂໍ້ສະເໜີ; ພ້ອມດຽວກັນນີ້, ບັນດາຂະແໜງການກ່ຽວຂ້ອງ, ບັນດາແຂວງ ມີຄໍາເຫັນ ແລະ ຂໍ້ສະເໜີຕໍ່ກອງປະຊຸມ;
ຕອນທ້າຍ ທ່ານ ນາຍົກລັດຖະມົນຕີ ໄດ້ໃຫ້ທິດຊີ້ນໍາ ແລະ ເນັ້ນໜັກຕື່ມວ່າ: 1/ ຄວາມສາມັກຄີເປັນນໍ້າໜຶ່ງໃຈດຽວຂອງຄະນະພັກຂັ້ນສູນກາງຮອດທ້ອງຖິ່ນ ຮ່ວມກັນຄິດພ້ອມກັນເຮັດ ໄປທິດທາງດຽວກັນຕ້ານພະຍາດໂຄວິດ-19 2/ ຄວາມເປັນເຈົ້າການຕື່ນຕົວຂອງປະຊາຊົນ ປ້ອງກັນຕົວເອງ, ປ້ອງກັນຄອບຄົວ, ປ້ອງກັນຊຸມຊົນ ລວມທັງຄວາມເປັນເຈົ້າການຄວາມຮັບຜິດຊອບ ຄະນະພັກສູນກາງ-ທ້ອງຖິ່ນ ແຕ່ລະກໍລະນີ ແລະ ແຕ່ລະຈຸດກວດຄວນເອົາເປັນບົດຮຽນ 3/ ການຜັນຂະຫຍາຍຄວາມໝາຍຂອງບົດຮຽນທີ 1 ແລະ 2 ຂໍໃຫ້ພົນລະເມືອງລາວ ແລະ ຄົນຕ່າງປະເທດຜູ້ທີ່ອາໄສຢູ່ລາວ ຈົ່ງມີຄວາມຊື່ສັດ ຈິງໃຈເຄົາລົບ ແລະ ເຂັ້ມງວດຕໍ່ກົດໝາຍ ບໍ່ລ່ວງລະເມີດການເຂົ້າ-ອອກເມືອງ ມາດຕະການທາງແພດ ຕົວຢ່າງ: ແມ່ຕູ້ ອາຍຸ 90 ປີ ປິ່ນປົວຕາມການແນະນໍາຂອງແພດ ແມ່ນຫາຍເຊົາໄວ; ແຕ່ບົດຮຽນຜູ້ອາຍຸໜຸ່ມ ບໍ່ປະຕິບັດຕາມການແນະນໍາຂອງແພດ ເສຍຊີວິດ; 4/ ການລະບາດພະຍາດດັ່ງກ່າວແກ່ຍາວເປັນເວລາ 2 ປີ ປະຊາຊົນລາວອິດເມື່ອຍຕໍ່ການເຝົ້າລະວັງ ແລະ ມາດຕະການປ້ອງກັນ, ສໍາລັບແພດໝໍການສຸມໃສ່ຕ້ານພະຍາດ ປ້ອງກັນພະຍາດກໍ່ອິດເມື່ອຍ ແຕ່ເຮົາມີບົດຮຽນບໍ່ໃຊ້ອາລົມຕໍ່ກັນ ເຮັດໃຫ້ວຽກງານດັ່ງກ່າວສາມາດຫຼຸດຜ່ອນຄວາມເຄັ່ງຕຶງ 5/ ເຈົ້າໜ້າທີ່ກ່ຽວຂ້ອງ ຈົ່ງເອົາໃຈໃສ່ຄົ້ນຄວ້າບົດຮຽນທີ່ອຸດົມສົມບູນຂອງປະເທດເພື່ອນມິດ ຊຶ່ງສະພາບຈຸດພິເສດຂອງແຕ່ລະປະເທດຈະບໍ່ຄືກັນທັງໝົດ ເລືອກເອົາມາດຕະການທາງການແພດ, ການບໍລິຫານເສດຖະກິດ, ບໍລິຫານສັງຄົມທີ່ດີສຸດ ນໍາໃຊ້ໃຫ້ສອດຄ່ອງກັບທ້ອງຖິ່ນ ພ້ອມກັນນັ້ນ, ເປີດໃຈຮັບຟັງຄວາມຄິດເຫັນຂອງປະຊາຊົນ ນໍາເອົາຄໍາຄິດເຫັນແລກປ່ຽນບົດຮຽນຊຶ່ງກັນ ແລະ ກັນ; ຫຼີກລ່ຽງການໂຄສະນາບິດເບືອນຄວາມຈິງ ທີ່ບໍ່ເປັນປະໂຫຍດຕໍ່ປະເທດຊາດ 6/ ຄວາມເອື້ອເຟື້ອເພື່ອແຜ່ ຮັກແພງຊ່ວຍເຫຼືອຊຶ່ງກັນ ແລະ ກັນ ລະຫວ່າງຜູ້ມີເງື່ອນໄຂຊ່ວຍຜູ້ດ້ອຍໂອກາດ ເປັນຕົ້ນການສົ່ງຢືນເຂົ້າສານ ອາຫານແຫ້ງ ລວມທັງເຄື່ອງປ້ອງກັນໂຄວິດ ເຮັດຢ່າງມີການຈັດຕັ້ງ ຮ່ວມໄມ້ຮ່ວມມືກັນເປັນຢ່າງດີ.
ພ້ອມທັງວາງທິດທາງແຜນການຕໍ່ໜ້າຄື: 1/ ວຽກຮີບດ່ວນ ມອບໃຫ້ຄະນະສະເພາະກິດຮັບມືການແຜ່ລະບາດ ຂອງພະຍາດໂຄວິດ-19 ຮີບຮ້ອນປັບປຸງຈັດຕັ້ງບຸກຄະລາກອນ ຕາມຮູບແບບບັນຊາສູ້ຮົບ, ຂັ້ນສູນກາງເປັນເສນາທິການໃຫ້ແກ່ຄະນະພັກ-ລັດຖະບານຂັ້ນສູນກາງ, ຂັ້ນທ້ອງຖິ່ນເປັນເສນາທິການໃຫ້ແກ່ຄະນະພັກ-ລັດຂັ້ນທ້ອງຖິ່ນ ໃຫ້ມີກໍາລັງຄົນກໍາລັງຊັບ ຈັດຕັ້ງປະຕິບັດຄັກແນ່; 2/ ສືບຕໍ່ປັບປຸງຕື່ມຕາມຄໍາຄິດເຫັນຂອງທ້ອງຖິ່ນ ໃນມາດຕະການຫຼັງວັນທີ 20 ພຶດສະພາ ສົມທົບຄົ້ນຄວ້າຄືນຄັກແນ່ ຢູ່ນະຄອນຫຼວງຈະຜ່ອນຄາຍອັນໃດໄດ້ກ່ອນ ອັນໃດຄວນເຂັ້ມງວດ ພາຍຫຼັງຄົ້ນຄວ້າ ຄວນມີຄໍາແນະນໍາຕື່ມ ການປິດບ້ານປິດເມືອງບໍ່ຄວນປິດໝົດເປັນເດັດຖານ ເລືອກເອົາບ້ານ, ເມືອງທີ່ມີການແຜ່ລະບາດເຊື້ອຫຼາຍກ່ອນ; ຄວນມີການໄລ່ລຽງຄືນໃໝ່ເປັນຕົ້ນ ຢູ່ນະຄອນຫຼວງ ຖ້າຈະເປີດສະໜາມກິລາກາງແຈ້ງ ຄວນມີມາດຕະການປ້ອງກັນເຂັ້ມງວດ 3/ ສໍາລັບດ້ານການແພດ ການສ້າງແຜນການສັກຢາວັກຊີນປ້ອງກັນພະຍາດໂຄວິດ-19 ຕ້ອງເຮັດໃຫ້ຫຼາຍເທົ່າທີ່ຈະຫຼາຍໄດ້ ດ້ານທຶນຮອນຈັດຊື້ເຮົາກໍ່ມີສ່ວນໜຶ່ງຢູ່ແລ້ວ ອີກອັນໜຶ່ງການແພດຄວນຖອດຖອນບົດຮຽນ ກັບປະເທດເພື່ອນມິດ ຢາປິ່ນປົວຊະນິດໃດທີ່ປົວດີໄວ ກໍ່ຄວນກໍານົດໂດຍໄວ ພ້ອມກັນນັ້ນ ການຍົກລະດັບເຄື່ອງອຸປະກອນການແພດ ສ່ວນຈັດສັນງົບປະມານຕ້ອງມີແຜນຕົວຈິງ ບໍ່ຄວນເຮັດເປັນລວມໆ ພ້ອມທັງເອົາໃຈໃສ່ພິເສດນະໂຍບາຍຕໍ່ພະນັກງານແພດໝໍ ປະຕິບັດໜ້າທີ່ປະຈັນບານ ຢູ່ໂຮງໝໍ ຈຸດກວດເຊື້ອ… ແລະ ສືບຕໍ່ຄົ້ນຄວ້າຜັນຂະຫຍາຍຄໍາສັ່ງ 15/ນຍ.
ພາບ-ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
