ໃນຕອນເຊົ້າເວລາ 8:30 ໂມງ ຂອງວັນທີ 8 ກໍລະກົດ 2022, ທີ່ຫ້ອງປະຊຸມສະຖາບັນອຸດສາຫະກໍາ ແລະ ການຄ້າ ກະຊວງອຸດສາຫະກໍາ ແລະ ການຄ້າ, ໄດ້ຈັດພິທີປະກາດການຢັ້ງຢືນສະຫະພັນກໍາມະບານ ກະຊວງ ອຸດສາຫະກໍາ ແລະ ການຄ້າ ເປັນສະຫະພັນກໍາມະບານ 5 ເປັນເຈົ້າປະຈໍາປີ 2021 ເປັນກຽດເຂົ້າຮ່ວມເປັນປະທານຂອງ ທ່ານ ນາງ ຈັນສຸກ ແສງພະຈັນ ຮອງເລຂາຄະນະພັກກະຊວງ, ຮອງລັດຖະມົນຕີ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ພ້ອມດ້ວຍແຂກຖືກເຊີນ ແລະ ສະມາຊິກກໍາມະບານກະຊວງ ອຄ ເຂົ້າຮ່ວມ.
ທ່ານ ນາງ ຈັນເພັດ ມະນີແສງ ຫົວໜ້າກົມຂະບວນການຍ້ອງຍໍ ສູນກາງສະຫະພັນກໍາມະບານລາວ ໄດ້ຂຶ້ນຜ່ານ ຂໍ້ຕົກລົງຢັ້ງຢືນໃຫ້ສະຫະພັນກໍາມະບານ ກະຊວງ ອຸດສາຫະກໍາ ແລະ ການຄ້າ ເປັນສະຫະພັນກໍາມະບານ 5 ເປັນເຈົ້າປະຈໍາປີ 2021 ສະບັບເລກທີ 570/ສກລ, ລົງວັນທີ 09/05/2022.
ອີງຕາມ ຂໍ້ຕົກລົງ ຂອງປະທານຄະນະບໍລິຫານງານສະຫະພັນກໍາມະບານກະຊວງ ສະບັບເລກທີ 115/ສກບ.ອຄ, ລົງວັນທີ 4/7/2022 ວ່າດ້ວຍການຢັ້ງຢືນ ໃຫ້ສະຫະພັນກໍາມະບານ ແລະ ກໍາມະບານຮາກຖານ ທີ່ຂຶ້ນກັບສະຫະພັນກໍາມະບານກະຊວງອຸດສາຫະກໍາ ແລະ ການຄ້າ ເປັນກໍາມະບານ 5 ເປັນເຈົ້າ ປະຈໍາປີ 2021 ແລະ ອີງຕາມຂໍ້ຕົກລົງ ຂອງສະຫະພັນກໍາມະບານກະຊວງອຸດສາຫະກໍາ ແລະ ການຄ້າ ສະບັບເລກທີ 113/ສກບ.ອຄ, ລົງວັນທີ 04/7/2021 ວ່າດ້ວຍການຢັ້ງຢືນບຸກຄົນສະມາຊິກກໍາມະບານ ເປັນສະມາຊິກກໍາມະບານ 5 ເປັນເຈົ້າ ປະຈໍາປີ 2021.
ໃນພິທີ ທ່ານ ນາງ ຈັນສຸກ ແສງພະຈັນ ຮອງເລຂາຄະນະພັກກະຊວງ, ຮອງລັດຖະມົນຕີ ຜູ້ຊີ້ນໍາວຽກງານອົງການຈັດຕັ້ງມະຫາຊົນໄດ້ມີຄໍາເຫັນບາງຕອນວ່າ: ສະຫະພັນກຳມະບານກະຊວງອຸດສາຫະກຳ ແລະ ການຄ້າ ແມ່ນອົງການຈັດຕັ້ງມະຫາຊົນໜຶ່ງທີ່ຂຶ້ນກັບສູນກາງສະຫະພັນກຳມະບານລາວ ແລະ ຢູ່ພາຍໃຕ້ການຊີ້ນຳ-ນໍາພາ ຂອງຄະນະບໍລິຫານງານພັກ ກະຊວງອຸດສາຫະກຳ ແລະ ການຄ້າ, ທັງເປັນເສນາທິການໃຫ້ຄະນະພັກ, ຄະນະນຳກະຊວງ ໃນການປົກປ້ອງສິດ ແລະ ຜົນປະໂຫຍດອັນຊອບທຳ ຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານທົ່ວຂະແໜງອຸດສາຫະກຳ ແລະ ການຄ້າ. ໂດຍປະຕິບັດມະຕິກອງປະຊຸມໃຫຍ່ຄັ້ງທີ V ຂອງສະຫະພັນກໍາມະບານກະຊວງ ອຄ, ມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ VIII ຂອງສູນກາງສະຫະພັນກໍາມະບານລາວ ກໍຄືເນື້ອໃນຂໍ້ແຂ່ງຂັນ 5 ເປັນເຈົ້າ ແລະ ບົດແນະນໍາ ຂອງສູນກາງສະຫະພັນກໍາມະບານລາວ ກໍຄືແຜນການແຂ່ງຂັນປະຈໍາປີ 2021 ຂອງສະຫະພັນກໍາມະບານ ກະຊວງອຸດສາຫະກໍາ ແລະ ການຄ້າ ເຫັນໄດ້ວ່າ ໃນໄລຍະ ປີ 2021 ຜ່ານມາ ເປັນໄລຍະປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ຄະນະພັກກະຊວງອຸດສາຫະກໍາ ແລະ ການຄ້າ ໄດ້ເອົາໃຈໃສ່ຊີ້ນໍາຢ່າງໃກ້ຊິດ ອົງການຈັດຕັ້ງມະຫາຊົນ ເວົ້າລວມ, ເວົ້າສະເພາະອົງການຈັດຕັ້ງກຳມະບານ ກະຊວງອຸດສາຫະກໍາ ແລະ ການຄ້າ ໃນການຈັດຕັ້ງປະຕິບັດ ແລະ ເຄື່ອນໄຫວວຽກງານຂອງຕົນ ຕາມພາລະບົດບາດ, ສິດໜ້າທີ່ ໂດຍຕິດພັນກັບວຽກງານວິຊາສະເພາະ ຄຽງຄູ່ກັບການຕິດຕາມ ແລະ ປະເມີນຂໍ້ແຂ່ງຂັນ 5 ເປັນເຈົ້າ ແມ່ນປະຕິບັດໄດ້ຕາມຄາດໝາຍວາງໄວ້ ຄື ໄດ້ຮັບປະກາດການຢັ້ງຢືນ ເປັນສະຫະພັນກໍາມະບານ 5 ເປັນເຈົ້າ ຈາກສູນກາງກໍາມະບານລາວ ເພື່ອເປັນການເຕົ້າໂຮມກໍາລັງແຮງຂອງສະມາຊິກກໍາມະບານຜູ້ອອກແຮງງານໃນຂະແໜງການຂອງອຸດສາຫະກໍາ ແລະ ການຄ້າ ມີຄວາມຕື່ນຕົວ, ເປັນເຈົ້າການພັດທະນາຕົນເອງຢ່າງຮອບດ້ານ, ຈັດຕັ້ງປະຕິບັດແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ ພ້ອມທັງເປັນການປະເມີນຂະບວນການ, ການປັບປຸງ ປົວແປງ ການຈັດຕັ້ງກໍາມະບານຮາກຖານ ທີ່ຂຶ້ນກັບສະຫະພັນກໍາມະບານກະຊວງອຸດສາຫະກໍາ ແລະ ການຄ້າ ມີຄວາມໜັກແໜ້ນເຂັ້ມແຂງ, ມີການຍ້ອງຍໍສະມາຊິກຜູ້ດີເດັ່ນ.
ເນື່ອງໃນໂອກາດທີ່ມີຄວາມໜາຍຄວາມສໍາຄັນນີ້, ໃນນາມຕາງໜ້າຄະນະພັກກະຊວງອຸດສາຫະກໍາ ແລະ ການຄ້າ ກໍຄືຜູ້ຊີ້ນໍາສາມອົງການຈັດຕັ້ງມະຫາຊົນ ເຊິ່ງຮຽກຮ້ອງໃຫ້ບັນດາສະຫະພັນກໍາມະບານ, ກໍາມະບານຮາກຖານ ກໍຄືສະມາຊິກກໍາມະບານທີ່ຂຶ້ນກັບສະຫະພັນກໍາມະບານກະຊວງອຸດສາຫະກໍາ ແລະ ການຄ້າ ຕ້ອງໄດ້ພ້ອມພຽງກັນ ຮັກສາມູນເຊື້ອ ສະຫະພັນກໍາມະບານ 5 ເປັນເຈົ້າຂອງຕົນໃຫ້ໄດ້ທຸກໆປີ ຢ່າງໜັກແໜ້ນ ແລະ ມີຄຸນນະພາບ ຈົ່ງໄດ້ນໍາເອົາເນື້ອໃນຂໍ້ແຂ່ງຂັນ 5 ເປັນເຈົ້າທີ່ໄດ້ຮັບການເຜີຍແຜ່ ແລະ ເຊື່ອມຊືມຈາກຜູ້ຕາງໜ້າສູນກາງສະຫະພັນກໍາມະບານລາວ ໄດ້ນໍາໄປຈັດຕັ້ງປະຕິບັດ, ແນະນໍາ-ຊີ້ນໍາໂດຍຕ້ອງກໍາໃຫ້ໄດ້ເນື້ອໃນ, ມາດຖານ ແລະ ບາດກ້າວໃນການຈັດຕັ້ງປະຕິບັດເຊັ່ນ ເນື້ອໃນຂໍ້ແຂ່ງຂັນ 5ເປັນເຈົ້າ ປະກອບມີ ເປັນເຈົ້າການຝຶກຝົນຫຼໍ່ຫຼອມ ທາງດ້ານການເມືອງ-ແນວຄິດ, ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ, ເປັນເຈົ້າການພັດທະນາຕົນເອງ ແລະ ການຈັດຕັ້ງ , ເປັນເຈົ້າການປົກປ້ອງສິດ ແລະ ຝົນປະໂຫຍດຊອບທໍາ, ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະຕິສ້າງ ໂດຍຄຽງຄູ່ກັບການຈັດຕັ້ງປະຕິບັດວຽກງານວິຊາສະເພາະຂອງຕົນ , ປະຕິບັດຄໍາຂວັນຂອງ ສະຫະພັນກໍາມະບານກະຊວງ ອຸສາຫະກໍາ ແລະ ການຄ້າ ດັ່ງທີ່ສະຫາຍໄດ້ຂຶ້ນມາຈັບມືແຂ່ງຂັນກັນ ຄຶ “ເປັນເຈົ້າການພັດທະນາວຽກງານອຸດສາຫະກໍາ ແລະ ການຄ້າ ຕາມທິດຫັນເປັນທັນສະໄໝ ສີຂຽວ ແລະ ຍືນຍົງ”.
ນອກນັ້ນ ໃຫ້ບັນດາສະຫະພັນກຳມະບານ, ກໍາມະບານຮາກຖານ ຈົ່ງໄດ້ສ້າງຂະບວນການເຄື່ອນໄຫວ, ກິດຈະກໍາຕ່າງໆ ໃຫ້ເປັນຂະບວນຟົດຟື້ນ ເພື່ອສະເຫຼີມສະຫຼອງສອງວັນສໍາຄັນ ລາວ-ຫວຽດນາມ ຄື ວັນສ້າງສາຍພົວພັນມິດຕະພາບ ລາວ-ຫວຽດນາມ ແລະ ວັນສົນທິສັນຍາ ລາວ-ຫວຽດ.
ຂ່າວ: ໄພວັນ ໂຄດວັນທາ
ພາບ: ໄພວັນ ໂຄດວັນທາ
