ເນື່ອງໃນໂອກາດວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ ວັນທີ 01 ມິຖຸນາ 2021, ຄະນະພັກ, ຄະນະນຳກະຊວງອຸດສາຫະກຳ ແລະ ການຄ້າ ໄດ້ສ້າງຂະບວນການ ເພື່ອເປັນການສະໜັບສະໜູນວັນສຳຄັນດັ່ງກ່າວ ໃນຕອນເຊົ້າຂອງ ວັນທີ 01 ມິຖຸນາ 2021, ທີ່ກະຊວງອຸດສາຫະກຳ ແລະ ການຄ້າ ດ້ວຍຮູບແບບກະທັດຮັດ ແລະ ປະຕິບັດຕາມມາດຕະການສະກັດກັ້ນ, ຄວບຄຸມພະຍາດໂຄວິດ-19 ທີ່ຄະນະສະເພາະກິດໄດ້ວາງອອກຢ່າງເຂັ້ມງວດ; ສະນັ້ນວິທີການມອບຂອງຂວັນວັນເດັກນ້ອຍສາກົນ ປີນີ້ ທ່ານ ສົມຈິດ ອິນທະມິດ ຮອງລັດຖະມົນຕີ, ປະທານຄະນະກຳມາທິການຄວາມກ້າວໜ້າແມ່ຍິງ ແລະ ແມ່-ເດັກ ກະຊວງອຸດສາຫະກຳ ແລະ ການຄ້າ ໃນນາມຕາງໜ້າໃຫ້ຄະນະພັກ, ຄະນະນຳ ກະຊວງ ອຄ ພ້ອມດ້ວຍ ຫົວໜ້າກົມຈັດຕັ້ງ ແລະ ພະນັກງານ, ຜູ້ຮັກສາການຫົວໜ້າຫ້ອງການ ແລະ ປະທານຄະນະບໍລິຫານງານສະຫະພັນແມ່ຍິງກະຊວງ ອຄ ໄດ້ມອບຂອງຂວັນໃຫ້ຜູ້ຕາງໜ້າຈາກຫ້ອງການ, ບັນດາກົມ, ສະຖາບັນຄົ້ນຄ້ວາເສດຖະກິດອຸດສາຫະກຳ ແລະ ການຄ້າ ເພື່ອນຳເອົາໄປແຈກຢາຍໃຫ້ລູກຫຼານຂອງພະນັກງານລັດຖະກອນກະຊວງອຸດສາຫະກຳ ແລະ ການຄ້າຢ່າງທົ່ວເຖິງຈຳນວນ 600 ຫໍ່, ສຳລັບການເຜີຍແຜ່ເຊື່ອມຊຶມສົນທິສັນຍາວ່າດ້ວຍສິດທິເດັກ, ວິໄສທັດການພັດທະນາເດັກລາວລຸ້ນປີ 2030 ແລະ ປະຫວັດຄວາມເປັນມາຂອງວັນເດັກສາກົນ 01 ມິຖຸນາ ໃຫ້ພະນັກງານຫ້ອງການ, ບັນດາກົມ, ສະຖາບັນຄົ້ນຄ້ວາເສດຖະກິດອຸດສາຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳແຫ່ງຊາດ, ລັດວິສາຫະກິດ ແລະ ບໍລິສັດ ອ້ອມຂ້າງກະຊວງອຸດສາຫະກຳ ແລະ ການຄ້າ ແມ່ນສົ່ງຜ່ານທາງເອເລັກໂຕຼນິກ.
ໄປພ້ອມກັບຂະບວນການມອບຂອງຂວັນວັນເດັກນ້ອຍສາກົນແລ້ວ, ທ່ານ ປອ ຄຳແພງ ໄຊສົມແພງ ກຳມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ເປັນເອກະພາບຮ່ວມກັບຄະນະພັກ, ຄະນະນຳກະຊວງ ແລະ ພະນັກງານ-ລັດຖະກອນພາຍໃນ ແລະ ອ້ອມຂ້າງກະຊວງ ອຄ ປຸກລະດົມໃຫ້ພ້ອມກັນສ້າງຂະບວນການປູກຕົ້ນໄມ້ ໂດຍປູກຢູ່ບໍລິເວນບ້ານເຮືອນ ແລະ ໄຮ່ນາຮົ້ວສວນຂອງຕົນເອງ ຕາມຄວາມສາມາດ ແລະ ສອດຄ່ອງກັບຂະບວນການລວມເຕັມໄປດ້ວຍເນື້ອໃນ ແລະ ບັນຍາກາດຂອງຂະບວນການປູກຕົ້ນໄມ້ແຫ່ງຊາດ ໃນສະພາບການແຜ່ລະບາດພະຍາດໂຄວິດ-19, ຊຶ່ງສັງລວມໃນທົ່ວກະຊວງ ສາມາດປູກຕົ້ນໄມ້ໄດ້ທັງໝົດຈຳນວນ 2.452 ຕົ້ນ.
ແຫຼ່ງຂ່າວ: ຈາກ ຄະນະບໍລິຫານງານສະຫະພັນແມ່ຍິງ ກະຊວງ ອຄ
ຮຽບຮຽງໂດຍ: ໄພຄຳອີ ວິໄລຄຳ
