ໃນຕອນເຊົ້າເວລາ 10:00 ໂມງ ຂອງວັນທີ 20 ກໍລະກົດ 2022, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ DEENA JOY D. AMATONG , ເອກອັກຄະລັດຖະທູດປະເທດ ຟິລິບປິນ ປະຈຳ ສປປ ລາວ ພ້ອມດ້ວຍຄະນະ, ເຂົ້າຮ່ວມມີ ທ່ານຫົວໜ້າຫ້ອງການ,  ຫົວໜ້າກົມ, ຮອງຫົວໜ້າກົມ ແລະ ວິຊາການກ່ຽວຂ້ອງຈໍານວນໜຶ່ງ ເຂົ້າຮ່ວມທັງສອງຝ່າຍ ປະມານ 8 ທ່ານ.

ທ່ານ ເອກອັກຄະລັດຖະທູດ ໄດ້ກ່າວສະແດງຄວາມຍິນດີ ໃນໂອກາດທີ່ທ່ານໄດ້ຮັບໜ້າທີເປັນລັດຖະມົນຕີກະຊວງອຸດສາຫະກໍາ ແລະ ການຄ້າ ຄົນໃໝ່ ແລະ ໄດ້ປຶກສາຫາລືເຖິງ ມູນຄ່າການນຳເຂົ້າ-ສົ່ງອອກ ລະຫວ່າງ ສອງປະເທດ ແມ່ນຍັງຈຳກັດ ເຖິງແມ່ນວ່າສອງຝ່າຍຈະຮ່ວມກັນເປີດເສລີຢ່າງກ້ວາງຂວາງ ໃນຂອບການຮ່ວມມື ອາຊຽນ ເນື່ອງຈາກວ່າ ສິນຄ້າທີ່ສອງປະເທດ ມີທ່າແຮງໃນການສົ່ງອອກ ສ່ວນໃຫຍ່ແມ່ນສິນຄ້າ ທີ່ສອງປະເທດບໍ່ມີຄວາມຕ້ອງການໃນການນຳເຂົ້າ ແລະ ການລົງທຶນຕ່າງປະເທດຂອງ ຟິລິປິນ ຢູ່ລາວ ແມ່ນຍັງມີໜ້ອຍ. ທ່ານ ກ່າວຕື່ມວ່າ ຢູ່ ສປປລາວ ມີ ຄົນຟິລິບປິນ ຢູ່ສປປລາວ ປະມານ 2000 ຄົນສ່ວນໃຫຍ່ ແມ່ນ ມາໃນດ້ານການສຶກສາ ສອນພາສາອັງກິດ, ຟິລິບປິນ ມີທ່າແຮງດ້ານຊັບພະຍາກອນ ມີບຸກຄະລາກອນເກັ່ງດ້ານ ພະລັງງານ, ດ້ານກົດຫມາຍ ອື່ນໆ ເປັນໂອກາດໃນການລົງທຶນດ້ານ ເຕັກໂນໂລຊີ ຂໍ້ມູນຂ່າວສານ, ດ້ານທ່ອງທ່ຽວ ແລະ ຈະສຶກສາເບິ່ງທ່າແຮງຕ່າງໆ. ນອກນັ້ນ ທ່ານ ເອກອັກຄະລັດຖະທູດ ມີແຜນລົງໄປຢ້ຽມຢາມ ເຂດເສດຖະກິດພິເສດຕ່າງໆ ແລະ ຫວັງວ່າໃນຊວງປະຈຳຢູ່ ສປປ ລາວ ຈະເຫັນຕົວເລກການຄ້າ ລາວ-ຟິລິບປິນ ມີທ່າອ່ຽງເພີ່ມຂຶ້ນ. ທ່ານ  ເອກອັກຄະລັດຖະທູດ ກ່າວຕື່ມວ່າ ສິ່ງທີ່ນັກທຸລະກິດ ສົນໃຈຢາກຊາບຂໍ້ມູນ ຂໍໃຫ້ທາງກະຊວງ ອຄ ຊ່ວຍສະໜອງຂໍ້ມູນດ້ານເງື່ອນໄຂການລົງທຶນຕ່າງ ຊຶ່ງສະຖານທູດ ຈະຊ່ວຍແນະນຳນັກລົງທຶນ ທີ່ມີຄວາມສົນໃຈໃນຫລາກຫລາຍຂົງເຂດ.

ທ່ານ ລັດຖະມົນຕີ ກ່າວວ່າ ປັດຈຸບັນ ມີຄົນຟີລິບປິນ ອາໃສຢູ່ລາວ ເປັນໂອກາດທີ່ດີໃນການສົ່ງເສີມດ້ານການຄ້າ ການລົງທຶນ ໃນອະນາຄົດ ຈະໄດ້ລົງເລີກ ຊຸກຍູ້ສົ່ງເສີມນັກທຸລະກິດ ດ້ານການຄ້າການລົງທຶນ ຂອງ 2 ປະເທດ , ສປປ ລາວມີ  ທາງລົດໄຟລາວຈີນ ປັນໂອກາດ ໃນການຄ້າຂາຍ ແລະ ມີທ່າແຮງດ້ານທ່ອງທ່ຽວ ແລະ ຟີລິບມີປະສົບການດ້ານການບໍລິການ ອາດເປັນໂອກາດໃນການຮ່ວມມື ໃນອະນາຄົດ ກໍ່ເຫັນໂອກາດນັກທ່ຽວຈະເຂົ້າມາຫລາຍຂຶ້ນ,ຈະພະຍາຍາມ ຊຸກຍູ້ ຕາມພາລະບົດບາດ ໃນນັ້ນ ມີສະພາການຄ້າ ແລະ ອຸດສາຫະກຳ ແຫ່ງຊາດ ທີ່ຈະເປັນຂົວຕໍ່ລະຫວ່າງນັກທຸລະກິດ ຖ້າມີນັກທຸລະກິດມາເຄື່ອນໄຫວຢ້ຽມຢາມກໍພ້ອມຈະພົບປະ ແລະ ເຮັດວຽກຮ່ວມກັບສະພາການຄ້າ ແລະ ອຸດສາຫະກຳ ແຫ່ງຊາດ ເພື່ອຊຸກຍູ້ສົ່ງເສີມ ການລົງທຶນ ແລະ ການຄ້າ. ສປປ ລາວ ມີເຂດເສດຖະກິດພິເສດ ຢູ່ຫລາຍບ່ອນ ຕົວຢ່າງຢູ່ນະຄອນຫລວງວຽງຈັນ ກະຊວງອຸດສາຫະກຳ ແລະ ການຄ້າ ກໍ່ມີນິຄົມ VITA ແລະ ມີຄວາມຕ່ອງການດ້ານບຸກຄະລາກອນ ທີ່ມີສີມືແຮງງານ ໃນຫລາຍຂົງເຂດ. ພ້ອມກັນນັ້ນ,  ດ້ານອຸດສາຫະກຳປຸງແຕ່ງ ກໍມີທ່າແຮງຫລາຍ ແລະ ມີຍຸດທະສາດຊຸກຍູ້ສົ່ງເສີ່ມ ດ້ານນີ້ ແລະ ຟິລິບປິນ ກໍ່ມີທ່າແຮງດ້ານ ແລະ ມີຄວາມເຂັ້ມແຂງດ້ານນີ້.

ຂ່າວ ທິລາວັນ

ພາບ ທິລາວັນ