ໃນຕອນເຊົ້າເວລາ 8:30 ໂມງ ຂອງວັນທີ 13 ກໍລະກົດ 2022, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາ ຂອງ ທ່ານ Lorenzo Galanti, ເອກອັກຄະລັດຖະທູດ ຜູ້ມີອໍານາດເຕັມແຫ່ງ ປະເທດອິຕາລີ ປະຈຳ ສປປ ລາວ ພ້ອມດ້ວຍຄະນະ, ໃນໂອກາດທີ່ສິ້ນສຸດການປະຕິບັດໜ້າທີ່ທາງການທູດໃນ ສປປ ລາວ, ມີ ທ່ານຮອງຫົວໜ້າກົມ ແລະ ວິຊາການກ່ຽວຂ້ອງຈໍານວນໜຶ່ງ ເຂົ້າຮ່ວມທັງສອງຝ່າຍ ປະມານ 7 ທ່ານ.

     ໂອກາດນີ້ ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ Lorenzo Galanti ເອກອັກຄະລັດຖະທູດ ອິຕາລີ ປະຈໍາ ສປປ ລາວ ຊຶ່ງ ທ່ານ ທູດ ໄດ້ສົນທະນາກ່ຽວກັບວຽກງານການຮ່ວມມື ລະຫວ່າງ ສປປ ລາວ- ອິຕາລີ ທີ່ມີການພົວພັນ ດ້ານເສດຖະກິດ ໃນນີ້ມູນຄ່າການຄ້າສອງຝ່າຍ ໃນ 5 ເດືອນຕົ້ນປີ 2022 ສາມາດປະຕິບັດໄດ້ 11,2 ລ້ານໂດລາສະຫະລັດ. ໃນນີ້, ມູນຄ່າການນໍາເຂົ້າປະຕິບັດໄດ້ 7,0 ລ້ານໂດລາສະຫະລັດ ແລະ ມູນຄ່າການສົ່ງອອກປະຕິບັດໄດ້ 4,1 ລ້ານໂດລາສະຫະລັດ.

     ສິນຄ້ານຳເຂົ້າ ໃນ 5 ເດືອນຕົ້ນປີ 2022 ປະກອບມີ: ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ເສັ້ນໄຍສັງເຄາະ, ໜັງດິບ (ນອກຈາກໜັງຂົນສັດ) ແລະ ໜັງຟອກ; ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…), ເຄື່ອງທີ່ເຮັດດ້ວຍແພ, ເຫຼົ້າ, ເບຍ, ວາຍ ແລະ ສິນຄ້າອື່ນໆ; ສິນຄ້າຫຼັກທີ່ ສປປ ລາວ ສົ່ງອອກ ໄປອິຕາລີ ປະກອບມີ: ເຄື່ອງນຸ່ງຫົ່ມ, ເກີບ, ກາເຟ (ບໍ່ທັນໄດ້ປຸງແຕ່ງ), ເຂົ້າ, ແປ້ງມັນຕົ້ນ ແລະ ສິນຄ້າ ອື່ນໆ;

     ດ້ານການລົງທຶນ ນັບແຕ່ປີ 2008 ຮອດປັດຈຸບັນ ການລົງທຶນຂອງ ອິຕາລີ ໃນ ສປປ ລາວ (ສະເພາະໃນຂະແໜງກິດຈະການທົ່ວໄປ ບໍ່ກວມເອົາຂົງເຂດເສດຖະກິດພິເສດ ແລະ ເຂດສໍາປະທານ) ມີຈໍານວນວິສາຫະກິດທັງໝົດ 6 ຫົວໜ່ວຍ ແລະ ມີມູນຄ່າການລົງທຶນທັງໝົດ 4,3 ຕື້ກີບ ຫຼື ປະມານ 5,4 ແສນໂດລາສະຫາລັດ, ຈັດເປັນປະເທດທີ່ມີມູນຄ່າການລົງທຶນ ໃນ ສປປ ລາວ ເປັນອັນດັບທີ່ 50. ຂະແໜງການທີ່ ອິຕາລີ ມາລົງທຶນໃນ ສປປ ລາວ ປະກອບມີ: ການເຄື່ອນໄຫວໃຫ້ທີ່ພັກເຊົາ ແລະ ບໍລິການອາຫານ; ການເຄື່ອນໄຫວກ່ຽວກັບສຸຂະພາບມະນຸດ ແລະ ວຽກງານທາງສັງຄົມ ແລະ ການສຶກສາ.

     ນອກຈາກນີ້,ທັງສອງຝ່າຍຍັງແລກປ່ຽນຄໍາຄິດຄໍາເຫັນຢ່າງກົງໄປກົງມາໃນຫຼາຍດ້ານ ເພື່ອຊອກຫາທາງອອກໃນອະນາຄົດໃຫ້ໄດ້ປັບປຸງວຽກງານການຮ່ວມມືຂອງສອງຝ່າຍ ດີຂຶ້ນກວ່າເກົ່າໃນຕໍ່ໜ້າ. ພ້ອມດຽວກັນນີ້, ທ່ານ Lorenzo Galanti, ເອກອັກຄະລັດຖະທູດ ອີຕາລີ ປະຈໍາ ສປປ ລາວ ໄດ້ຝາກຄວາມສະແດງຄວາມຍິນດີຕໍ່ທ່ານລັດຖະມົນຕີ ທີ່ໄດ້ມາຮັບຕໍາແໜ່ງໜ້າທີ່ໃໝ່ ແລະ ໃຫ້ຄໍາໝັ້ນວ່າ ໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ອີຕາລີ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດ.

ພາບ-ຂ່າວ: ທ ທິລາວັນ ວົງວິຈິດ ສູນສະຖິຕິ ແລະ ຂໍ້ມູນຂ່າວສານ ກຜຮ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ