ໃນຕອນເຊົ້າເວລາ 9:00 ໂມງ ຂອງວັນທີ 20 ກໍລະກົດ 2022, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນ. Enna Esther Viant Valdes ເອກອັກຄະລັດຖະທູດ ແຫ່ງ ສາທາລະນະລັດ ກູບາ ປະຈຳ ສປປ ລາວ ພ້ອມດ້ວຍຄະນະ, ເຂົ້າຮ່ວມມີ ທ່ານຫົວໜ້າຫ້ອງການ,  ຫົວໜ້າກົມ, ຮອງຫົວໜ້າກົມ ແລະ ວິຊາການກ່ຽວຂ້ອງຈໍານວນໜຶ່ງ ເຂົ້າຮ່ວມທັງສອງຝ່າຍ ປະມານ 8 ທ່ານ.

ທ່ານ ເອກອັກຄະລັດຖະທູດ ສ. ກູບາ ປະຈໍາ ສປປ ລາວ ໄດ້ສະແດງຄວາມຍິນດີ  ໃນໂອກາດທີ່ທ່ານໄດ້ຮັບໜ້າທີເປັນລັດຖະມົນຕີກະຊວງອຸດສາຫະກໍາ ແລະ ການຄ້າ ຄົນໃໝ່ ແລະ ໄດ້ປຶກສາຫາລືເຖິງຄວາມຄືບໜ້າກ່ຽວກັບສັນຍາຊື້ຂາຍ ແລະ ແລກປ່ຽນສິນຄ້າໃນຮູບແບບການຊົດເຊີຍ (ເອົາສິນຄ້າແລກປ່ຽນກັບສິນຄ້າ ຫຼື ການບໍລິການ) ລະຫວ່າງ ສປປ ລາວ ແລະ ສ. ກູບາ. ປັດຈຸບັນ ຮ່າງສັນຍາຊື້ຂາຍ ແລະ ແລກປ່ຽນສິນຄ້າໃນຮູບແບບການຊົດເຊີຍ (ເອົາສິນຄ້າແລກປ່ຽນກັບສິນຄ້າ ຫຼື ການບໍລິການ) ແມ່ນຢູ່ໃນຂັ້ນຕອນການຄົ້ນຄ້ວາ ແລະ ປະສານງານກັບບັນດາພາກສ່ວນທີ່ກ່ຽວຂ້ອງ ຂອງ ສປປ ລາວ ໂດຍສະເພາະແມ່ນ ກະຊວງການຕ່າງປະເທດ, ກະຊວງສາທາລະນະສຸກ, ກະຊວງ ໂຍທາທິການ ແລະ ຂົນສົ່ງ, ສະພາການຄ້າ ແລະ ອຸດສາຫະກຳ ແຫ່ງຊາດ, ສະຖານທູດກູບາ ປະຈຳ ລາວ, ແລະ ບໍລິສັດທີ່ຈະມາເປັນຕົວແທນດຳເນີນທຸລະກິດດັ່ງກ່າວ. ບັນດາສິນຄ້າທີ່ ສ. ກູບາ ນຳມາແລກປ່ຽນກັບ ສປປ ລາວ ແມ່ນສິນຄ້າປະເພດ ຢາປົວພະຍາດ, ວັກຊິນປ້ອງກັນພະຍາດສັດ, ອຸປະກອນການແພດ ແລະ ອື່ນໆ. ສ່ວນສິນຄ້າທີ່ ສ. ກູບາ ຕ້ອງການຈາກ ສປປ ລາວ ແມ່ນ ສິນຄ້າປະເພດ ເຂົ້າສານ ແລະ ສິນຄ້າກະສິກຳອື່ນໆ. ມາຮອດປະຈຸບັນ ເຫັນວ່າ ສ ປປ ລາວ ແລະ ສ. ກູບາ ແມ່ນສາມາດກຳນົດລາຍລະອຽດ ແລະ ຂໍ້ມູນຂອງສິນຄ້າໄດ້ໂດຍພື້ນຖານແລ້ວ, ແຕ່ຍັງຕ້ອງໄດ້ກຳນົດບາງລາຍລະອຽດ ແລະ ຂໍ້ມູນຂອງສິນຄ້າເພີ້ມເຕີ່ມອີກເຊັ່ນ: ຈຳນວນສິນຄ້າ, ລາຄາສິນຄ້າ, ລະດັບຄຸນນະພາບ, ວິທີການຈັດສົ່ງ ແລະ ການປະກັນໄພສິນ ຄ້າ ແລະ ອື່ນໆ, ຊຶ່ງຄາດວ່າຈະສາມາດປຶກສາຫາລືກັບ ສ. ກູບາ ແລະ ພາກສ່ວນທີ່ກ່ຽວຂ້ອງຂອງ ສປປ ລາວ ໃນໄວໆນີ້. ນອກນັ້ນ, ທ່ານ  ເອກອັກຄະລັດຖະທູດ ກໍ່ໄດ້ເຊີນທ່ານ ລັດຖະມົນຕີ ໄປຮ່ວມງານວາງສະແດງ ທີ່ຈະຈັດຂຶ້ນ ຢູ່ Havana.

ທ່ານ ລັດຖະມົນຕີ ກ່າວວ່າ ສ ກູບາ ມີການຜະລິດສິນຄ້າບາງຄົງເຂດ ທີ່ມີຊື່ສຽງທົ່ວໂລກ,  ສິນຄ້າບາງປະເພດກໍ່ສົ່ງອອກໄປຫລາຍປະເທດ ຊອກຫາກົນໄກ ເພື່ອຊຸກຍູ້ ການຄ້າສອງຝ່າຍ ລາວ-ກູບາ ຊຶ່ງໃນປະຈຸບັນ ກໍ່ເລີ່ມມີຫນໍ່ແຫນງການຄ້າ 2 ຝ່າຍໄດ້ເກີດຂຶ້ນ ພາກລັດກໍ່ພະຍາຍາມ ຍົກລະດັບການຄ້າ 2 ຝ່າຍ ຊຶ່ງໃນນີ້ ລັດຖະບານທັງສອງປະເທດ ກໍ່ກຳລັງຮ່າງສັນຍາ ການຮ່ວມມື ເພື່ອການຊຸກຍູ້ການຄ້າ ຂອງພາກທຸລະກິດ ຊຶ່ງມີຄວາມສຳຄັນຫລາຍ ຊຶ່ງພາກລັດຈະຕ້ອງໄດ້ວາງນະໂຍບາຍໃຫ້ສອດຄ່ອງ, ສປປ ລາວ ມີເງື່ອນໄຂການວາງສະແດງສິນຄ້າຢູ່ລາວ ເພື່ອໃຫ້ຄົນລາວໄດ້ເຫັນ ແລະ ຊົມໃຊ້ສິນຄ້າ ຈາກ ສ ກູບາ ແລະ ທຸລະກິດລາວ ກໍ່ສາມາດໄປຮ່ວມວາງສະແດງ ແລະ ເຄື່ອນໄຫວຢູ່ ຮາວານາ. ທ່ານ ລັດຖະມົນຕີ ໄດ້ກ່າວສະແດງ ຄວາມຂອບໃຈ  ທີ່ເປັນຂົວຕໍ່ ການດ້ານຮ່ວມມື  ແລະ ການເຊື່ອເຊີນໄປ Havana ແລະ ຫວັງວາຈະມີໂອກາດໄປຢ້ຽມຢາມ, ຈະສຶກສາ ຄວາມເປັນໄປໄດ້ ໃນການຊຸກຍູ້ ສົ່ງເສີມ ຂະຫຍາຍ,  ຫລັງການພົບປະ ກໍ່ຈະລົງເລິກ ບໍລິສັດ ພອນເພັດ ເພື່ອຊຸກຍູ້ ການສົ່ງອອກົປ ກູບາ. ການພົວພັນ ລະຫວ່າງ ສປປ ລາວ ແລະ ກູບາ ໃນຂະແໜ່ງອຸດສະຫະກຳ ແລະ ການຄ້າ ນັບມື້ນັບໄດ້ຮັບການຂະຫຍາຍຕົວ ຈື່ງຄວນມີການພົວພັນກັນໃນຫຼາຍຮູບແບບ ແລະ ມີກົນໄກການປຶກສາຫາລື ແລະ ແລກປ່ຽນບົດຮຽນ ເພື່ອປັບປຸງແກ້ໄຂດ້ານອຸດສາຫະກຳ ແລະ ການຄ້າ ລະຫວ່າງສອງປະເທດ ໃຫ້ນັບມື້ນັບເຕີມໃຫຍ່ຂະຫຍາຍຕົວຂຶ້ນກ່ວາເກົ່າ. ໄດ້ສະເໜີໃຫ້ປ່ຽນຈາກການແລກປ່ຽນສິນຄ້າ (barter trade) ເປັນການຊື້ຄ້າລະຫວ່າງພາກທຸລະກິດເລີຍຈະເຫມາະສົມກວ່າ. ເພາະເຫັນໄດ້ວ່າ ບໍລິສັດ ພັດເພັດບໍ່ຕ້ອງການແລກ ເຂົ້າ ກັບຢາ ແຕ່ຢາກຈະໄດ້ເປັນການຊື້ຂາຍແທນ.

ໃນຕອນທ້າຍ ທ່ານ ກໍ່ໄດ້ເນັ້ນຕື່ມ ໃນການຊຸກຍູ້ສົ່ງເສີມການຄ້າ 2 ປະເທດ ລາວ-ກູບາ ໄດ້ມີພື້ນຖານການພົວພັນຮ່ວມມືທີ່ເປັນມູນເຊື້ອ ມີຄວາມໄວ້ເນື້ອເຊື່ອໃຈ ແລະ ຫວັງວ່າຈະມີການພົບປະຮ່ວມມື ໃນດ້ານ ເສດຖະກິດ ການຄ້າ ຫຼາຍຂຶ້ນຕື່ມໃນຕໍ່ໜ້າ

ຂ່າວ: ທິລາວັນ

ພາບ: ທິລາວັນ