ຕອນບ່າຍໃນເວລາ 2: 30 ໂມງ ຂອງວັນທີ 10 ກັນຍາ 2021, ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Paul Kelly, ເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ໃນໂອກາດ ເຂົ້າພົບປະປຶກສາຫາລືດ້ານການຄ້າ ແລະ ທ່ານ ໄດ້ມາຮັບຕໍາແໜ່ງໜ້າທີ່ໃໝ່, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 12 ທ່ານ.
ໂອກາດນີ້ ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Paul Kelly, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດ ໃຫ້ແກ່ສອງປະເທດ ລາວ-ອົດສະຕຣາລີ, ໃນໄລຍະຜ່ານມາ ການເສີມສ້າງສາຍພົວພັນຮ່ວມມືທີ່ດີຊຶ່ງກັນ ແລະ ກັນ; ທັງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ-ອົດສະຕຣາລີ, ພ້ອມທັງການສົ່ງເສີມການເພີ່ມຜະລິດຕະພາບອັນດີງາມ ໃນການປະກອບສ່ວນສ້າງສາພັດທະນາພື້ນຖານໂຄງລ່າງ ໃຫ້ພາກລັດ ແລະ ພາກທຸລະກິດ ໂດຍການໃຫ້ຄວາມຊ່ວຍເຫຼືອແກ່ ສປປ ລາວ; ທັງສອງຝ່າຍຍັງໄດ້ປຶກສາຫາລືກັນຫຼາຍດ້ານ ເປັນຕົ້ນຂະຫຍາຍສາຍພົວພັນທີ່ດີ ດ້ານການເມືອງ, ການຄ້າ, ການລົງທຶນ ແລະ ວັດທະນາທຳຂອງລາວ. ນອກນັ້ນຍັງໄດ້ປຶກສາຫາລືກັນໃນວຽກງານຫຼາຍດ້ານທີ່ປິ່ນອ້ອມ ເປັນພື້ນຖານໂຄງລ່າງໃຫ້ແກ່ລາວ, ໃນນີ້ ທ່ານ Paul Kelly ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະໃຫ້ການຮ່ວມມື, ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ສປປ ລາວ.
ພາບ-ຂ່າວໂດຍ: ໄພຄໍາອີ ວິໄລຄໍາ
ສູນສະຕິຖິ ແລະ ຂໍ້ມູນຂ່າວສານ ກຜຮ, ອຄ,
